Spassk (Penzan agj)

Spassk
Спасск
Lidnanznam;	Flag;
Valdkund	Venäma
Eläjiden lugu (2021)	6,936 ristitud
Pind	5,74 km²
Pämez'	Irina Kirühina; (reduku 2019—)
Telefonkod	+7−84 151-xx-xxx
Avtokod	58
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Spassk (ven.: Спасск, erz.: Спасск ош / Спасской) om Venäman lidn da lidnankund Penzan agjan lodehes. Se om Spasskan rajonan administrativižeks keskuseks da palaks.

Istorii

Eländpunktan aluz om pandud mecpöudol 17. voz'sadal. Mainitaškanzihe vspäi 1663 kuti Bogdanovo-žilo, alištui Novo-Spasskii-jumalankodile. Vll 1673−1779 žilon nimituz oli Bogdanovo-Spasskoje. Se sai makundan lidnan statusad vl 1779, i nimitihe Spassk:aks, no pigai udesnimitihe erištamha toižiš lidnoišpäi, vhesai 1925 lidnan nimi oli Spassk Studencal (ven.: Спасск-на-Студенце). Šingotihe oluden i razvan tehmižel. Vll 1925−2005 lidnan nimituz oli Bednodemjanovsk (ven. Беднодемьяновск) Demjan Bednii-runokirjutajan (1883−1945) psevdoniman mödhe, hän vei eläbad kirjeižidenvajehtust sijaližidenke.

Spassk šingotase betontegimel, Penzan dizel'likutimiden tegimen cehal i sömtegimištol (argvoitegim, leibänkombinat).

Geografijan andmused

Lidn sijadase tazangištol, rajonan lodehes, Studenc-jogen oiktal randal tobjimalaz (ven.: Студенец 14 km pitte, Mokš-jogen hurapol'ne bassein), 170 m ü.m.t. keskmäižel korktusel. Kok-jogi (ven. Кока) läbitab Spasskad da lankteb Studencha oiktalpäi lidnan pohjoižes.

Matkad Mordovijhasai om kaks' kilometrad päivlaskmha i pohjoižhe orhal, Penzhasai om 145 km suvipäivnouzmha orhal vai 165 km avtotel. Lähembaižed lidnad oma Krasnoslobodsk (Mordovii) 67 km pohjoižpäivnouzmha orhal vai 96 km avtotedme, Kovilkino (raudtestancii, Mordovii) 49 km päivnouzmha orhal vai 87 km avtotedme, i Alalomov (raudtestancii) 55 km suvipäivnouzmha orhal vai 59 km avtotedme. «Penz — Räzan'»-avtote läbitab lidnad.

Tobmuz

Spassk om lidnankundan üks'jäižeks eländpunktaks. Lidnankundan pind — 5,74 km².

Lidnankundan tobmuden pämez' om sen Ezitajiden suiman ezimez'. Edeližed lidnan suiman ezimehed oma Aleksei Golišev (Алексей Голышев, kül'mku 2016 — reduku 2019), Vladimir Topilin (semendku-kül'mku 2016), Anna Dasaikina (oti radnikust vn 2016 semendkuhusai). Lidnankundan Administracijan pämez' om Ruslan Cejev vn 2025 vilukuspäi. Edeližed lidnan Administracijan pämehed oma Lüdmila Kostina (uhoku 2023 — viluku 2025), Aleksei Timošin (eloku 2020 — uhoku 2023), Sergei Balašov (semendku 2017 — eloku 2020), Nikolai Lomonov (radoi vn 2017 semendkuhusai).

Eläjad

Vl 1939 lidnan ristitišt oli 6 788 eläjad. Vn 2010 Venäman rahvahanlugemižen mödhe lidnan eläjiden lugu oli 7 442 ristitud, rajonan koume videndest, vn 2021 — 6 936 ristitud. Kaik 7 178 eläjad oli lidnas vl 2017. Kaikiš suremb lidnan ristitišt oli 10 tuhad eläjid vll 1910−1913 i 8 400 eläjad vll 1992−1998.

Rahvahad (ozutadud rahvahudenke vl 2010): venälaižed — 89,6 %, mordvinalaižed — 8,3 %, toižed rahvahad — 2,1 %.

Ortodoksižen hristanuskondan kaks' pühäpertid^[1] oma kaičenus i saudud lidnas: Sündun Voznesenjan jumalanpert' (om sätud vodele 1859) i Spasan Toižetamižen časoun' (om letud vll 2003−2005). Ende Spasan Toižetamižen päjumalanpert' oli (1810−1967) časounän sijas, poukahtihe päjumalanpertid. Edel nevondkundališt aigad koume tošt pühäpertid oliba lidnas.

Openduz

Lapsiden opendusen aluzkundad oma kaks' nomeruidud päivkodid (nomer 1 i 2), aluzškol, keskškol, rajonan sädamižen pert', čomamahtoiden škol, rajonan lapsiden da norišton sportškol.

Spasskan proftehnologijoiden da biznesan kolledž^[2] om lidnan profopendusen aluzkundaks.