Tutajev

Tutajev
Тутаев

Lidnanznam	Flag
Valdkund	Venäma
Eläjiden lugu (2017)	40,441 ristitud
Pind	25,47 km²
Pämez'	Sergei Jeršov (2007—)
Telefonkod	+7−48 533-xx-xxx
Avtokod	76
Aigvö	UTC+3 (MSK+0)

Tutajev (ven.: Тутаев) om Venäman lidn da lidnankund Jaroslavlin agjan keskuzpalan pohjoižpäivnouzmas. Se om agjan koumanz' lidn eläjiden lugun mödhe, Tutajevan rajonan administrativine keskuz, mülüb Venäman istorižiden eländpunktoiden nimikirjuteshe.

Istorii

Eländpunktan aluz om pandud Volgan oiktal randal pagenuzil Jaroslavlišpäi vn 1238 mongoližen londan jäl'ghe kuti Borisoglebskai slabad, i 13. voz'sadan kahtendel polel kuti Romanov-lidn Volgan hural randal, om nimitadud ugličulaižen Roman Vladimirovič-ruhtinasen nimen mödhe. Vspäi 1345 15. voz'sadan augotišhesai erine Romanovan ruhtinazkund oli olmas. Vl 1563 sirtihe totarlaižid Romanov-lidnha hristianizacijan ramuziš Ivan Grazijan käskön mödhe. Vspäi 1761 sirtihe heid Kostroman alle i rušihe saudud mečetid, no kazvatadas sijališt romanovišt lambhiden sugud tähäsai.

Vl 1777 Borisoglebskai slabad kändihe Borisoglebsk-lidnaks, Romanov i Borisoglebsk saiba makundoiden lidnoiden statusad. Vl 1822 ühtenzoittihe lidnoid da anttihe Romanov-Borisoglebsk-nimed. Vs 1918 tal'vkun 9. päiväspäi lidn om olmas Tutajev-nimenke Rusttan armijan Il'ja Tutajev-rivičun (1896−1918) kanzannimen mödhe, hän pölištui Jaroslavlin vasthalibundan kačustelendan aigan. Nügüd'aigan lidnan hurapol'ne pala nimitaze Romanovan, oigedpol'ne — Borisoglebskan.

Tutajev šingotase dizel'likutimtegimel, pölvhankombinatal, sömtegimištol (sagud, kolbas, lihaproduktad) i turizmal.

Geografijan andmused

Lidn sijadase Volgan (Gor'kijan vezivaradimen) molembil randoil, kukhikahas tahondas, 130 m ü.m.t. keskmäižel korktusel. Voib sadas Volgan toižhe randha ehtatimel, lähembaine sild joges päliči om Jaroslavliš. Matkad lähembaižen Jaroslavl'-lidnan röunhasai om 25 km suvipäivnouzmha orhal, avtol vai Volgadme, keskushesai — 35 km. Toine järed lähine lidn om Ribinsk 45 km lodeheze avtotedme vai Volgan ülezjogen.

Lidn om lidnankundan üks'jäine eländpunkt.

Eläjad

Vn 2010 Venäman rahvahanlugemižen mödhe lidnan eläjiden lugu oli 41 005 ristitud, rajonan seičeme kümnendest. Kaikiš suremb ristitišt oli enamba 45 tuhad eläjid vll 1996−2001 (45 700 rist. vl 1996). Ortodoksižen hristanuskondan Sündun Eläbzdusen i Ristan Zdviženjan päjumalanpertid, dai seičeme jumalanpertid oma olmas lidnas.

Tutajevan politehnine tehnikum i Ribinskan aviatehnižen universitetan filial oma professionaližen opendusen aluzkundoikš.

Galerei

• 

  Monument Tolbuhin-maršalan muštoks (2019)

• 

  Sündun Eläbzdusen päjumalanpertin ansambl', vn 2018 nägu

• 

  Tutajevan likutimtegimen sauvomine 1980-nzil vozil

• 

  «NSTÜ»-puišt lidnan istorižes keskuses vl 2014

• 

  Keskškol nomer 3, vn 2012 nägu

Irdkosketused

• Lidnankundan tobmuden aluzkundoiden oficialine sait (агп-тутаев.рф). (ven.)