Kotovsk (Venäma)

Kotovsk
Котовск
Lidnanznam;	Flag;
Valdkund	Venäma
Eläjiden lugu (2021)	26,694 ristitud
Pind	30,81 km²
Pämez'	Aleksei Plahotnikov; (kül'mku 2015—)
Telefonkod	+7−47 541-xx-xxx
Avtokod	68
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Kotovsk (ven.: Кото́вск) om Venäman lidn da lidnümbrik Tambovan agjan keskuzpalas. Se om agjan videnz' lidn eläjiden lugun mödhe. Lidn om ümbärtud Tambovan rajonan territorijal.

Istorii

Eländpunktan aluz om pandud mecan sijha vl 1914 Nikolai II-carin käskön mödhe kuti valdkundaline Porhtegim-radnikžilo (ven.: рабочий посёлок Пороховой Завод) sauvomha da holitamha porhan tegint. Vhesai 1917 vaumitihe raudted i lämuzelektrokeskust. Vl 1918 se oli Udarnik-žiloks. Udesnimitihe Rusked Torač-žiloks (ven.: Красный Боевик) vl 1919. Kätihe sidä Tambovan rajonaks vn 1938 uhokul. Rajon sai erižen lidnan statusad vn 1940 16. päiväl sulakud, udesnimitihe nügüdläižikš Rahvahanikoiden sodan Grigorii Kotovskii-kombrigan muštoks. Toižen mail'man sodan aigan lidn oli alištunu bombardiruindale, sur' lämoipalo tegihe porhtegimel vn 1942 heinkus.

Kotovsk šingotase himižil tegimil (porhtegim i plastmassan tegim), sauvondmaterialiden pästandal (lämuzizoläcijan i keramižtegesiden tegimed), ratud nahkan tegimel, elektrokomponentoiden «Almaz»-edheotandal, sömtegimištol (leibtegim) i meblin pästandal.

Geografijan andmused

Lidnan sijaduz ümbärdajas Tambovan rajonas (suvhe Tambovaspäi) i Tambovan agjas vn 2006 kartal

Lidn sijadase ümbärdajan rajonan suviröunanno, Cnanjogen oiktal korktal randal (ven.: Цна 451 km pitte, Okan oigedpol'ne bassein), 130 m ü.m.t. keskmäižel korktusel. Kotovskan vezivaradim (vai Tambovan, 21 km², 128 m ü.m.t.) Mectambov-jogel om olmas kahtes kilometras päivnouzmha lidnaspäi vspäi 1995.

Matkad Tambovan röunhasai om kahesa kilometrad pohjoižhe orhal vai vižtoštkümne kilometrad avtotel. Toine lähembaine lidn om Rasskazovo 27 km päivnouzmha orhal vai 41 km avtotedme. Ei ole passažirühtenzoitust raudtedme vspäi 1996, Kotovsk-raudtestancii om sauptud, Tambov II-stancii kävutase jüguiden täht vaiše, erine sarak tuleb Tambovaspäi lidnha.

Kotovsk om lidnümbrikon üks'jäižeks eländpunktaks. Lidnümbrikon pind — 30,81 km².

Eläjad

Vl 1916 žilon ristitišt oli kahesa tuhad eläjid, vl 1959 kaik 25 511 ristitud elihe lidnas. Vn 2010 Venäman rahvahanlugemižen mödhe lidnan eläjiden lugu oli 31 850 ristitud, vn 2021 — 26 694 ristitud. Kaik 30 353 eläjad oli lidnas vl 2017. Kaikiš suremb lidnan ristitišt oli 37..38 tuhad eläjid vll 1979−1998 (38 600 rist. vl 1992).

Rahvahad (2010): venälaižed — 97,9 %, toižed rahvahad — 2,1 %.

Ortodoksižen hristanuskondan koume pühäpertid^[1] oma kaičenus i saudud lidnas: kaks' jumalanpertid i časoun'. Suremb kivine Raštvoiden jumalanpert' om sauvomas vspäi 2001.

Lapsiden opendusen aluzkundad oma päivkodid, kaks' keskškolad, specialine korrekcine škol-internat, lapsiden sädamižen pert', čomamahtoiden škol. Kotovskan industrialine tehnikum^[2] om lidnan professionaližen opendusen aluzkundaks.