Nevondkundaline Port

Nevondkundaline Port
Советская Гавань
Lidnanznam;	Flag;
Valdkund	Venäma
Eläjiden lugu (2023)	23,841 ristitud
Pind	69 km²
Pämez'	Dmitrii Čaika; (2023—)
Telefonkod	+7−42 138-xx-xxx
Avtokod	27
Aigvö	UTC+10 (MSK+7)

Nevondkundaline Port (ven.: Сове́тская Га́вань) om Venäman lidn da lidnankund Habarovskan randan suvipäivnouzmas. Se om Nevondkundaližen Portan rajonan administrativine keskuz.

Istorii

Eländpunktan aluz om pandud vl 1853 kuti Konstantinovskii-sodapost. Vozil 1856−1923 nimi oli Imperatorine Port (ven.: Императорская Гавань), vhesai 1930 nimitihe Znamenskoje-žiloks, sid' radnikžiloks nügüdläiženke nimenke. Radnikžilo sai lidnan statusad vn 1941 vilukun 18. päiväl. Vozil 1943−1945 saudihe Vanino-ližaportad merikaran vastrandal i raudted Komsomol'skaspäi Amural türmatud mehiden abul oigendamha sodavägid Japonijad vaste. Vspäi 1981 oli ümbrišton ühtenzoitusen planoid järedha lidnha, no azotihe niid NSTÜ:n čihodamižen jäl'ghe.

BAM-raudten lopstancii, ühtennimine lidnanke meriport radab lidnas (hilen varažomad, kalanpüdand, pumaterialan i kivivoin eksport, japonižiden avtoiden import). Nevondkundaline Port šingotase mecan ümbriradmižel da eksportal Japonijha i Kitaihe. Nevondkundaližen aigan laivoiden kohenduz (kaks' tegint) i kalan ümbriradmine otiba znamasišt sijad lidnan ižanduses, no vodele 2001 tuliba lophu. Verazmalaižed oma turizman aluz. Mägisuksiden trass radab ezilidnas.

Geografijan andmused

Lidn sijadase Tünen valdmeren Tataran sal'men päivlaskmaižel randal, 20 m ü.m.t. keskmäižel korktusel.

Matkad Habarovskhasai om 385 km päivlaskmha orhal vai 570 km avtotedme. Lähembaine lidn om Uglegorsk (Sahalin) 120 km päivnouzmha orhal sal'men kal't.

Klimat om ven mussonine, Edahaižen Päivnouzmman arvoimižihe tazostadud. Sumeg om paks mererandal. Voden keskmäine lämuz om +1,3 C°, kezakun +11,0 C°, heinkun-sügüz'kun +13,0..+17,0 C°, tal'vkun-uhokun −12,6..−15,6 C°. Ekstremumad oma −38,7 C° (tal'vku-uhoku) i +35,8 C° (eloku). Kezaaigan minimum om −3,0 C° (kezaku), tal'vaigan maksimum om +9,8 C° (uhoku, tal'vku). Ei voi panda halad elokus vaiše (minimum om +1,9 C°). Paneb sadegid 771 mm vodes, enamba heinkus-redukus (86..114 mm kus), vähemba vilukus-uhokus (26..28 mm kus). Meriveden keskmäine lämuz oleleb alemb mi nol' tal'vkus-keväz'kus, vajehtase +13,2..+15,5 C° röunoiš heinkus-sügüz'kus.

Tobmuz

Nevondkundaline Port om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan pämez' om Pavel Borovskii (2009−2022). Lidnan Deputatoiden nevondkundan ezimez' om Ol'ga Glebova vn 2018 sügüz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 27 712 ristitud, rajonan kaks' koumandest, vn 2021 — 24 231 ristitud. Kaik 24 671 eläjad oli lidnas vl 2017. Kaikiš suremb lidnan ristitišt oli 35 500 eläjad vl 1992.

Ortodoksižen hristanuskondan kaks' jumalanpertid^[1] oma saudud lidnas: ph. Feodor Ušakovan (2007−2012) i Phh. Pedroin da Pauloin (2009). Om protestantizman pühäpertid: seičemenden päivän adventistoiden lidnan keskuzpalas i baptizman loičendpert' Okoč-eländmassivas.

Lapsiden opendusen aluzkundad oma ühesa päivkodid, kuz' keskškolad (nomer 1, 2, 3, 5, 8, 9), korrekcine škol-internat, lapsiden sädamižen Pallada-keskuz, čomamahtoiden škol, ekologijan da tervehtamižen Utös-keskuz («kall'»), sportškol. Nevondkundaližen Portan tegimištoliž-tehnologine tehnikum^[2] om lidnan professionaližen opendusen aluzkundaks.