Zarečnii (Penzan agj)

Zarečnii
Заречный
Lidnanznam;	Flag;
Valdkund	Venäma
Eläjiden lugu (2025)	58,597 ristitud
Pind	27,61 km²
Pämez'	Aleksei Kostin; (sügüz'ku 2024—)
Telefonkod	+7−8412-xxx-xxx
Avtokod	58
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Zarečnii (ven.: Заре́чный) om Venäman lidnümbrik da sauptud lidn Penzan agjan keskuzpalan päivnouzmas. Se om agjan koumanz' lidn eläjiden lugun mödhe, Penzan suvipäivnouzmaine ezilidn.

Istorii

Vn 1954 heinkus nevondkundaline tobmuz päti sauda Penzan ladimentegint, sil-žo vodel sauvond zavodihe mectahondas. Municipalitetan oficialine aluz om pandud Penzan Zarečnii-rajonaks vn 1958 elokus. Eländpunkt om erigoittud Penzaspäi vn 1958 10. päiväl tal'vkud kuti lidn nügüdläiženke nimitusenke. Ladimiden järed tegim radaškanzi vl 1961. Vll 1954−1964 kävutadihe türmatud mehiden i sodasauvojiden töid lidnan sauvomižes. Vll 1962−1992 lidnan nimituz oli Penz-19 (ven.: Пенза-19).

Zarečnii šingotase atomšlibakoiden paloiden tehmižel, «Hrizantem»-raketkompleksan pästandal, ladimensauvomižel (läz kümned edheotandoid), sömtegimištol (lihan edheotand).

Geografijan andmused

Lidn sijadase 200 m ü.m.t. keskmäižel korktusel. Röunatab Penzan lidnümbrikonke päivlaskmas i pohjoižes, om erigoittud Penzan fartališpäi kümnekilometrižel mecmassival.

Toižed lähembaižed lidnad oma Gorodišče koumekümnes seičemes kilometras päivnouzmha orhal vai 41 km avtotedme, i Sursk 37 km päivnouzmha-suvipäivnouzmha orhal vai 65 km avtotedme. «Penz — Sizran'»-avtote mäneb kahtes kilometras pohjoižhe lidnaspäi. Tulend lidnha om laskendbumagan mödhe vaiše. «Penz — Sizran'»-raudte om lidnan pohjoižeks i päivnouzmaižeks röunaks, sen lähembaine stancii om Seliks (ven.: Селикса).

Tobmuz

Zarečnii om lidnümbrikon üks'jäižeks eländpunktaks. Lidnümbrikon pind — 27,61 km².

Lidnümbrikon tobmuden pämez' om sen Administracijan pämez', edel vn 2016 kül'mkud oli suiman ezimez'. Edeližed lidnan Administracijan pämehed oma Oleg Klimanov (tal'vku 2016 — sügüz'ku 2024), Väčeslav Gladkov (radoi vn 2016 sügüz'kuhusai). Lidnan Ezitajiden suiman ezimez' om Maksim Hormušov vn 2024 sügüz'kuspäi. Edeližed lidnan suiman ezimehed oma Sergei Ruzaikin (tal'vku 2016 — sügüz'ku 2024), Oleg Klimanov (sügüz'ku 2014 — tal'vku 2016).

Eläjad

Vl 1959 lidnan ristitišt oli 6 450 eläjad. Vn 2010 Venäman rahvahanlugemižen mödhe lidnan eläjiden lugu oli 63 601 ristitud, vn 2021 — 58 510 ristitud. Kaik 64 982 eläjad oli lidnas vl 2017. Kaikiš suremb lidnan ristitišt oli 63 900 eläjad vl 1996 i 65 502 eläjad vl 2020.

Rahvahad (ozutadud rahvahudenke vl 2010): venälaižed — 92,6 %, mordvinalaižed — 4,5 %, ukrainalaižed — 1,2 %, toižed rahvahad — 1,7 %.

Ortodoksižen hristanuskondan viž pühäpertid^[1] oma saudud lidnas vspäi 1994: nell' jumalanpertid i ph. Panteleimon-spravitajan časoun' (2008) läžundkodiden kompleksas.

Openduz

Lapsiden opendusen aluzkundad oma üks'toštkümne päivkodid, viž keskškolad (nomer 220, 221, 222, 225, 226), gimnazii nomer 216 «Didakt», licei nomer 230, lapsiden da norišton sädamižen pert'kulu, opendusen i proforientacijan keskuz, lapsiden tehnižen sädamižen keskuz, lapsiden da norišton Junost' -keskuz («Nor'aig»), koume lapsiden da norišton sportškolad (niišpäi kaks' olimpižen varan).

Zarečnijan tehnologine institut (vhesai 2005 tehmižtehnikum i kolledž) — Penzan valdkundaližen tehnologižen universitetan filial^[2] om lidnan professionaližen opendusen aluzkundaks.