Ašaffenburg

Ašaffenburg
Aschaffenburg
Lidnanznam;	Flag;
Valdkund	Saksanma
Eläjiden lugu (2024)	73,091 ristitud
Pind	62,45 km²
Pämez'	Markus Šlemmer; (semendku 2026—,; Markus Schlemmer)
Telefonkod	+49−6021, +49−6028
Aigvö	tal'vel UTC+1,; kezal UTC+2

Ašaffenburg (saks.: Aschaffenburg [aˈʃafənbʊɐ̯k]) om Saksanman lidn Bavarii-federacijanman lodehes. Se ei mülü Ašaffenburgan ümbrikho, hot' om sen administrativižeks keskuseks.

Istorii

Eländpunkt mainitase ezmäižen kerdan vl 974 Otto II-imperatoran dokumentas. Johannisburg-zamk (om saudud vll 1605−1614, saks.: Schloss Johannisburg, nüg. Valdkundaližen kuvagalerein pala i kirjišt ) oli Maincan episkopiden rezidencijaks 18. voz'sadhasai. Toižen mail'man sodan aigan lidnan tobj pala oli pandud mantazole amerikalaižil eläjiden lujan vastustusen tagut. Vozil 1945−2007 AÜV:oiden sodabaz oli lidnas.

Ašaffenburg šingotase mašiništonsauvomižel («Linde Hydraulics» — päfater i kaks' tegint, «Takata» — avtodetalid) i logistikal: «Dynamic Parcel Distribution»-kompanijan päfater, znamasine valdkundaline Ašaffenburg-jogiport (3,3 mln tonnoid vl 2011) Rein-Main-Dunai-vezitel.

Geografijan andmused

Lidn sijadase Main-jogen randoil, 138 m keskmäižel korktusel valdmeren pindan päl.

Matkad Frankfurt Mainal-lidnhasai (Gessen-federacijanma) om nell'kümne üks' kilometrad lodeheze. Bavarijan Münhen-keskuz sijadase 270 km suvipäivnouzmha orhal vai 330 km avtoteidme.

Tobmuz

Ašaffenburg jagase kümneks nimitadud lidnrajonaks (äilugu saks.: Stadtteile).

Edeližed lidnan pämehed (oberburgomistrad) oma Jürgen Hercing (Jürgen Herzing, semendku 2020 — sulaku 2026), Klaus Gercog (Klaus Herzog, 2000−2020).

Eläjad

Vl 1950 lidnan eläjiden lugu oli 45,499 ristitud. Kaik 69,757 eläjad oli lidnas vl 2017. Kaikiš suremb lidnan ristitišt oli 69,863 eläjad vl 2006 i om nügüd'.

Rahvahad (2011): saksalaižed — 88 %, toižed rahvahad — 12 %.

Tehnine Ašaffenburg-üläškol (sättutoitud tedoiden universitet) radab lidnas vspäi 1995 (nügüdläine nimi om vspäi 2009).

Galerei

Lidnan tobmuden sauvuz (korktemb tagamal) i Teatrantorg (heinku 2016)
Phh. Petran i Aleksandran bazilikjumalanpert' (katoline, om saudud 10.-15. voz'sadoil), nägu vn 2007 sulakus
Johannisburg-zamk (reduku 2012)
Ašaffenburg-päraudtestancijan sauvuz, sügüz'ku 2012