Babuškin (Burätii)

Babuškin
Бабушкин (ven.)
Баабушкин хото (bur.)
	Lidnanznam;
Valdkund	Venäma
Eläjiden lugu (2024)	4,225 ristitud
Pind	9 km²
Pämez'	Ol'ga Plakida; (reduku 2023—)
Telefonkod	+7−30 138-xx-xxx
Avtokod	03
Aigvö	UTC+8 (MSK+5)

Babuškin (ven.: Ба́бушкин, burät.: Баабушкин хото) om Venäman lidn da lidnankund Burätijan Tazovaldkundan keskuzpalan päivlaskmas. Mülüb Kabanskan rajonha, sen üks'jäine lidn.

Istorii

Eländpunktan aluz om pandud vl 1760 kuti Posol'skii-jumalankodin Misovskii-žilo. Se sai lidnan statusad vl 1902, nimitihe Misovsk (ven.: Мы́совск). Vll 1925−1941 oli radnikžiloks, vspäi 1927 mülüb Burätijha. Vn 1941 18. päiväl vilukud sai lidnan statusad tošti udenke nimenke Ivan Babuškin-revolücioneran oiktastuseks (amptihe täs vl 1906).

Babuškin-lidn šingotase rel'soiden ühthekeitandtegimel, mecan jügutoitandal vagonoihe, turizman keskuseks Baikalanno.

Geografijan andmused

Lidn sijadase Baikalan suvirandal, 470 m ü.m.t. keskmäižel korktusel (13 m Baikalan pindan korktemb). Pen' Misovk-jogi (ven.: Мы́совка 11 km pitte) läbitab lidnad.

Matkad Kabansk-žilo-rajonkeskushesai om 66 km pohjoižpäivnouzmha orhal vai 73 km «Baikal»-avtotrassadme (R-258), Ulan Udehesai — 170 km päivnouzmha. Misovai-raudtestancii (ven.: Мысова́я) radab Transsibal vspäi 1900.

Klimat om ven. Voden keskmäine lämuz om +0,6 C°, kezakun-elokun +11,8..+15,8 C°, tal'vkun-keväz'kun −8,4..−15,0 C°. Ekstremumad oma −38,6 C° (uhoku) i +33,6 C° (heinku). Kezaaigan minimum om −1,8 C° (kezaku), tal'vaigan maksimum om +6,8 C° (uhoku). Ei voi panda halad heinkus-elokus. Paneb sadegid 576 mm vodes, enamba heinkus-elokus (102..109 mm kus), vähemba uhokus-keväz'kus (10..14 mm kus).

Tobmuz

Bojarskii-žilo raudtestancijanno (149 rist. vl 2010) i Manturih-žilo (84 rist. vl 2010) mülüdas lidnankundha Babuškinan ližaks. Lidnankundan pind — 1 718,57 km².

Lidnankundan tobmuden pämez' om sen Administracijan pämez'. Edeližed lidnan pämehed oma Leonid Seliverstov (reduku 2018 — reduku 2023), Viktor Larüškin (2008 — reduku 2018). Lidnan Deputatoiden nevondkundan ezimez' om Tamara Grigorjeva vn 2024 uhokuspäi. Edeline nevondkundan ezimez' om Jekaterina Averina, radoi vn 2024 uhokuhusai.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 4 831 ristitud, lidnankundan — 5 064 ristitud, rajonan kaks'toštkümnendez. Vn 2021 rahvahanlugemižen mödhe lidnan ristitišt oli 4 368 eläjad. Vl 2017 kaik 4 542 ristitud elihe lidnas, 4 778 ristitud kaikes lidnankundas. Kaikiš suremb lidnan ristitišt oli 8 238 eläjad vl 1959.

Ortodoksižen hristanuskondan ph. Mikulai-čudonsädajan jumalanpert' oli vll 1901−1961^[1], om sätud lidnas tošti vodele 2011.

Lapsiden opendusen aluzkundad oma üks' päivkodi, Misovajan keskškol nomer 56, lapsiden sädamižen pert'. Lähembaine professionaližen opendusen aluzkund om politehnine tehnikum^[2] rajonan lidnanvuiččes Selenginsk-žilos 75 kilometras pohjoižpäivnouzmha, läz rajonkeskust, toižed aluzkundad ratas lähembaižiš lidnoiš.