Čuhlom

Čuhlom
Чухлома
Lidnanznam;	Flag;
Valdkund	Venäma
Eläjiden lugu (2021)	4,252 ristitud
Pämez'	Aleksandr Lebedev; (reduku 2022—)
Telefonkod	+7−49 441-xx-xxx
Avtokod	44
Aigvö	UTC+3 (MSK+0)

Čuhlom (ven.: Чу́хлома vai Чухломá) om Venäman lidn da lidnankund Kostroman agjan lodehes. Se om Čuhloman rajonan administrativine keskuz.

Istorii[vajehta | vajehtada lähte]

Edeline žilo oli olmas Čuhlomanjärven pohjoižel randal 10. voz'sadas. Nügüdläine eländpunkt mainitase ezmäižen kerdan vl 1381 kuti lidn järven suvirandal Merän Galičun ruhtinazkundas. Puine lidnuz päjumalanpertinke oliba olmas 16. voz'sadaspäi vn 1727 lämoipalohosai.

Čuhlom šingotase mecan ümbriradmižel, pertiden strubiden tehmižel.

Geografijan andmused[vajehta | vajehtada lähte]

Lidn sijadase rajonan suvipäivlaskmas, Čuhlomanjärven suvipäivnouzmaižel randal, 180 m ü.m.t. keskmäižel korktusel. Pen' Ivanovk-jogi (ven.: Ивановка) läbitab lidnad i lankteb järvhe. Matk Kostrom-lidnhasai om 150 km suvipäivlaskmha orhal vai 170 km avtotedme pidust' Galičun ülüt. Lähembaižed lidnad oma Galič 46 km suvhe orhal vai 50 km avtotedme i Soligalič 42 km lodeheze orhal vai 48 km avtotedme.

Lidn om lidnankundan üks'jäižeks eländpunktaks. Lidnankundan pind — 57,9 km². Kaik om 49 irdad i nell' kujod lidnas.

Eläjad[vajehta | vajehtada lähte]

Vn 2010 Venäman rahvahanlugemižen mödhe eläjiden lugu oli 5 411 ristitud, rajonan pol'. Kaik 5 054 eläjad oli lidnas vl 2017. Kaikiš suremb lidnan ristitišt oli 5,5..5,6 tuhad eläjid vll 1989−2009.

Rahvahad (enamba 0,4 % vl 2020): venälaižed — 96,1 %, ukrainalaižed — 0,4 %, toižed rahvahad — 2,3 %, rahvahuden ozutandata — 1,2 %.

Ortodoksižen hristanuskondan kaks' jumalanpertid^[1] oma kaičenus lidnas: Pühän Jumalanmaman Emäganpäivän (om saudud vl 1730, om avaitud) i Spasan Toižetamižen (letihe läz 1746. vot, ei ole väges). Niiden ližaks Kazanin Jumalanmaman (1804−1934) jumalanpert' i Paraskeva Pätniččan časoun' (1815−1924) ei ole kaičenus.

Čuhloman mectegimišton tehnikum^[2] om lidnan professionaližen opendusen aluzkundaks, sijadase Anfimovo-žilos kaks' kilometrad suvhe lidnaspäi.

Lidnankundan pämez' om sen Administracijan pämez'. Edeline lidnan pämez' om Marina Guseva (sügüz'ku 2017 — reduku 2022). Lidnankundan Deputatoiden nevondkundan ezimez' om Ol'ga Švedova vn 2021 redukuspäi.