Gavrilov Jam

Gavrilov Jam
Гаврилов-Ям
Lidnanznam;	Flag;
Valdkund	Venäma
Eläjiden lugu (2021)	16,084 ristitud
Pind	11,29 km²
Pämez'	Aleksandr Toššigin; (sügüz'ku 2014—)
Telefonkod	+7−48 534-xx-xxx
Avtokod	76
Aigvö	UTC+3 (MSK+0)

Gavrilov Jam (ven.: Гаври́лов-Ям) om Venäman lidn da lidnankund Jaroslavlin agjan suvipäivnouzmas. Se om Gavrilov Jaman rajonan administrativižeks keskuseks.

Istorii

Eländpunkt mainitase ezmäižen kerdan vl 1545 Varnican mez'jumalankodin (Sur' Rostov) nimikirjuteses kuti Vor (Gavrilovo)-külä (ven.: деревня Вора, Гаврилово тож). Vl 1580 mainitase Ivan Grazijan käskös kuti Gavrilovskii Jam-külä, sid' oli Gavrilov Jamskai slabad (ven.: Гаврилов-Ямская слобода). Kätihe žiloks nügüdläiženke nimenke jumalanpertin sauvondan jäl'ghe 18. voz'sadan lopus.

1870-nzil vozil sijaline Aleksei Lokalov-torgovan sädi tekstilinedheotandad žilos, i se šingotaškanzi «Jaroslavl' — Ivanovo»-tel. Panihe žilod lidnanvuiččeks vn 1922 elokus. Anttihe radnikžilole lidnan statusad vn 1938 26. päiväl tal'vkud. Vhesai 2003 pöl'vhankombinat radoi.

Gavrilov Jam šingotase mašiništonsauvomižen «Agat»-tegimel^[1] (motoblokad, palad avia- i avtotehnikan täht, kangazramaižed konstrukcijad), sauvondmujuiden tegimel (tuli bankrotnendale vn 2023 uhokus) i leibänedheotandal, turizmal.

Geografijan andmused

Lidn sijadase Kotorosl'-jogen oiktal randal tobjimalaz (126 km pitte, Volgan oiged ližajogi), 92 m ü.m.t. keskmäižel korktusel. Kotoroslin pen' oiged Bočevk-ližajogi (ven.: Бочевка) läbitab lidnan keskust, pen' uit om saudud sil.

Matkad Jaroslavlihesai om 36 km pohjoižhe orhal, 44 km avtol vai 70 km raudtel. Lähembaine lidn om Sur' Rostov 29 km suvipäivlaskmha orhal, 45 km avtotedme vai 35 km raudtedme. Raudtesarak lopiše Gavrilov Jamas, se om saudud Semibratovo-stancijaspäi vl 1927 (oli ruštüd Suren sodan aigaks) i kaks'kümne kilometrad pitte, kävutadas vaiše vemha jüguid vspäi 2003.

Tobmuz

Gavrilov Jam om lidnankundan üks'jäižeks eländpunktaks.

Municipaližen ühtnikan tobmuden pämez' om sen Administracijan pämez'. Edeline lidnan pämez' oli Valerii Popov (2009 — sügüz'ku 2014, koli vl 2016). Lidnankundan Nevondkundan ezimez' om Andrei Golicin vn 2022 tal'vkuspäi. Edeližed Nevondkundan ezimehed oma Anatolii Mazilov (kül'mku 2016 — reduku 2019, uhoku — tal'vku 2022), Natalija Grek (reduku 2019 — uhoku 2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 17 791 ristitud, rajonan kaks' koumandest, vn 2021 — 16 084 ristitud. Kaik 17 351 eläjad oli lidnas vl 2017. Kaikiš suremb lidnan ristitišt oli 20..21 tuhad eläjid vll 1959−1998 (21 353 rist. vl 1989).

Rahvahad (enamba 0,4 % vl 2021): venälaižed — 96,2 %, armenijalaižed — 0,4 %, toižed rahvahad — 2,1 %, rahvahuden ozutandata — 1,3 %.

Ortodoksižen hristanuskondan nell' pühäpertid^[2] oma saudud lidnas. Niišpäi kaks' oma avaitud: ph. Mikulai-čudonsädajan jumalanpert' (om saudud vl 1798), sen udessündutamine jätktase, i ph. Gavriil-arhangelan časoun' (om avaitud vodele 2022). Kaks' pühäpertid oma kaičenus vaiše paloin: Pühän Jumalanmaman sündundan jumalanpertin (1782) i 20. voz'sadan augotišen puine časoun'.

Lapsiden opendusen aluzkundad oma kuz' päivkodid, nell' keskškolad (nomer 1, 2, 3, 6), lapsiden sädamižen pert'kulu, sportškol. Gavrilov Jaman politehnine kolledž^[3] om lidnan professionaližen opendusen aluzkundaks.

Galerei

Jamšikan muzei (2009)
Ph. Mikulai-čudonsädajan jumalanpert', vn 2009 nägu
«Agat»-tegimen tulendanno vl 2020
Lapsiden sädamižen pert'kulu (2009)
Supermarket vl 2009

Homaičendad

Irdkosketused

Lidnankundan tobmuden sait (gavrilovyamgor.ru). (ven.)

Gavrilov Jam Vikiaitas

	Jaroslavlin agjan lidnad
	Danilov \| Gavrilov Jam \| Jaroslavl' \| Lübim \| Miškin \| Pereslavl' Zalesskii \| Pošehonje \| Ribinsk \| Sur' Rostov \| Tutajev \| Uglič

[1] Gavrilov Jaman mašiništonsauvomižen «Agat»-tegimen sait (agatgidro.ru). (ven.)

[2] Gavrilov Jaman pühäpertid sobory.ru-saital. (ven.)

[3] Gavrilov Jaman politehnižen kolledžan sait (pl17yar.ru). (ven.)

[1]

[2]

[3]