Makušino

Makušino
Макушино

Valdkund	Venäma
Eläjiden lugu (2024)	6,701 ristitud
Pind	25 km²
Telefonkod	+7−35 236-xx-xxx
Avtokod	45
Aigvö	UTC+5 (MSK+2)

Makušino (ven.: Макушино) om Venäman lidn Kurganan agjan päivnouzmas. Se om Makušinon ümbrikon (edel vn 2020 heinkud — rajonan) administrativižeks keskuseks da palaks.

Istorii

Eländpunktan aluz om pandud sirdanuziden manmehiden küläks 17. voz'sadan lopus. Saudihe Transsiban «Kurgan — Omsk»-palad vl 1894, i raudte läbiti Makušinod. Žilo kändihe järedaks 20. voz'sadan augotišes. Vn 1944 sulakus kätihe radnikžiloks. Vn 1963 23. päiväl uhokud žilo sai lidnan statusad.

Makušino šingotase argvointegimel, villänpurnuil i kombisötken tehmižel.

Geografijan andmused

Lidnan sijaduz rajonan i agjan kartal vl 2014

Lidn sijadase ümbrikon keskuzpalas, 140 m ü.m.t. keskmäižel korktusel. Vedhudetoi reskveden Vanh-järv (ven.: озеро Старое, 2,46 km²) om lidnan suvipäivlaskmas, täutase atmosferan sadegil.

Matkad Kurganhasai om 125 km päivlaskmha orhal, 141 km avtol vai raudtel. Lähembaine lidn om Petuhovo 43 km päivnouzmha orhal, 55 km «Irtiš»-avtotrassadme (R-254) vai Transsib-raudtedme. Trass om lidnan pohjoižröunaks.

Tobmuz

Makušino oli lidnankundan üks'jäižeks eländpunktaks. Lidnankundan pind oli 68 km².

Valerii Abakumov radoi lidnankundan pämehen vn 2009 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 8 338 ristitud, rajonan pol', vn 2021 — 6 827 ristitud. Kaik 7 810 eläjad oli lidnas vl 2017. Kaikiš suremb lidnan ristitišt oli 15 tuh. eläjid vl 1967.

Ortodoksižen hristanuskondan Mikoi-arhangelan jumalanpert' om pühästadud vl 2010. Sen ližaks Pühän Jumalanmaman Tulendan Pühäpertihe znamasine puine jumalanpert' kellčuhundusenke oli saudud vll 1897−1898, ei ole kaičenus.

Lapsiden opendusen aluzkundad oma viž nimitadud päivkodid, kaks' keskškolad (nomer 1 i 2), laps'aigan da norusen pert', čomamahtoiden škol, lapsiden da norišton sportškol. Kurganan bazižen medicinižen kolledžan Makušinon äiprofil'ne filial (ende erine tehnikum) om lidnan professionaližen opendusen aluzkundaks.

Irdkosketused

• Makušinon municipaližen ümbrikon tobmuden sait (makushinskij-r45.gosweb.gosuslugi.ru). (ven.)