Sur' Rostov

Sur' Rostov
Ростов Великий
Lidnanznam;	Flag;
Valdkund	Venäma
Eläjiden lugu (2024)	27,298 ristitud
Pind	32,01 km²
Pämez'	Sergei Tihomirov; (tal'vku 2022—)
Telefonkod	+7−48 536-xx-xxx
Avtokod	76
Aigvö	UTC+3 (MSK+0)

Sur' Rostov (ven.: Росто́в Вели́кий), edel vn 2025 zavodindad muite Rostov (ven.: Росто́в), om Venäman lidn da lidnankund Jaroslavlin agjan suves. Se om agjan kudenz' lidn eläjiden lugun mödhe, Rostovan rajonan administrativine keskuz.

Rostov mülüb turizman tetabha «Kuldaine rengaz»-maršrutha.

Istorii

Eländpunkt mainitase ezmäižen kerdan vl 862 lidnan statusanke, nece voz' lugese alusenpanendan oficialižeks vodeks. Se sijazihe merälaižiden tahondas i oli Saran lidnuden ezilidnaks, lidnut oli olmas Neron suvirandpolel 7-11. voz'sadoil. Vll 1207−1474 oli Rostovan kunigahusen pälidnaks. Kivižen Rostovan Kremlin seinäd oma saudud vll 1670−1683, siš om 11 čuhundust. Vl 1777 Rostov sai makundan lidnan statusad.

Sur' Rostov šingotase mašiništonsauvomižel (cisternad, öližen nägendan sodaladimed^[1]), zelliden substancijoiden tedotehmižkompleksal (vspäi 2019) i farmaceftižel fabrikal, iknoiden tegimel, sömtegimištol (lihakombinat, kofecikorijan tegim, maidon edheotand, vasan tehmine, tabaktegesed), finiftin da keramikan pästandal i turizmal (572 tuh. matknikoid vl 2019).

Geografijan andmused

Lidn sijadase rajonan keskuzpalan pohjoižes, Nero-järven lodehižel randal (54 km², Volgan oigedpol'ne bassein), 100 m ü.m.t. keskmäižel korktusel.

Matkad Jaroslavlihesai om vižkümne viž kilometrad pohjoižhe-pohjoižpäivnouzmha orhal, 60 km avtol vai raudtel. Lähembaine lidn om Gavrilov Jam 29 km pohjoižpäivnouzmha orhal, 45 km avtotedme vai 35 km raudtedme.

Tobmuz

Sur' Rostov om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline Administracijan pämez' om Andrei Los' (reduku 2017 — tal'vku 2022). Lidnan Municipaližen nevondkundan ezimez' om Svetlana Kičkova vn 2017 redukuspäi. Edeline nevondkundan ezimez' om Aleksei Gavrilov, radoi vn 2017 redukuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 31 792 ristitud, rajonan pol', vn 2021 — 28 122 ristitud. Kaik 31 039 eläjad oli lidnas vl 2017. Kaikiš suremb lidnan ristitišt oli 35..36 tuhad eläjid vll 1989−2001 (36 600 rist. vl 1996).

Ortodoksižen hristanuskondan koumekümne kaks' pühäpertid^[2] oma kaičenus lidnas: Emäganpäivän päjumalanpert' da koume jumalanpertid Rostovan Kremliš, kaks' naižjumalankodid i üks' mez'jumalankodi, Sündun Voznesenjan pühäpert' om avaitud. Niiden ližaks üks'toštkümne jumalanpertid i phh. Petran da Pavlan päjumalanpert' ei ole kaičenus.

Openduz

Lapsiden opendusen aluzkundad oma kaks'toštkümne nimitadud i nomeruidud päivkodid (nomer 1..3, 7, 8, 13..15, 17, 20, 22, 23), koume keskškolad (nomer 2, 3, 4), municipaline gimnazii A. L. Kekinan nimed, rajonan kul'turan i rahvahansädamižen keskuz, školanirdpol'žen radon keskuz, čomamahtoiden škol V. N. Gorodovskajan nimed, lidnan sportškol.

Rostovan saraktehnologijoiden kolledž^[3] i Rostovan pedagogine kolledž^[4] oma lidnan professionaližen opendusen aluzkundoikš.

Galerei

Lidnan administracijan sauvuz vl 2017
Rostovan Kreml', vn 2019 nägu
Gimnazii A. Kekinan nimed vl 2018
«Moskovskii Trakt»-adivpert' (2009)
Rostov Jaroslavskii-raudtestancijan sauvuz vl 2015

Homaičendad

Irdkosketused

Sur' Rostov Vikiaitas

	Jaroslavlin agjan lidnad
	Danilov \| Gavrilov Jam \| Jaroslavl' \| Lübim \| Miškin \| Pereslavl' Zalesskii \| Pošehonje \| Ribinsk \| Sur' Rostov \| Tutajev \| Uglič

[1] Rostovan optiž-mehanižen tegimen sait (romz.ru). (ven.)

[2] Suren Rostovan pühäpertid sobory.ru-saital. (ven.)

[3] Rostovan saraktehnologijoiden kolledžan sait (rc-it.edu.yar.ru). (ven.)

[4] Rostovan pedagogižen kolledžan sait (rostov-pc.edu.yar.ru). (ven.)

[1]

[2]

[3]

[4]