Belinskii (lidn)

Belinskii
Белинский
Lidnanznam;	Flag;
Valdkund	Venäma
Eläjiden lugu (2021)	8,656 ristitud
Pind	8,33 km²
Pämez'	Pötr Knäz'kin; (eloku 2023—)
Telefonkod	+7−84 153-xx-xxx
Avtokod	58
Aigvö	UTC+3 (MSK+0)

Belinskii (ven.: Бели́нский, erz.: Белинской ош) om Venäman lidn da lidnankund Penzan agjan päivlaskmas. Se om Belinskijan rajonan administrativine keskuz.

Istorii

Eländpunktan aluz om pandud 18. voz'sadan augotišes kuti Nikol'skoje-žilo (ven.: село Никольское) vai Pen' Čenbar (ven. Малый Ченбар). Žilo mainitase ezmäižen kerdan vn 1723 valdkundmaksoiden revizijas. Se sai makundan lidnan statusad vl 1780 Čembar-nimitusenke (ven.: Чемба́р), nimitihe jogiden mödhe. Udesnimitihe nügüdläižikš vn 1948 17. päiväl semendkud literaturan Vissarion Belinskii-arvostelijan da publicistan (1811−1848) muštoks, hänen laps'aig (1816−1829) mäni neciš lidnas.

Belinskii šingotase elektronikan komponentoiden «Kermet»-tegimel i sömtegimištol (saguden tehmine, konditerine fabrik). Venämalaižen literaturan abutuzfond radaškanzi lidnas vl 2008.

Geografijan andmused

Lidn sijadase rajonan keskuzpalas, Pen' Čembar-jogen (ven.: Малый Чембар 33 km pitte) oiktal randal tobjimalaz, Sur' Čembar- i Pen' Čembar-jogiden ühthejoksmusenno (Donan hurapol'ne bassein), 190 m ü.m.t. keskmäižel korktusel.

Matkad Penzhasai om 109 km päivnouzmha orhal vai 127 km avtotel. Lähembaižed lidnad oma Kamenk (raudtestancii) nell'kümnes ühesas kilometras pohjoižpäivnouzmha orhal vai 55 km avtotedme, i Kirsanov (Tambovan agj, raudtestancii) 58 km suvipäivlaskmha orhal vai 83 km avtotedme. «Penz — Tambov»-avtote ümbärdab lidnad ühtes kilometras pohjoižespäi.

Tobmuz

Belinskii om lidnankundan üks'jäižeks eländpunktaks. Lidnankundan pind — 8,33 km².

Lidnankundan tobmuden pämez' om sen Ezitajiden suiman ezimez' (organizacii om sätud vn 2022 redukus), edel vn 2022 redukud Administracijan pämez' oli lidnankundan pämehen. Edeližed lidnan suiman ezimehed oma Aleksei Jerömin (vn 2023 sulaku-eloku), Tat'jana Šičova (radoi vn 2023 keväz'kuhusai). Lidnankundan Administracijan pämez' om Viktor Fomin vn 2025 semendkuspäi (velgusentäutai, oli sil-žo radnikusel vn 2024 keväz'kus-redukus). Edeližed lidnan Administracijan pämehed oma Ivan Valeulin (sügüz'ku 2022 — sügüz'ku 2023), Mihail Frunze (heinku 2020 — eloku 2022), Vadim Samoilin (semendku 2018 — heinku 2020), Vasilii Gorškov (radoi vn 2017 uhokuhusai).

Eläjad

Vl 1939 lidnan ristitišt oli 6 006 eläjad. Vn 2010 Venäman rahvahanlugemižen mödhe lidnan eläjiden lugu oli 8 565 ristitud, rajonan koumandez, vn 2021 — 8 656 ristitud. Kaik 7 843 eläjad oli lidnas vl 2017. Kaikiš suremb lidnan ristitišt oli enamba vai läz 9 tuhad eläjid vll 1989−2009 (9 700 rist. vll 2000−2001).

Rahvahad (ozutadud rahvahudenke vl 2010): venälaižed — 87,1 %, mordvinalaižed — 9,5 %, totarlaižed — 1,3 %, toižed rahvahad — 2,1 %.

Ortodoksižen hristanuskondan kaks' pühäpertid^[1] oma kaičenus i avaitud lidnas: Pühän Jumalanmaman Katken jumalanpert', ph. Mitrofan Voronežalaižen časoun'.

Openduz

Lapsiden opendusen aluzkundad oma koume nomeruidud päivkodid (nomer 1, 3, 4), kaks' keskškolad (nomer 1 i 2), lidnan lapsiden sädamižen pert', čomamahtoiden škol, lapsiden da norišton sportškol.

Professionaližen opendusen aluzkund om Kamenkan tehmižtehnologijoiden da edheotaikundan tehnikum, sen Belinskijan filial^[2].