Manturovo

Manturovo
Мантурово
Lidnanznam;	Flag;
Valdkund	Venäma
Eläjiden lugu (2020)	14,988 ristitud
Pind	16 km²
Pämez'	Igor' Ustüžanin; (keväz'ku 2021—,; Игорь Устюжанин)
Telefonkod	+7−49 446-xx-xxx
Avtokod	44
Aigvö	UTC+3 (MSK+0)

Manturovo (ven.: Ма́нтурово) om Venäman lidn da lidnümbrik Kostroman agjan keskuzpalan päivnouzmas. Se om Manturovon rajonan administrativižeks keskuseks mugažo, ei mülü sihe.

Istorii

Eländpunkt mainitase vl 1617 kuti külä. Se oli peneks küläks hätken, no vspäi 1870 Kologrivan makundan suim päti kerata torgust külän agjas joga nedalil i Nikol'skai-jarmankad kerdan vodes. Vspäi 1906 «Vologd — Vätk»-raudtekeskust radaškanzi külänno, saudihe nell' mecpilindtegint edel Oktäbrin revolücijad, järed vugonk mäni Unž-jogedme. Nened eländpunktad ühtištuihe külänke: bajarišton koume usadibad, Nikolo-Mokrovskoje-žilo (valdmoidenke), Berežki-külä.

Vspäi 1929 Manturovo om rajonan keskuseks, kätihe radnikžiloks sil-žo vodel. Se sai lidnan statusad vl 1958, ühtenzoittihe Jurovskii-radnikžilonke fanerantegimenno. Lidn lainzi amuist Gradilevo-žilod (1962), Rečkovo-, Vešnäkovo- i Žarihino-külid (1966).

Manturovo šingotase mecan ümbriradmižel (faneran kombinat, mecpilindan 22 edheotandad), medicinižel^[1] tegimištol (koume edheotandad), sömtegimištol (mineralveded, lihaproduktad, sagud).

Geografijan andmused

Lidn sijadase Unž-jogen oiktal randal, 120 m ü.m.t. keskmäižel korktusel. Matkad agjan Kostrom-pälidnhasai om 234 km päivlaskmha-suvipäivlaskmha orhal, 262 km avtotedme vai raudtedme. Lähembaižed lidnad oma Šarj 40 km päivnouzmha orhal, 53 km avtotedme vai raudtedme, i Nei 51 km päivlaskmha orhal i 61 km avtotedme vai Transsib-raudtedme.

Manturovo om lidnümbrikon üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 17 479 ristitud. Kaikiš suremb lidnan ristitišt oli 21..22 tuhad eläjid vll 1970−1998 (22 574 rist. vl 1979). Vl 2017 kaik 15 619 ristitud elihe lidnas.

Ortodoksižen hristanuskondan kaks' jumalanpertid^[2] oma avaitud lidnas: ph. Mikulai-čudonsädajan (1836) i Jumalanmaman «Kaiken caric»-jumalaižen (letihe vll 2014−2016).

Manturovon politehnine tehnikum^[3] om lidnan professionaližen opendusen aluzkundaks.

Edeline lidnümbrikon pämez' (Administracijan pämez') om Aleksei Smirnov (heinku 2018 — viluku 2021). Lidnümbrikon Duman ezimez' om Aleksandr Makarov vn 2018 kül'mkuspäi.