L'vov

L'vov
Львів

Lidnanznam	Flag
Valdkund	Ukrain
Eläjiden lugu (2018-01-01)	726,772 ristitud
Pind	182,01 km²
Pämez'	Andrei Sadovii (sulaku 2006—)
Telefonkod	+38−032
Aigvö	tal'vel UTC+2, kezal UTC+3

L'vovan ezilidnoidenke nägu Man kaimdajaspäi vn 2017 elokus

L'vov vai L'viv (ukr.: Львів, [lʲvʲiu̯], ven.: Львов, pol'š.: Lwów, saks.: Lemberg) om lidn Ukrainan päivlaskmas. Se om valdkundan seičemenz' lidn eläjiden lugun mödhe, L'vovan agjan administrativine keskuz.

Istorii

Eländpunktan aluz om pandud vl 1236. Se sai lidnan statusad 1356. Vozil 1349−1772 i 1919−1939 mülüi Pol'šanmaha. Vozil 1772−1914 lidn oli Avstrijan palaks i nimitihe Lemberg:aks. Vspäi 1944 om Ukrainan palaks (1944−1991 — Ukrainan NST NSTÜ:s).

Lidnan rahvahaline mülükund vajehtihe lujas Toižen mail'man sodan jäl'ghe: äi evrejalaižid oli riktud, äjad saksalaižed i pol'šanmalaižed sirdiba verhiže maihe, jäl'gmäižed Vroclavha tobjimalaz. Nevondkundaližil vozil äi edheotandoid oli sirttud L'vovha Ukrainan päivnouzmaspäi.

L'vovan ižandusen päsarakod oma sömtegimišt, transportmašinoiden sauvomine, himižed edheotandad, avtodetaliden tehmine, informacine autsorsing.

Geografijan andmused

Lidn sijadase Poltv-jogen alangištos (100 km pitte, ukr.: Полтва, Vislan bassein), 289 m ü.m.t. keskmäižel korktusel, korktused 405 metrhasai. Jogi om pandud manaluižhe lidnan keskuses 19. voz'sadaspäi. Matkad Pol'šanman röunhasai om 70 km lodeheze, Kijevhasai om 468 km päivnouzmha orhal, 524 km avtotedme vai raudtel.

L'vov jagase 6 administrativižhe rajonha. Sen ližaks, Vinniki-lidn i kaks' lidnanvuittušt žilod alištudas L'vov-lidnan nevondkundale.

Eläjad

Vl 2012 eläjiden lugu oli 729 842 ristitud. Kaikiš suremb ristitišt oli 818 780 eläjad vl 1989. Läz 1,2 mln ristituid elädas ezilidnoidenke.

Lidnan rahvahad (vn 2001 Ukrainan rahvahanlugemižen mödhe, enamba 0,4%, ozutadud rahvahuz): ukrainalaižed — 88,1%, venänikad — 8,9%, pol'šanmalaižed — 0,9%, vaugedvenälaižed — 0,4%, toižed rahvahad — 1,7%.

Transport

Avtobusad, tramvaid, trolleibusad da ezilidnelektrojonused oma kundaližeks transportaks lidnas.

Rahvahidenkeskeine L'vov-lendimport Danilo Galicalaine-kunigahan nimed (LWO, 1,6 mln passažiroid vl 2018) sijadase 6 km suvipäivlaskmha lidnan keskusespäi. Sišpäi tehtas reisid Evropadme, om čarterreisid Keskmeren lebutahoihe.

Irdkosketused

• L'vovan tobmuden oficialine sait (city-adm.lviv.ua). (ukr.)