Grac

Grac
Graz

Lidnanznam	Flag
Valdkund	Avstrii
Eläjiden lugu (2025)	306,068 ristitud
Pind	127,57 km²
Pämez'	El'ke Kar (kül'mku 2021—, Elke Kahr)
Telefonkod	+43−316
Aigvö	tal'vel UTC+1, kezal UTC+2

Lidnan kart (heinku 2025)

Grac (saks.: Graz [ˈɡʁaːt͡s], sloven.: Gradec) om Avstrijan lidn valdkundan suvipäivnouzmas. Se om Avstrijan kahtenz' lidn eläjiden lugun mödhe, Štirii-federacijanman administrativine keskuz. Lidn om opendusen järedaks keskuseks, nell' universitetad ratas 55 tuhanke üläopenikoid.

Istorii

Eländpunkt mainitase ezmäižen kerdan vl 1128 kuti Gradec-lidn. Gracan istorine keskuz mülüb UNESCO:n Mail'man jäl'gusen nimikirjuteshe vspäi 1999.

Gracan ižandusen päsarakod oma mašinansauvomine, himine, tekstiline i sömtegimišt (oluden tehmine). Mašinansauvomižen transnacionaline Andritz AG-koncern baziruiše lidnas (mašiništ segoitusiden erigoitmižen täht cellülozbumagaižes sarakos i GES:oiden elektromehanine mašiništ).

Geografijan andmused

Lidnan sijaduz federacijanmas i valdkundas vn 2006 kartal

Lidn sijadase federacijanman suvipäivnouzmas, Mur-jogen randoil (saks.: Mur 434 km pitte, Dunain oigedpol'ne bassein), 353 m ü.m.t. keskmäižel korktusel.

Matkad Ven-pälidnhasai om 145 km pohjoižpäivnouzmha orhal, 195 km kiruhavtoteil vai kaks' polenke časud jonusel.

Klimat om ven valdmeren valatoitandanke, territorijan kontinentaliženke klimatanke röunanno. Keza om päivoikaz, kül'mku-viluku oma pil'vekahad. Voden keskmäine lämuz om +11,1 C°, kezakun-elokun +19,4..+21,2 C°, +0,6..+2,7 C°. Ekstremumad oma −19,5 C° (viluku, uhoku) i +38,1 C° (heinku, eloku). Paneb sadegid 854 mm vodes, enamba keakus-elokus (121..129 mm kus), vähemba vilukus-uhokus (20..29 mm kus). Paneb 45 sm lunt tal'ven 32 päiväs.

Tobmuz

Gracan 17 nimitadud lidnrajonad (saks.: Stadtbezirke) vl 2020

Edeline lidnan pämez' om Zigfrid Nagl' (2003 — kül'mku 2021, Siegfried Nagl).

Eläjad

Vl 2014 lidnan eläjiden lugu oli 269 997 ristitud, vl 2021 — 291 134 ristitud. Kaikiš suremb lidnan ristitišt om nügüd'. Läz 650 tuhad eläjid om ezilidnoidenke (2018).

Kaik nell' kolledžad i nell' universitetad ratas lidnas. Olijad universitetad oma Gracan universitet Karlan i Francan nimed, tehnine, medicinine universitetad, muzikan i akt'orčomamahton universitet.

Irdkosketused

• Lidnan oficialine sait (graz.at). (saks.) (angl.) (+ äikel'ne känduz)