Petuhovo (lidn)

Petuhovo
Петухово
	Lidnanznam;
Valdkund	Venäma
Eläjiden lugu (2021)	8,502 ristitud
Pind	25 km²
Telefonkod	+7−35 235-xx-xxx
Avtokod	45
Aigvö	UTC+5 (MSK+2)

Petuhovo (ven.: Петухо́во) om Venäman lidn Kurganan agjan päivnouzmas. Se om Petuhovon ümbrikon (edel vn 2021 kezakud — rajonan) administrativižeks keskuseks da palaks.

Istorii

Eländpunktan aluz om pandud kuti Judino-žilo (ven.: село Юдино) vl 1779. Panihe Petuhovo-raudtestancijan alust vl 1892 i saudihe Transsiban «Kurgan — Omsk»-keskustad vodele 1894. Vn 1942 redukus kätihe Judinod radnikžiloks. Vn 1944 16. päiväl keväz'kud žilo sai lidnan statusad, udesnimitihe raudtestancijan mödhe.

Petuhovo šingotase valdkundaližen büdžetan sferan aluzkundoil, leibän kompanijal, konditerižiden tegesiden edheotandal, sauvondmaterialiden pästandal (mecan pilind da ümbriradmine, plastiktegesed sauvondan täht). Ende valamižmehanine tegim^[1] radoi (kärauzimed, vedimiden i raudterividen paloiden tehmine oli), se ei olend rados vspäi 2017, eli bankrotnendas läbi vl 2019, kompanii om likvidiruidud vn 2021 lopus.

Geografijan andmused

Lidn sijadase ümbrikon suven keskuzpalas, Išiman tazangištol, 135 m ü.m.t. keskmäižel korktusel.

Matkad Kazahstanan röunhasai (Pohjoižkazahstanan agj) om kümne kilometrad suvhe orhal vai 25 km päivlaskmha raud- i avtoteidme, röunmaverine palakund radab lidnas. Matkad Kurganhasai om 168 km päivlaskmha orhal, 187 km avtol vai raudtel. Lähembaižed lidnad oma Makušino 43 km päivlaskmha orhal, 55 km «Irtiš»-avtotrassadme (R-254) vai Transsib-raudtedme, i Mamlütk (Kazahstan) 44 km päivnouzmha orhal i Transsib-raudtedme vai 61 km avtotedme. «Irtiš»-trass om lidnan pohjoižröunaks.

Tobmuz

Petuhovon lidnankund oli ende, lidn oli sen üks'jäižeks eländpunktaks. Lidnankundan pind oli 40,76 km².

Lidnankundan Administracii om likvidiruidud vn 2023 sulakus. Aleksandr Gudkov radoi lidnan Administracijan pämehen vn 2017 redukuspäi, hän-žo oli sen likvidacižen laudkundan ohjandajan vn 2021 redukuspäi lophusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 11 292 ristitud, rajonan koume videndest, vn 2021 — 8 502 ristitud. Kaik 10 304 eläjad oli lidnas vl 2017. Kaikiš suremb lidnan ristitišt oli 15 100 eläjad vl 1996.

Rahvahad (2010): venälaižed — 94,0 %, kazahlaižed — 2,7 %, toižed rahvahad — 3,3 %.

Ortodoksižen hristanuskondan kaks' jumalanpertid^[2] oma saudud lidnas: Jumalannägundan (letihe vll 2009−2014) i puine ph. Mikulai-čudonsädajan kaumžomal (om vaumitud vll 2010−2015).

Lapsiden opendusen aluzkundad oma Kolobok-päivkodi, keskškol Ja.S. Kuleševan nimed, sädamižen pert', čomamahtoiden škol, lapsiden da norišton sportškol. Petuhovon maižandusen mehanizacijan da elektrifikacijan tehnikum^[3] om lidnan professionaližen opendusen aluzkundaks.

Homaičendad

Irdkosketused

Petuhovo (lidn) Vikiaitas

	Kurganan agjan lidnad
	Dalmatovo \| Kataisk \| Kurgan \| Kurtamiš \| Makušino \| Petuhovo \| Šadrinsk \| Ščučje \| Šumih

[1] Enččen Petuhovon valamižmehanižen tegimen sait (petlmz.45i.ru). (ven.)

[2] Petuhovon pühäpertid sobory.ru-saital. (ven.)

[3] Petuhovon maižandusen mehanizacijan da elektrifikacijan tehnikuman sait (ptmecx.ru). (ven.)

[1]

[2]

[3]