Nicc

Nicc
Nice
Lidnanznam;	Flag;
Valdkund	Francii
Eläjiden lugu (2021)	348,085 ristitud
Pind	71,92 km²
Pämez'	Kristian Estrozi; (2008−2016,; semendku 2017—,; fr. Christian Estrosi)
Telefonkod	+33-(0)493
Aigvö	tal'vel UTC+1,; kezal UTC+2

Nicc (franc.: Nice [nis], provansalin dialekt: Niça, grek.: Νίκαια Nikaia, ital.: Nizza [ˈnittsa], latin.: Nicaea) om lidn da kommun Francijan suvipäivnouzmas, Provans — Al'pad — Azur'ne rand-regionas. Se om valdkundan videnz' kommun eläjiden lugun mödhe, üks' populärižiš kurortižiš lidnoišpäi Francijas da mail'mas, järed meriport i transportsol'm. Lidn om Mererandaližed Al'pad-departamentan administrativižeks keskuseks, mülüb sihe.

Istorii

Eländpunktan aluz om pandud grekalaižil 4. voz'sadal EME, nimitihe vägestusen Nika-jumalnaižen mödhe. Vll 1388−1860 lidn oli alištunu Savoijan gercogkundan tobmudele päiči lühüdoiš aigkeskustoiš, sid' ühtištadihe gercogkundad Francijanke.

Nicc om kurortaks, šingotase lebuturizmal (5 mln matknikoid vodes, kahtenz' sija valdkundas adivpertiden mülündmäran mödhe), meriportal, sömtegimištol, parfüman i meblin tehmižel, tekstilin i elektrotehnikan pästandal, omblendedheotandoil. Änikoiden i ploduiden kazvatuz om ezilidnas.

Geografijan andmused

Lidn sijadase regionan päivnouzmas, departamentan suves, Keskmeren Azur'žel randal, 0..520 m korktusil, 10 m ü.m.t. keskmäižel korktusel. Nicc om ümbärtud Al'pad-mägil.

Matkad Italijan röunhasai om koumekümne kilometrad, Monakohosai — kaks'kümne kilometrad pohjoižpäivnouzmha, Parižhasai om 960 km lodeheze.

Klimat om Keskmeren, keza om räk da päivoikaz. Voden keskmäine lämuz om +16,3 C°, heinkun-elokun +24,1..+24,5 C°, tal'vkun-uhokun +9,5..+10,3 C°. Ekstremumad oma −7,2 C° (viluku) i +37,7 C° (eloku). Kezaaigan minimum om +8,1 C° (kezaku), tal'vaigan maksimum om +25,8 C° (uhoku). Voib olda haloid tal'vkus-keväz'kus vaiše, tal'vel voib panda lunt harvas. Paneb sadegid 791 mm vodes, enamba redukus-kül'mkus (128..138 mm kus), vähemba heinkus-elokus (14..17 mm kus). Meriveden lämuz vajehtase +13,0..+23,6 C° kuidme.

Tobmuz

Lidnan territorii jagase nell'toštkümneks valičendümbrikoks (äilugu franc.: circonscriptions législatives) vai ühesaks nomeruidud kantonaks (Nicc-1..9).

Eläjad

Vl 1962 kommunan eläjiden lugu oli 292,958 ristitud. Kaik 342,637 eläjad oli lidnas vl 2016. Läz 1 mln ristituid elädas kaikes lidnaglomeracijas (2016).

Azur'žen randan universitet^[1] (franc.: Université Côte d'Azur, 35 tuh. üläopenikoid) om lidnan üläopendusen aluzkundaks i tedoidusuden keskuseks, se om sätud vl 2019 Niccan Sofija-Antipolis universitetan sijas päpaloin (Université de Nice Sophia-Antipolis), kudamban aluz oli pandud vl 1965, Sofija-Antipolis om lähižen tehnologižen parkan nimi.

Transport

Avtobusad i tramvaid oma kundaližeks transportaks lidnas. Raudte i punolendimed ühtenzoittas Monakonke. Limpii-port (Lympia) om matknikoiden i jüguiden täht (cement), ühtenzoitase Korsikanke ehtatimel.

Rahvahidenkeskeine civiline «Nicc Azur'ne Rand»-lendimport^[2] (NCE / LFMN, franc.: Aéroport Nice Côte d'Azur, 14,1 mln passažiroid vl 2023, koumanz' sija valdkundas) sijadase kudes kilometras suvipäivlaskmha lidnan keskusespäi. Tehtas reisid Evropadme, Keskmeren lähižihe sarihe i päivnouzmaižihe randoihe, Tunisha i Marokho, Monrealihe, mugažo Francijadme, om äi sezonreisid.

Galerei

Lidnan tobmuden sauvuz (sulaku 2024)
Pühän Reparatan päjumalanpert' (riman katoline, om saudud vll 1650−1699), nägu vn 2009 tal'vkus
Azur'žen randan universitet, londusentedon fakul'tet (19. voz'sadan Val'roz-pert'kulu, tal'vku 2005)
Čomamahtoiden muzei (keväz'ku 2016)
Niccan meriport, sügüz'ku 2011
Nicc-Lidn-päraudtestancijan sauvuz vn 2011 heinkus