Pariž

	Pariž
Eläjiden lugu	2 234 000
Pind	105,4 km²

Pariž (francijan kelel: Paris [paˈʁi] (pari)) om Francijan pälidn da kaikiš järedamb lidn. Se om valdkundan kaikiš znamasižemb ekonomine da kul'turine keskuz. Parižan sijaduz om Keskfrancijan pohjoižpoles, Il'-de-Frans-regionas, Senanjogen randal. Parižas om eräzvuiččiden rahvahankeskeižiden organizacijoiden päfaterid. Megapolisan pind om 105,4 км². Eläjiden lugu om enamb 2,3 millionad ristituid, no kaikes Parižan aglomeracijas eläb jo enamb 10 millionad ristituid. Se on üks' Evropan Ühtištusen järedambiš aglomeracijoišpäi.

Pariž om Francijan znamasine turistine keskuz. Siš om äjad mail'man tetabad mel'heižtahod: Parižan Jumalanmaman päjumalanpert', Luvran muzei, Elisejan pöudod; Parižan simvolan om ažurine raudaine Ejfelän čuhunduz. Pariž om mugažo jalos znamasine transportsol'm. Siš om 5 aeroportad: «Šarl'-de-Gol'» (toine aeroport Evropas passažiroiden lugun mödhe Londonan "Hitroun" jäl'ghe), Orli, Le Burže (kudambha tehtas tutab aviasalon), Varti da Bove; 7 päraudtestancijad. 1900 vodespäi lidnas radab metropoliten (koumanz' Evropas Londonan da Budapeštan metropolitenoiden jäl'ghe).

1956 vodespäi Rim om Parižan üksjäine sebruzlidn («Vaiše Pariž om Riman arvoine; vaiše Rim om Parižan arvoine»). No Parižal om völ enamb 40 partnörlidnad (sidä kesken - Moskv da Piter)

Pariž om 1900 da 1924 voziden Kezaližiden Olimpižiden vändoiden lidn.