Kirsanov

Kirsanov
Кирсанов

Lidnanznam	Flag
Valdkund	Venäma
Eläjiden lugu (2021)	16,164 ristitud
Pind	10,9 km²
Pämez'	Sergei Pavlov (keväz'ku 2017—)
Telefonkod	+7−47 537-xx-xxx
Avtokod	68
Aigvö	UTC+3 (MSK+0)

Kirsanov (ven.: Кирса́нов) om Venäman lidn da lidnümbrik Tambovan agjan päivnouzmas. Se om Kirsanovan rajonan administrativižeks keskuseks, ei mülü sihe.

Istorii

Eländpunkt mainitase vspäi 1702 kuti Kirsanov-žilo Krasinan raudtegimenno (ven.: селение при Красинском железоделательном заводе). Nimitihe sidä ezmäižen Kirsan (Hrisan) Zubahin-eläjan nimen mödhe sijaližes legendaspäi. Vl 1733 tegim paloi lophu, i kätihe žilod valdkundaližeks. Žilo sai makundan lidnan statusad vl 1779. Šingotihe torgovanoil i kahtel jarmankal vodes, tehmižen penil edheotandoil, sijaližeks openduzkeskuseks. Vl 1870 raudte mäni lidnanno i ühtenzoiti Saratovanke vl 1871. Toižen mail'man sodan aigaks evakuiruihe Gomelin jäugvägiden sodaškolad lidnha.

Kirsanov šingotase mašinansauvomižen kahtel tegimel (tekstil'mašiništ, mehanine tegim) i sömtegimištol (jauhkombinat, lihakombinat, sahartegim, kuivan maidon tegim, maploduiden konservtegim), mugažo specialižiden sobiden omblendfabrik radab. Aviabaz i «Gazprom»-kompanijan magistraližiden gazanveimiden Kirsanovan ohjanduz oma saudud lidnas.

Geografijan andmused

Lidnan sijaduz ümbärdajas rajonas i Tambovan agjas vn 2006 kartal

Lidn sijadase rajonan päivnouzmas, Voron-jogen oiktal randpolel (ven.: Воро́на 454 km pitte, Donan hurapol'ne bassein), 140 m ü.m.t. keskmäižel korktusel. Voronan Pursovk-ližajogi (ven.: Пурсовка 14 km pitte) läbitab lidnad. Pen' vezivaradim om lidnan päivlaskmas.

Matkad Tambovhasai om kahesakümne seičeme kilometrad päivlaskmha orhal, 94 km avtotel vai 93 km raudtel. Lähembaižed lidnad oma Rasskazovo 57 km päivlaskmha orhal, 63 km avtotedme vai 69 km raudtedme, i Belinskii (Penzan agj) 58 km pohjoižpäivnouzmha orhal vai 83 km avtotedme. Kirsanov-raudtestancii radab lidnan suviröunal «Tambov — Saratov»-keskustal vspäi 1871. «Tambov — Saratov»-mante läbitab lidnad, avtotesarak viden kilometran pitte päivlaskmha lidnaspäi ühtenzoitab Penzanke.

Tobmuz

Kirsanov om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline lidnan Administracijan pämez' om Dmitrii Tereščenko, radoi vn 2017 keväz'kuhusai. Lidnan Rahvahandeputatoiden nevondkundan ezimez' om Margarita Rožnova vn 2024 uhokuspäi, hän oli jo sil-žo radnikusel ende (kezaku 2017 — reduku 2018). Edeline lidnan suiman ezimez' om Oleg Šapiro (reduku 2018 — uhoku 2024).

Eläjad

Vl 1897 lidnan ristitišt oli 9 300 eläjad, vl 1959 — 15 654 eläjad. Vn 2010 Venäman rahvahanlugemižen mödhe lidnan eläjiden lugu oli 17 224 ristitud, vn 2021 — 16 164 ristitud. Kaik 16 682 eläjad oli lidnas vl 2017. Kaikiš suremb lidnan ristitišt oli 23 500 eläjad vl 1931 i 20..21 tuhad eläjid vll 1967−2000.

Rahvahad (2010): venälaižed — 98,3 %, toižed rahvahad — 1,7 %.

Ortodoksižen hristanuskondan koume jumalanpertid oma kaičenus i saudud lidnas. Ende Jumalanmaman Tihvinan jumalaižen naižjumalankodi radoi lidnas mugažo.

Lapsiden opendusen aluzkundad oma nell' nimitadud päivkodid, aluzškol (ende nomer 3), kaks' keskškolad (nomer 1 i 11), lapsiden sädamižen keskuz, čomamahtoiden škol, lapsiden da norišton sportškol. Professionaližen opendusen aluzkundad oma civiližen aviacijan Kirsanovan aviaciž-tehnine kolledž (Moskvan valdkundaližen civiližaviacijan tehnižuniversitetan filial vspäi 2010) i Tambovan agjan Agrariž-tehmištoline kolledž.

Irdkosketused

• Kirsanov-lidnan Rahvahan deputatoiden Nevondkundan sait (sovet37.tmbreg.ru). (ven.)
• Kirsanov-lidnan Administracijan sait (g37.tmbreg.ru). (ven.)
• Lidnan informacine sait (kirsanov-web.ru). (ven.)