Gorodišče (Penzan agj)

Gorodišče
Городище

Lidnanznam	Flag
Valdkund	Venäma
Eläjiden lugu (2021)	7,796 ristitud
Pind	9,39 km²
Pämez'	Vladimir Mihailov (uhoku 2013—)
Telefonkod	+7−84 158-xx-xxx
Avtokod	58
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Gorodišče (ven.: Городи́ще) om Venäman lidn da lidnankund Penzan agjan päivnouzmas. Se om Gorodiščen rajonan administrativine keskuz, kaikiš suremb lidn i kahtenz' eländpunkt ristitišton mödhe.

Istorii

Edel 13. voz'sadad Volgan Bulgarijan lidnuz sijazihe lidnan sijas. Nügüdläižen eländpunktan aluz om pandud 1670-nzil vozil kuti čuvašalaižiden lidnuz endevanhan sijas. Vspäi 1681 Simbirskan sodavejan kozakad da toižed kaičijad eliba Dmitrijevskai-slabadas (Gorodišče) i Bogojavlenskai-slabadas (Julovo). Slabadad oliba ühtištadud Rogožkino-žiloho 18. voz'sadal keskes. Vl 1780 žilo sai makundan lidnan statusad. Kaugedraudan valamižtegim, potašan, trahmalan, viriden da mecanümbriradmižen tegimed radoiba 19. voz'sadal i 20. voz'sadan augotišes.

Gorodišče šingotase meblinfabrikal i vintegimel (vin, olud, mineraline vezi), mugažo gofrokartonan fabrikal (vspäi 2019).

Geografijan andmused

Gorodiščen rajonan sijaduz agjas vn 2015 kartal

Lidn sijadase rajonan keskuzpalan suves, Julovk-jogen molembil randoil (ven.: Юловка 48 km pitte, Suran oiged ližajogi), 210 m ü.m.t. keskmäižel korktusel.

Matkad Penzhasai om koumekümne seičeme kilometrad päivlaskmha orhal vai 51 km avtotel. Lähembaine lidn om Sursk 22 km suvhe orhal vai 27 km avtotedme. «Penz — Ul'janovsk»- i «Penz — Sizran'»-avtoted sarakoitas lidnan päivlaskmas.

Gorodišče om lidnankundan üks'jäižeks eländpunktaks. Lidnankundan pind — 9,39 km².

Eläjad

Vl 1939 lidnan ristitišt oli 6 440 eläjad. Vn 2010 Venäman rahvahanlugemižen mödhe lidnan eläjiden lugu oli 8 096 ristitud, rajonan kudendez, vn 2021 — 7 796 ristitud. Kaik 7 951 eläjad oli lidnas vl 2017. Kaikiš suremb lidnan ristitišt oli enamba 8 tuhad eläjid vll 1992−2015 (8 600 rist. vl 1996).

Rahvahad (2002): venälaižed — 87,0 %, mordvinalaižed — 5,4 %, totarlaižed — 4,2 %, ukrainalaižed — 1,0 %, toižed rahvahad — 2,4 %.

Ortodoksižen hristanuskondan kaks' pühäpertid oma avaitud lidnas: Jumalanmaman Katken jumalanpert' (om saudud vodele 2008) i Viktor-moknikan časoun'. Niiden ližaks Eläban Eziauguižen Stroican kivine päjumalanpert' ei ole kaičenus (oli vll 1805−1938).

Lapsiden opendusen aluzkundad oma koume nimitadud i nomeruidud päivkodid (nomer 1, 4 i Semicvetik «Änikoičii Seičemeks»), augotižškol, keskškol nomer 1, rajonan ližaopendusen büdžetine aluzkund (vll 2001−2015 rajonan lapsiden sädamižen pert'), čomamahtoiden škol, rajonan lapsiden da norišton sportškol. Professionaližen opendusen aluzkund oli Penzan socialiž-pedagogižen kolledžan Gorodiščen filial vhesai 2019. Nügüd'aigan lähembaižed profopendusen aluzkundad ratas Penzas i Kuzneckas.

Irdkosketused

• Lidnankundan lehtpoled rajonan tobmuden gorodishe.pnzreg.ru-saital. (ven.)