Tokmok

Tokmok
Токмок (kirg.)
Токмак (ven.)
Lidnanznam;	Flag;
Valdkund	Kirgizstan
Eläjiden lugu (2025)	76,200 ristitud
Pind	55,35 km²
Telefonkod	+996−3138
Aigvö	UTC+6

Tokmok (kirg.: Токмок «pall'», ven.: Токмак) om lidn Kirgizstanan pohjoižes, Čun agjas. Alištub agjan tobmudele oikti.

Istorii

Nügüdläižen eländpunktan aluz om pandud vl 1825 kuti Kokandan hankundan lidnuz. Vl 1862 se oli muretud Venäman sodavägil. Vl 1864 tulnu Vernijaspäi Venäman sodajouk pani venälaižen lidnusen alust vanhan lidnusenno. Vl 1867 Tokmok sai lidnan statusad, no vl 1878 sirtihe makundan keskust Pišpekha jogen paksuiden sur'veziden tagut, i Tokmok kändihe žiloks. Vl 1927 se sai lidnan statusad tošti.

Tokmok šingotase stöklan järedal eksportižen tehmižel (Interglass LLC) i valdkundbüdžetan aluzkundoil. Valdkundan 8. gvardijan motoambujiden divizii baziruiše lidnas.

Geografijan andmused

Lidn sijadase agjan keskuzpalan pohjoižes, Čunjogen hural randal, 800..850 m korktusil, 816 m ü.m.t. keskmäižel korktusel, om ümbärtud Tän'-Šan'-mägišton sarakoil. Jogi om valdkundröunaks lidnan ümbrištos, Kazahstanan territorii sijadase oiktal randal. Saudihe randdambid Ču-jogenno vll 1909−1914 päzumha paksuiš sur'vezišpäi.

Matkad Biškek-pälidnhasai om vižkümne viž kilometrad päivlaskmha orhal vai 70 km avtol.

Eläjad

Vn 2009 Kirgizstanan rahvahanlugemižen mödhe lidnan eläjiden lugu oli 53,231 ristitud, vn 2021 — 71,443 ristitud. Kaikiš suremb lidnan ristitišt oli 72,927 eläjad vl 1989 i om nügüd'.

Rahvahad (enamba 1 % vl 2009): kirgizlaižed — 46,8 %, venälaižed — 20,5 %, dunganalaižed — 16,5 %, uzbekad — 8,6 %, totarlaižed — 1,9 %, uigurad — 1,7 %, kazahlaižed — 1,1 %, toižed rahvahad i rahvahuden ozutandata — 2,9 %.

Professionaližen opendusen aluzkundad: Tokmokan medicinine kolledž, Tokmokan industrialiž-pedagogine kolledž, maižanduzkolledž, Tokmokan tehnine institut, Keskuzazijan Rahvahidenkeskeine universitet (päofis).

Maršruttaksid oma kundaližeks transportaks, Tokmak-raudtestancii radab vspäi 1942.