Patrad

Patrad
Πάτρα
	Lidnanznam;
Valdkund	Grekanma
Eläjiden lugu (2021)	173,600 ristitud
Pind	125,4 km²
Pämez'	Kostas Peletidis; (sügüz'ku 2014—,; Κώστας Πελετίδης)
Telefonkod	+30−261-xxx-xxx
Aigvö	tal'vel UTC+2,; kezal UTC+3

Patrad (grek.: Πάτρα [ˈpatra], amuižgrek.: Πάτραι) om lidn Grekanman päivlaskmas. Se om valdkundan koumanz' lidn eläjiden lugun mödhe, om Päivlaskmaine Grekanma-agjan administrativižeks keskuseks (vspäi 1987) da kaikiš surembaks lidnaks.

Istorii

Eländpunktan aluz om pandud ahejalaižil Spartaspäi 6. voz'sadal EME. Heiden Prevgen-vei ühtišti Aroi-, Mesatis- i Antii-lidnoid, nimiti ičeze Patrei-poigan oiktastuseks. Eli korktas aigas läbi Rimalaižes imperijas, tuli lanktushe 3. voz'sadan lopus, sen aigan lujan manrehkaidusen tagut nacein.

Patrad šingotasoiš meriportal, torguindal, logistikal i turizmal, karnaval oleskeleb uhokus. Üläopendusen keskuz: kaks' universitetad i tedoidusiden institut. Industrijan produktad tegimidenke ezilidnoiš oma cement, bumag, pumaterialad, sobad peniš edheotandoišpäi, Ideal Bikes-kompanijan velosipedad, Coca-Cola:n tegimen alkogolitomad jomad, olud, vinad, kalankazvatuz.

Geografijan andmused

Lidnan sijaduz agjas i valdkundas vn 2006 kartal

Lidn sijadase agjan keskuzpalan päivnouzmas, Peloponnes-pol'saren lodehližel mererandal, Ionižen meren süvän Patraikos-merilahten randal, 0..10 m ü.m.t. korktusil. Lähembaine mägi om Panahaikon (grek.: Παναχαϊκό) 1926 m ü.m.t. kortte.

Matkad Afinhasai om 177 km päivnouzmha orhal vai 215 km avtotedme.

Klimat om Keskmeren, keza om räk. Voden keskmäine lämuz om +19,3 C°, heinkun-elokun +27,4..+28,4 C°, kezakun i sügüz'kun +24,6..+24,8 C°, tal'vkun-keväz'kun +11,8..+13,7 C°. Ekstremumad oma −0,9 C° (uhoku) i +40,8 C° (heinku, eloku). Kezaaigan minimum om +15,0 C° (kezaku), tal'vaigan maksimum om +26,8 C° (tal'vku). Voib panda halad uhokus vaiše. Paneb sadegid 686 mm vodes, enamba kül'mkus-vilukus (108..116 mm kus), kuiv sezon oleskeleb semendkus-elokus (5..22 mm kus). Tal'vaigan lumenlanktend om harv lujas lähižiden mägipautkiden erineden.

Eläjad

Vn 2011 Grekanman rahvahanlugemižen mödhe lidnan eläjiden lugu oli 167,446 ristitud, vl 2001 — 168,530 ristitud. Kaikiš suremb lidnan ristitišt om nügüd'. Kaik 213,984 ristitud elihe Patran municipalitetas 335 km² pindal vl 2011. Läz 315 tuhad eläjid om lidnaglomeracijas 2928,7 km² pindal (2011), agjan pol'.

Galerei

Lidnan tobmuden sauvuz (2007)
Ph. Ondrijan Ezikuctud päjumalanpert' (lidnan kaičijan, letihe vll 1908−1974, ortodoksine hristanuskond), vn 2006 nägu
Pühän Jumalanmaman Girokomeiolaižen mez'jumalankodi (nüg. om saudud vll 1833−1836, ortodoksine hristanuskond), vn 2008 nägu
Tatanmaižen farmaceftižen Vianex-kompanijan tegim D lidnan tegimištzonas vl 2019
Sportpert'kulu Dimitrios Tofalosan nimed (vn 2006 olend)
Lidnan port vl 2009
Patrad-päraudtestancii vl 2007

Irdkosketused

Lidnan da sen municipalitetan oficialine sait (e-patras.gr). (grek.) (angl.)

Patrad Vikiaitas