Ust'-Džegut

Ust'-Džegut
Усть-Джегута (ven.)
Усть-Джьгваты (abaz.)
Жэгуэтэныпэ (kab. da čerk.)
Джёгетей Аягъы (kar. da balk.)
Valdkund	Venäma
Eläjiden lugu (2025)	31,685 ristitud
Pind	90 km²
Pämez'	Aznaur Semenov; (reduku 2012—)
Telefonkod	+7−87 875-xx-xxx
Avtokod	09
Aigvö	UTC+3 (MSK+0)

Ust'-Džegut (ven.: Усть-Джегута́, abaz.: Усть-Джьгваты, kab. da čerk.: Жэгуэтэныпэ / Усть-Жэгуэтэ, kar. da balk.: Джёгетей Аягъы) om Venäman lidn da lidnankund Karačajan da Čerkesijan Tazovaldkundan pohjoižes. Se om Ust'-Džegutan rajonan administrativine keskuz.

Istorii

Eländpunktan aluz om pandud kozakoil-sirdnikoil vl 1861 kuti Ust'-Džegutinskai-stanic (ven.: станица Усть-Джегутинская). Se sai lidnan statusad vl 1975 nügüdläiženke nimenke.

Ust'-Džegut šingotase sauvondmaterialiden tegimil (cement^[1], mouckivi^[2], silikatine savič), pen' gidroelektrostancii om sauvomas. Edel 2004. vot raudbetontegesiden tegim radoi mugažo.

Geografijan andmused

Lidn sijadase rajonan lodehliženno röunanno, pidust' Kubanin oiktad randad, 627 m ü.m.t. keskmäižel korktusel. Ust'-Džegutan vezivaradim seižub ülezjogen, Sur' Stavropolin kanal augotase siš, om lidnan päivnouzmaižeks röunaks.

Matkad Čerkesskhasai om kahesa kilometrad pohjoižhe. Džegut-raudtestancii radab vspäi 1944, se om 71-kilometrižen sarakon Nevinnomisskai-stancijaspäi lopstancijaks. Ei ole passažirühtenzoitust raudtedme vspäi 2009, se om kaičenus Čerkesskhasai vaiše.

Tobmuz

Ust'-Džegut om lidnankundan üks'jäižeks eländpunktaks.

Lidnankundan tobmuden pämez' om sen Nevondkundan ezimez'. Lidnan Administracijan pämez' om Kemal Bairamukov vn 2012 kül'mkuspäi.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 30 566 ristitud, rajonan koume videndest, vn 2021 — 31 137 ristitud. Kaik 30 438 eläjad oli lidnas vl 2017. Kaikiš suremb lidnan ristitišt oli 32 903 eläjad vl 2002.

Rahvahad (enamba 0,4 % vl 2010, ozutadud rahvahudenke): karačailaižed — 54,6 %, venälaižed — 32,6 %, abazilaižed — 6,0 %, čerkesalaižed — 1,4 %, čiganalaižed — 1,1 %, totarlaižed — 0,7 %, ukrainalaižed — 0,4 %, toižed rahvahad — 3,2 %.

Islaman pämečet' om avaitud. Ortodoksižen hristanuskondan kaks' jumalanpertid^[3] ratas lidnas: ph. Mikoi-arhangelan (letihe kivišt vll 1879−1885) i phh. Pedr da Fevronija Muromalaižiden (om saudud vll 2014−2019). Protestantizman nell' pühäpertid oma saudud: vižkümnenden päivän jumalankodikundan kaks' jumalanpertid i baptizman kaks' jumalanpertid.

Lapsiden opendusen aluzkundad oma seičeme nimitadud i nomeruidud päivkodid (nomer 1..4, 6..8), kaks' liceid (nomer 1 i 7), kaks' gimnazijad (nomer 4 i 6), koume keskškolad (nomer 2, 3, 5), rajonan lapsiden da norišton sädamižen pert', čomamahtoiden škol, rajonan kompleksine sportškol. Rahvahidenkeskeine nügüd'aigaižen ohjandusen avol'jaine kolledž (Čerkessk) — Ust'-Džegutan filial om lidnan professionaližen opendusen aluzkundaks.

Galerei

Pölištunuziden vll 1941−1945 nevondkundaližiden sodamehiden muštpacaz lidnan keskuzpuištos (2019)
Pölištunuziden vll 1941−1945 nevondkundaližiden sodamehiden velleskaum (2019)
Kuban' lähteb Ust'-Džegutan vezivaradimespäi vl 2015

Tetabad sündnuded

Dima Bilan (sünd. 1981) — Venäman pajatai da kinon ak'tor.

Homaičendad

Irdkosketused

Lidnan tobmuden sait (udgp.ru). (ven.)

	Karačajan da Čerkesijan Tazovaldkundan lidnad
	Čerkessk \| Karačajevsk \| Teberd \| Ust'-Džegut

[1] Tehmižen lehtpol' eurocement.ru-saital. (ven.)

[2] Džegonasan kar'jeran mouckiven tehmižen sait (izvest.org). (ven.)

[3] Ust'-Džegutan pühäpertid sobory.ru-saital. (ven.)

[1]

[2]

[3]