Babuškin (Burätii)

Babuškin
Бабушкин (ven.)
Баабушкин хото (bur.)
	Lidnanznam;
Valdkund	Venäma
Eläjiden lugu (2023)	4,282 ristitud
Pind	9 km²
Pämez'	Leonid Seliverstov; (reduku 2018—)
Telefonkod	+7−30 138-xx-xxx
Avtokod	03
Aigvö	UTC+8 (MSK+5)

Babuškin (ven.: Ба́бушкин, burät.: Баабушкин хото) om Venäman lidn da lidnankund Burätijan Tazovaldkundan keskuzpalan päivlaskmas. Mülüb Kabanskan rajonha, sen üks'jäine lidn.

Istorii[vajehtada | vajehtada lähte]

Eländpunktan aluz om pandud vl 1760 kuti Posol'skii-jumalankodin Misovskii-žilo. Se sai lidnan statusad vl 1902, nimitihe Misovsk (ven.: Мы́совск). Vll 1925−1941 oli radnikžiloks, vspäi 1927 mülüb Burätijha. Vn 1941 18. päiväl vilukud sai lidnan statusad tošti udenke nimenke Ivan Babuškin-revolücioneran oiktastuseks (amptihe täs vl 1906).

Babuškin-lidn šingotase rel'soiden ühthekeitandtegimel.

Geografijan andmused[vajehtada | vajehtada lähte]

Lidn sijadase Baikalan suvirandal, 470 m ü.m.t. keskmäižel korktusel (13 m Baikalan pindan korktemb). Pen' Misovk-jogi (ven.: Мы́совка 11 km pitte) läbitab lidnad. Matkad Kabansk-žilo-rajonkeskushesai om 66 km pohjoižpäivnouzmha orhal vai 73 km «Baikal»-avtotrassadme (R-258), Ulan Udehesai — 170 km päivnouzmha. Misovai-raudtestancii radab Transsibal.

Bojarskii-žilo raudtestancijanno i Manturih-žilo mülüdas lidnankundha Babuškinan ližaks. Lidnankundan pind — 1 718,57 km².

Eläjad[vajehtada | vajehtada lähte]

Vn 2010 kaiken Venäman rahvahanlugemižen mödhe lidnan eläjiden lugu oli 4 831 ristitud, lidnankundan — 5 064 ristitud, rajonan kaks'toštkümnendez. Kaikiš suremb lidnan ristitišt oli 8 238 eläjad vl 1959. Vl 2017 kaik 4 542 ristitud elihe lidnas, 4 778 ristitud kaikes lidnankundas.

Ortodoksižen hristanuskondan ph. Mikulai-čudonsädajan jumalanpert' oli vll 1901−1961^[1], om sätud lidnas tošti vodele 2011.

Lähembaine professionaližen opendusen aluzkund om politehnine tehnikum^[2] rajonan lidnanvuiččes Selenginsk-žilos 75 kilometras pohjoižpäivnouzmha, läz rajonkeskust, toižed aluzkundad ratas lähembaižiš lidnoiš.

Edeline lidnan pämez' om Viktor Larüškin (2008 — reduku 2018).