Edirne

**Edirne**
Valdkund	Turkanma
Eläjiden lugu (2022)	180,002 ristitud
Pind	844 km²
Pämez'	Redžep Gürkan; (keväz'ku 2014—,; Recep Gürkan)
Telefonkod	+90-(0)284
Avtokod	22
Aigvö	UTC+3

Edirne (mugažo turkan kelel, virktas [e'diɾne], Adrian-nimen vajehtadud form), ende mugažo Adrianopol' (grek.: Αδριανούπολη Adrianoupoli, bolg.: Одрин) om lidn Turkanman i sen evropižen palan lodehes. Lidn om Edirnen agjan administrativižeks keskuseks da palaks.

Istorii

Eländpunktan aluz om pandud rimalaižel Adrian-imperatoral (117−138) Uskudam-žilon sijas (Uskudama). Se žilo oli frakijalaižiden Odrissan car'kundan cariden ühteks rezidencijoišpäi, valdkund oli olmas 5. voz'sadaspäi EME.

Turkad-osmanad anastiba lidnad vl 1362, se sai Edrenebol-nimitust i oli Osmanan imperijan pälidnaks vll 1365−1453. Sil aigal lidnan ristitišt saihe 105 tuhazesai, sid' poleni kaks' koumandest.

Edirne šingotase tekstil'tegimištol, torguindal lähižidenke valdkundoidenke, om maižanduzrajonan keskuseks (kukuruz, sahar, vinmarj, podsolnušnik, ris, tomatad, arbuzad da dinäd). Lidn om üläopendusen znamasižeks keskuseks.

Geografijan andmused

Lidn sijadase agjan pohjoižpalan keskuses, 42 m ü.m.t. keskmäižel korktusel, Grekanman röunanno.

Matkad Bolgarijan röunhasai om kaks'kümne kilometrad lodeheze-pohjoižhe, Stambulhasai om 235 km päivnouzmha.

Klimat om subtropine Keskmeren räkanke kezanke, paneb lunt tal'vel paksus (14 päiväs). Keza om päivoikaz lujas, tal'vaig om pil'vekaz lujas. Voden keskmäine lämuz om +14,2 C°, heinkun-elokun +25,3..+25,4 C°, kezakun +22,9 C°, sügüz'kun +20,6 C°, tal'vkun-uhokun +2,8..+4,8 C°. Ekstremumad oma −19,5 C° (viluku, uhoku) i +44,1 C° (heinku). Kezaaigan minimum om +6,0 C° (kezaku), tal'vaigan maksimum om +24,5 C° (uhoku). Ei voi panda halad semendkus-sügüz'kus (sügüz'kun minimum om +0,2 C°). Paneb sadegid 625 mm vodes, kuidme läz tazomäras, enamba redukus-vilukus (66..70 mm kus), minimum oleskeleb elokus (24 mm). Kun keskmäine relätivine nepsuz vajehtase 56..63 % röunoiš kezakus-sügüz'kus, 77..83 % kül'mkus-uhokus.

Lidn kogoneb kaks'kümnes nelläs nimitadud fartalaspäi.

Eläjad

Vl 2010 lidnan ristitišt oli 152 993 eläjad, agjan kaks' videndest. Kaik 165 979 eläjad oli lidnas vl 2014. Kaikiš suremb lidnan ristitišt om nügüd'.

Galerei

Lidnan tobmuden sauvuz (reduku 2014)
Selimije-mečet' (om saudud vll 1569−1575), vn 2006 nägu
Frakijan universitet (Trakya Üniversitesi) vl 2011: rektorat i konferenciikeskuz
Edirne-päraudtestancijan sauvuz vl 2016