Šumih (lidn)

Šumih
Шумиха
Lidnanznam;	Flag;
Valdkund	Venäma
Eläjiden lugu (2025)	16,045 ristitud
Pind	28,16 km²
Telefonkod	+7−35 245-xx-xxx
Avtokod	45
Aigvö	UTC+5 (MSK+2)

Šumih (ven.: Шуми́ха) om Venäman lidn Kurganan agjan päivlaskmas. Se om Šumihan ümbrikon (edel vn 2020 heinkud — rajonan) administrativižeks keskuseks da palaks.

Istorii

Eländpunktan aluz om pandud Transsiban raudtestancijaks vl 1892. Kätihe žilod stancijanno lidnaks vl 1944.

Šumih šingotase pörutügiden neglrolikoiden tegimel^[1], torvenarmaturan edheotandal i raudtelibutimiden tegimel, sömtegimištol (maidedheotandad, leibän i paštatesen pästand, villänpurnud i kombisötken tehmine), mebel'fabrik radab, mugažo uranan samižen edheotand baziruiše lidnas.

Geografijan andmused

Lidn sijadase ümbrikon suvipalan keskuses, Uralantagaižes, 170 m ü.m.t. keskmäižel korktusel.

Matkad Kurganhasai om 131 km päivnouzmha orhal, 146 km avtol vai raudtel. Lähembaine lidn om Ščučje koumekümne nell' kilometrad päivlaskmha orhal, 39 km «Irtiš»-avtotrassadme (R-254) vai Transsib-raudtedme. Trass om saudud kahtes kilometras lidnan pohjoižröunaspäi.

Tobmuz

Šumihan lidnankund oli olmas vll 2004−2020, lidn oli sen üks'jäižeks eländpunktaks.

Lidnankundan tobmuden pämez' oli sen Administracijan pämez'. Lidnan erigoittud Administracii om likvidiruidud vn 2022 elokus. Jäl'gmäine lidnan pämez' oli Anatolii Kozlov vn 2010 kül'mkuspäi, hän-žo radoi lidnan Administracijan likvidacižen laudkundan ohjandajan vn 2020 tal'vkuspäi. Lidnan Dum om pästtud radmaspäi vn 2021 semendkus, likvidator oli Julija Vodännikova vn 2020 kül'mkuspäi. Duman ezimehed oliba Galina Vasänovič (reduku 2019 — kül'mku 2020), Väčeslav Pospelov (radoi vn 2019 redukuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 17 819 ristitud, rajonan kaks' koumandest, vn 2021 — 16 264 ristitud. Kaik 17 542 eläjad oli lidnas vl 2017. Kaikiš suremb lidnan ristitišt oli 20..21 tuh. eläjid vll 1967−2001 (21 984 rist. vl 1989).

Ortodoksižen hristanuskondan kaks' jumalanpertid^[2] oma saudud lidnas: Pühän Jumalanmaman Emäganpäivän (saudihe vll 2000−2005) i Pühän Jumalanmaman Katken (2001−2015, letihe nevondkundaližes sauvusespäi). Vanh Jumalanmaman Katken jumalanpert' (oli saudud vll 1893−1900) ei ole kaičenus.

Openduz

Lapsiden opendusen aluzkundad oma seičeme nimitadud i nomeruidud päivkodid (nomer 1, 3, 9, 11, 12, 39, Solniško «Päiväine»), aluzškol (nomer 9), koume keskškolad (nomer 1, 3, 4), specialine (korrekcine) škol-internat 8. toižendan, muzikškol, čomamahtoine škol, lapsiden da norišton sportškol.

Šumihan agrariž-sauvondkolledž^[3] om lidnan professionaližen opendusen aluzkundaks.