Uglič

Uglič
Углич

Lidnanznam	Flag
Valdkund	Venäma
Eläjiden lugu (2021)	32,719 ristitud
Pind	26,6 km²
Pämez'	Ol'ga Rodomakina (kezaku 2023—)
Telefonkod	+7−48 532-xx-xxx
Avtokod	76
Aigvö	UTC+3 (MSK+0)

Uglič (ven.: У́глич) om Venäman lidn da lidnankund Jaroslavlin agjan päivlaskmas. Se om Ugličun rajonan administrativine keskuz, mülüb rajonha vspäi 2005.

Istorii

Ezmäižed eländpunktad oliba lidnan sijas meiden eran augotišespäi. Nügüdläine lidn mainitase ezmäižen kerdan vl 1148 kuti Ugleče pöud (ven.: Углече поле), 13. voz'sadaspäi — muite Uglič. Vll 1216−1285 oli ripmatoman Ugličun ruhtinazkundan pälidnaks. Vll 1285−1320 ruhtinaz alištui Rostovan tobmudele, vspäi 1389 — Moskvan tobmudele. Tühjitadihe ruhtinazkundad vl 1605, jäl'gmäižel Venämas. Ruhtinasen pert'kulu om kaičenus tähäsai (15. voz'sadan sauvuz), jäi üks'jäine mugoine valdkundas. Ugličun Kremlin pühäpertid oma kaičenus hüvin mugažo, rušihe Kremlin seinid 19. voz'sadan augotišes.

Vll 1719−1775 lidn oli Ugličun agjan (provincijan) keskuseks. Uglič sai Jaroslavlin agjan (gubernijan) makundan lidnan statusad vl 1777. Vll 1935−1950 Ugličun gidroelektrostancii om saudud. Ugličun vezivaradim om täuttud vl 1939. Vspäi 1940 Uglič-raudtestancii om 48-kilometrižen sarakon Kaläzinaspäi (Tverin agj) lopstancii. Suren sodan aigan lidn ei olend okkupacijan zonas.

Uglič šingotase časuiden tegimel, metalližpaloiden tehmižel, söm- i energomašiništon tegimil, elektrokabeliden da veimiden pästandal, plastiktegesil (šlangad, septikad), sömtegimištol (sagud i maidproduktad, leibtegesed, mineraline vezi), jogiportal i turizmal (16 muzejad, ühesa adivpertid, tal'ven, velo- i fotografijan festivalid), mugažo mebel'fabrik i meckombinat ratas lidnas.

Geografijan andmused

Lidn sijadase Volgan oiktal randal tobjimalaz, 120 m ü.m.t. keskmäižel korktusel. Avtotesild ühtenzoitab Volgan randoid GES:an padoseinädme. Ugličun hurarandpol'ne pala seižub Volgan huran Korožečn-ližajogen (ven.: Корожечна) oiktal randal mugažo.

Matkad Jaroslavlihesai om 93 km päivnouzmha orhal, 113 km avtol vai 300 km raudtel. Lähembaine lidn om Miškin 30 km pohjoižhe orhal vai 38 km avtotedme.

Tobmuz

Uglič om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan pämez' om Svetlana Stavickaja (viluku 2015 — kezaku 2023). Municipaližen nevondkundan ezimez' om Irina Kapralova vn 2022 kül'mkuspäi. Edeline nevondkundan ezimez' om Lübov' Dgebuadze (reduku 2017 — kül'mku 2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 34 507 ristitud, rajonan seičeme kümnendest, vn 2021 — 32 719 ristitud. Kaik 32 146 eläjad oli lidnas vl 2017. Kaikiš suremb lidnan ristitišt oli enamba 39 tuhad eläjid vll 1979−1992 (39 975 rist. vl 1989).

Rahvahad (enamba 0,4 % vl 2021): venälaižed — 91,3 %, ukrainalaižed — 0,4 %, toižed rahvahad — 1,4 %, rahvahuden ozutandata — 6,9 %.

Ortodoksižen hristanuskondan koume jumalankodid, kaks' päjumalanpertid, kuz' jumalanpertid i viž časounäd oma kaičenus i saudud lidnas.

Kaks' Ugličun kolledžad oma lidnan professionaližen opendusen aluzkundoikš: agrariž-politehnine i industrialiž-pedagogine. Venäman argvoin da saguden tehmižen tedoinstitut sijadase lidnas.

Galerei

• 
  Rajonan administracijan sauvuz (2015, ende Evrejinovad-torgovanoiden pert')
• 
  Ugličun Kremlin pühäpertid, vn 2011 nägu
• 
  Ugličun GES vl 2008
• 
  «Moskva»-adivpert' (Moskv, 2007)
• 
  Uglič-raudtestancijan sauvuz vl 2009

Irdkosketused

• Lidnankundan tobmuden aluzkundoiden oficialine sait (goroduglich.ru). (ven.)
• Lidnan informacine sait (uglich-online.ru). (ven.)
• Lidnan turizman sait (uglichvisit.ru). (ven.)