Kurtamiš

Kurtamiš
Куртамыш
Lidnanznam;	Flag;
Valdkund	Venäma
Eläjiden lugu (2025)	14,629 ristitud
Pind	10 km²
Pämez'	Aleksandr Kučin; (sulaku 2019—)
Telefonkod	+7−35 249-xx-xxx
Avtokod	45
Aigvö	UTC+5 (MSK+2)

Kurtamiš (ven.: Куртамы́ш) om Venäman lidn da lidnankund Kurganan agjan suvipäivlaskmas. Se om Kurtamišan rajonan administrativine keskuz da pala.

Istorii

Eländpunktan aluz om pandud lidnuseks ühtennimižen jogen randal Isetin agjan kancelärijan käskön mödhe vl 1745. Vodele 1753 saudihe ezmäšt jumalanpertid ümbrištos, phh. Pedran da Paulan oiktastuseks, i nimitaškanzihe žilod senno Kurtamiš-jogen mödhe. Jumalanpert' om olmas nügüd'-ki. Vspäi 1756 kätihe žilod makundan keskuseks. 19. voz'sadal viž jarmankad oleskeli joga vodes. Vn 1956 5. päiväl heinkud žilo sai lidnan statusad.

Kurtamiš šingotase kohenduzmehanižel tegimel i sömtegimištol (sagudentegim, jauhon tehmine).

Geografijan andmused

Lidn sijadase rajonan keskuzpalan lodehes, Kurtamiš-jogen randoil (124 km pitte, Tobolan hura ližajogi), 110 m ü.m.t. keskmäižel korktusel.

Matkad Kurganhasai om seičemekümne seičeme kilometrad pohjoižpäivnouzmha orhal vai 83 km avtol. Toine lähembaine lidn om Šumih 82 km lodeheze orhal vai 219 km avtotedme.

Tobmuz

Kurtamiš om lidnankundan üks'jäižeks eländpunktaks. Lidnankundan pind — 96,71 km².

Edeline lidnan pämez' om Sergei Voroncov (sügüz'ku 2014 — sulaku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 17 099 ristitud, rajonan viž ühesandest, vn 2021 — 14 806 ristitud. Kaik 16 702 eläjad oli lidnas vl 2017. Kaikiš suremb lidnan ristitišt oli 18..19 tuh. eläjid vll 1989−2003 (19 155 rist. vl 1989).

Ortodoksižen hristanuskondan phh. Pedran da Pavlan jumalanpert'^[1] om üks'jäižeks pühäpertikš lidnas. Sen ližaks Hristan Eläbzdusen päjumalanpert' (oli saudud vll 1867−1873) ei ole kaičenus, panihe mantazole nevondkundaližel aigal.

Openduz

Lapsiden opendusen aluzkundad oma kahesa nimitadud päivkodid (nomer 1..3, 5..9), kaks' keskškolad (nomer 1 i 2), kadetškol-internat, lapsiden da norišton pert', čomamahtoiden škol N. P. Ustüžaninan nimed, lapsiden da norišton sportškol.

Kurganan valdkundaližen universitetan filial^[2] (ende Kurtamišan maižanduztehnikum) i Kurganan pedagogižen kolledžan filial^[3] oma lidnan professionaližen opendusen aluzkundoikš.

Homaičendad

Irdkosketused

Kurtamišan municipaližen ümbrikon oficialine sait (kurtamyshsky.gosuslugi.ru). (ven.)

Kurtamiš Vikiaitas

	Kurganan agjan lidnad
	Dalmatovo \| Kataisk \| Kurgan \| Kurtamiš \| Makušino \| Petuhovo \| Šadrinsk \| Ščučje \| Šumih

[1] Kurtamišan pühäpertid sobory.ru-saital. (ven.)

[2] Kurtamišan filial Kurganan valdkundaližen universitetan kgsu.ru-saital. (ven.)

[3] Kurtamišan filial Kurganan pedagogižen kolledžan kpk.kss45.ru-saital. (ven.)

[1]

[2]

[3]