Bui (lidn)

Bui
Буй
Lidnanznam;	Flag;
Valdkund	Venäma
Eläjiden lugu (2021)	20,564 ristitud
Pind	21,2 km²
Pämez'	Igor' Ral'nikov; (reduku 2015—)
Telefonkod	+7−49 435-xx-xxx
Avtokod	44
Aigvö	UTC+3 (MSK+0)

Bui (ven.: Буй) om Venäman lidn da lidnümbrik Kostroman agjan lodehes. Se om Buin rajonan administrativižeks keskuseks mugažo, ei mülü rajonha.

Istorii

Eländpunkt mainitase ezmäižen kerdan vl 1536 sijaližiden volostiden eläjiden kirjutadud pakičendas kunigahale samha laskendad panda lidnad. Lidnuz oli saudud. Vspäi 1778 Bui-lidn oli makundan keskuseks. Vll 1905−1906 saudihe raudtestancijad, vedimdepod i kaks' raudted, Bui kändihe raudtesol'meks ühtes vodes (čuradused: Vologd, Danilov, Galič). Vll 1979−1990 Keskuzližen (Kostroman) AES:an sauvomine zavodihe läz lidnad. Stancii om kesken tehmatoi, elektroverkon jagamižkeskuz radab siš, sauvondan jätktuz planiruiše no ei mäne.

Bui šingotase mecan ümbriradmižel, himižel tegimel^[1] (mineraližed heretused i turbhan ümbriradmine), sömtegimištol (lihakombinat, paštandsijad), Pohjoižen raudten edheotandoil, mugažo omblendan i meblin fabrikad ratas lidnas.

Geografijan andmused

Lidnan sijaduz ümbärdajas rajonas i agjas vn 2006 kartal

Lidn sijadase Kostrom-jogen hural randal läz Vöks-ližajogen lanktendan sijad (ven.: Вёкса), 100 m ü.m.t. keskmäižel korktusel.

Matkad Kostrom-lidnhasai om 87 km suvipäivlaskmha orhal, 103 km avtotedme vai 165 km raudtedme. Lähembaine lidn om Galič nell'kümnes kilometras päivnouzmha avtotedme vai raudtedme.

Tobmuz

Lidn om lidnümbrikon üks'jäižeks eländpunktaks. Om ümbärtud Buin rajonan territorijal kaikiš polišpäi.

Lidnümbrikon pämez' om sen Administracijan pämez' vn 2020 redukuspäi, ende Duman ezimez' radoi lidnümbrikon pämehen. Edeline lidnümbrikon pämez' (Duman ezimez') om Valerii Katišev (reduku 2010 — reduku 2020). Lidnümbrikon Duman ezimez' om Ol'ga Fel'ker vn 2020 redukuspäi. Edeline lidnan Administracijan pämez' om Vladimir Voronin (1991−2010).

Eläjad

Vn 2010 Venäman rahvahanlugemižen mödhe lidnan eläjiden lugu oli 25 763 ristitud, vn 2021 — 20 564 ristitud. Kaik 24 011 ristitud elihe lidnas vl 2017. Kaikiš suremb lidnan ristitišt oli 32 800 eläjad vl 1992 i 27 221 eläjad vl 1959.

Rahvahad (enamba 0,4 % vl 2020): venälaižed — 92,9 %, ukrainalaižed — 0,4 %, toižed rahvahad — 2,5 %, rahvahuden ozutandata — 4,2 %.

Ortodoksižen hristanuskondan nell' pühäpertid^[2] oma kaičenus i saudud lidnas: Pühän Jumalanmaman Blagoveššenjan päjumalanpert' (om saudud vl 1810), kaks' jumalanpertid i Paraskeva Pätniččan časoun' (udessündutadud).

Lapsiden opendusen aluzkundad oma seičeme päivkodid (nomerad 1, 3, 5, 6, 7, 15, 117), viž keskškolad (nomer 1, 2, 9, 13, 37), augotižškol nomer 5, lapsiden sädamižen pert', sportškol. Lidnan professionaližen opendusen aluzkundad oma Buin lidnansauvomižen da edheotaikundan tehnikum^[3] (edel 2012. vot — maižanduztehnikum), Buin raudtetransportan tehnikum^[4] i Agjan Buin čomamahtoiden kolledž^[5].

Galerei

Revolücijan torg (2011)
Pühän Jumalanmaman Blagoveššenjan päjumalanpert', vn 2016 nägu
Socialiž-kul'turine «Luč»-keskuz vl 2014 (Sädeg)
Lapsiden čomamahtoine škol (2016, ende V. Sipägin-leitnantjenaralan pert')
Bui-päraudtestancijan sauvuz ph. Mikulai-čudonsädajan jumalanpertinke, vn 2009 nägu
Buin lidnansauvomižen da edheotaikundan tehnikum vl 2012 (edel 2012. vot — maižanduztehnikum)