Gavrilov Jam

Vikipedii
Jump to navigation Jump to search
Gavrilov Jam
Гаврилов-Ям
 Lidnanznam
Coat of Arms of Gavrilov-Yam (Yaroslavl oblast).svg
 Flag
Flag of Gavrilov-Yam (Yaroslavl oblast).svg
Valdkund Venäma
Eläjiden lugu (2017) 17 351 ristitud
Pind 11,29 km²
Gavrilov Jam Гаврилов-Ям
Pämez' Aleksandr Toššigin
(sügüz'ku 2 014—)
Telefonkod +7-48 534-xx-xxx
Avtokod 76
Aigvö UTC+3 (MSK+0)


Gavrilov Jam (ven.: Гаврилов-Ям) om Venäman lidn da lidnankund Jaroslavlin agjan suvipäivnouzmas. Se om Gavrilov Jaman rajonan administrativine keskuz.

Istorii[redaktiruida | redaktiruida purde]

Eländpunkt mainitase ezmäižen kerdan vl 1545 Varnican mez'jumalankodin (Sur' Rostov) nimikirjuteses kuti Vor (Gavrilovo)-külä (ven.: деревня Вора, Гаврилово тож). Vl 1580 mainitase Ivan Grazijan käskös kuti Gavrilovskii Jam-külä, sid' oli Gavrilov Jamskai slabad (ven.: Гаврилов-Ямская слобода). Kätihe žiloks nügüdläiženke nimenke jumalanpertin sauvondan jäl'ghe 18. voz'sadan lopus.

1870-nzil vozil sijaline Aleksei Lokalov-torgovan sädi tekstilinedheotandad žilos, i se šingotaškanzi «Jaroslavl' — Ivanovo»-tel. Panihe žilod lidnanvuiččeks vn 1922 elokus. Anttihe radnikžilole lidnan statusad vn 1938 26. päiväl tal'vkud. Vhesai 2003 pöl'vhankombinat radoi.

Gavrilov Jam šingotase mašiništonsauvomižen «Agat»-tegimel (motoblokad, palad avia- i avtotehnikan täht, kangazramaižed konstrukcijad), mujuiden tegimel i leibänedheotandal, turizmal.

Geografijan andmused[redaktiruida | redaktiruida purde]

Lidn sijadase Kotorosl'-jogen oiktal randal tobjimalaz (126 km pitte, Volgan oiged ližajogi), 92 m ü.m.t. keskmäižel korktusel. Kotoroslin pen' oiged Bočevk-ližajogi (ven.: Бочевка) läbitab lidnan keskust, pen' uit om saudud sil. Matkad Jaroslavlihesai om 36 km pohjoižhe orhal, 44 km avtol vai 70 km raudtel. Lähembaine lidn om Sur' Rostov 29 km suvipäivlaskmha orhal, 45 km avtotedme vai 35 km raudtedme. Raudtesarak lopiše Gavrilov Jamas, se om Semibratovo-stancijaspäi i 20 km pitte, kävutadas vaiše vemha jüguid vspäi 2003.

Gavrilov Jam om lidnankundan üks'jäine eländpunkt.

Eläjad[redaktiruida | redaktiruida purde]

Vn 2010 Venäman rahvahanlugemižen mödhe lidnan eläjiden lugu oli 17 791 ristitud, rajonan kaks' koumandest. Kaikiš suremb lidnan ristitišt oli 20..21 tuhad eläjid vll 1959−1998 (21 353 rist. vl 1989). Ortodoksižen hristanuskondan ph. Mikulai-čudonsädajan jumalanpert' om saudud vl 1798, se om avaitud i udessündutamižes. Pühän Jumalanmaman sündundan jumalanpertin (1782) vaiše jändused oma olmas.

Gavrilov Jaman politehnine kolledž[1] om professionaližen opendusen aluzkundaks.

Homaičendad[redaktiruida | redaktiruida purde]

  1. Gavrilov Jaman politehnižen kolledžan sait (pl17yar.ru). (ven.)

Irdkosketused[redaktiruida | redaktiruida purde]



Jaroslavlin agjan lidnad
Danilov | Gavrilov Jam | Jaroslavl' | Lübim | Miškin | Pereslavl' Zalesskii | Pošehonje | Ribinsk | Sur' Rostov | Tutajev | Uglič