Kuzneck

Kuzneck
Кузнецк
Lidnanznam;	Flag;
Valdkund	Venäma
Eläjiden lugu (2021)	78,390 ristitud
Pind	42,08 km²
Pämez'	Viktor Agafonov; (kül'mku 2025—)
Telefonkod	+7−84 157-xx-xxx
Avtokod	58
Aigvö	UTC+3 (MSK+0)

Kuzneck (ven.: Кузне́цк, tot.: Кузнецк / Күзнәй) om Venäman lidn da lidnümbrik Penzan agjan päivnouzmas. Se om agjan kahtenz' lidn eläjiden lugun mödhe, mugažo om Kuzneckan rajonan administrativižeks keskuseks.

Istorii

Eländpunktan aluz om pandud Petr I-carin Vasilii Nariškin-abunikal vl 1699 kuti Trujovo-Voskresenskoje, sid' Nariškino-žilo. Šingotihe käziradoil i jarmankoil. Se sai makundan lidnan oficiališt statusad nügüdläiženke nimenke Jekaterina II-imperatornaižen käskön mödhe vn 1780 kül'mkus. Vl 1874 raudte läbiti lidnad.

Kuzneck šingotase mašinansauvomižel (cisternad i mašiništon palad nozoltadud gazan täht), sömtegimištol (leibänkombinat, vintegim), nahktegimel i omblendfabrikal.

Geografijan andmused

Lidn sijadase ümbärdajan rajonan keskuzpalas, Trujov-jogen hural randal tobjimalaz (ven.: Труёв 63 km pitte, Suran üläjoksmusen hura ližajogi), 240 m ü.m.t. keskmäižel korktusel.

Matkad Penzhasai om 106 km päivlaskmha orhal, 123 km avtotel vai raudtel. Lähembaižed lidnad oma Sursk i Gorodišče kuz'kümne ühtes kilometras päivlaskmha orhal, 76 km avtotedme vai raudtedme. «Penz — Sizran'»-avtote mäneb lidnadme. «Penz — Sizran'»-raudte läbitab lidnad. Kuzneck-raudtestancii radab lidnan keskuzpalas.

Tobmuz

Kuzneck om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez', edel vn 2023 uhokud Ezitajiden suiman ezimez' oli lidnan pämehen. Edeline lidnan Administracijan pämez' om Sergei Zlatogorskii (2012 — kül'mku 2025). Lidnümbrikon Ezitajiden suiman ezimez' om Vladimir Trošin vn 2023 vilukuspäi. Edeližed lidnan suiman ezimehed oma Gennadii Zinovjev (kezaku 2022 — viluku 2023), Sergei Laptev (sügüz'ku 2019 — kezaku 2022), Vladimir Nazarov (radoi vn 2019 sügüz'kuhusai).

Eläjad

Vl 1939 lidnan ristitišt oli 37 842 eläjad. Vn 2010 Venäman rahvahanlugemižen mödhe lidnan eläjiden lugu oli 88 839 ristitud, vn 2021 — 78 390 ristitud. Kaik 83 400 eläjad oli lidnas vl 2017. Kaikiš suremb lidnan ristitišt oli 101 tuhad eläjid vll 1993−1994.

Rahvahad (ozutadud rahvahudenke vl 2010): venälaižed — 84,7 %, totarlaižed — 9,2 %, mordvinalaižed — 2,2 %, toižed rahvahad — 3,9 %.

Ortodoksižen hristanuskondan Sündun Voznesenjan kafedraline päjumalanpert'^[1] (1842−1856), viž jumalanpertid, časoun', kaks' vauktustuzkeskust i vanhuskolaižiden loičendpert' oma kaičenus i saudud lidnas. Protestantizman kaks' jumalanpertid oma avaitud. Islaman pühäpert' i medrese ratas lidnas.

Openduz

Lapsiden opendusen aluzkundad oma päivkodid, keskškolad.

Professionaližen opendusen aluzkundad oma Kuzneckan muzikaline^[2], äiprofil'ne^[3], pedagogine i elektrotehnikan kolledžad, Penzan agjan medicinižen kolledžan filial, Kuzneckan informacijan da ohjandusen tehnologijoiden institut^[4] (Penzan valdkundaližen universitetan filial).