Muroran

Muroran
室蘭市
Lidnanznam;	Flag;
Valdkund	Japonii
Eläjiden lugu (2024)	76,385 ristitud
Pind	80,88 km²
Pämez'	Takeši Aojama; (semendku 2011—)
Telefonkod	+81-(0)143
Aigvö	UTC+9

Muroran (japon.: 室蘭市 Muroran-si «Muroran-lidn») om lidn da meriport Japonijan pohjoižes, Hokkaido-prefekturan suvipäivlaskmas. Se om Iburi-alaprefekturan administrativižeks keskuseks da palaks.

Istorii

Macumae-klanan torguindfaktorii oli tetab niiš tahoiš 16. voz'sadan lopuspäi. Nimi libub ainun kelespäi, Mo Ruerani kändase «penen pautken alahaine pala». Eländpunktan aluz om pandud imperatoran käskön mödhe vl 1899 kuti joudjaline port torguimha AÜV:oidenke i Surenke Britanijanke, mugažo se oli meriport vemha ujuden kivihil't sijaližes löudmižsijaspäi.

Muroran šingotase raudan metallurgijal («Japan Steel Works»-kompanii), laivansauvomižel, kivivoin ümbriradmižel, cementan tehmižel.

Geografijan andmused

Lidn sijadase Iburi-alaprefekturan suvipäivlaskmas, Tünen valdmeren randan nemel.

Muroran röunatab Noboribecu-lidnanke pohjoižpäivnouzmas i Date-lidnanke lodehes. Matkad Sapporohosai om 88 km pohjoižhe-pohjoižpäivnouzmha orhal vai 128 km avtoteidme.

Klimat om ven valdmeren, pil'vekaz, kezakus i tal'vel eriližešti. Keza om neps läm', tal'v om pehmed. Voden keskmäine lämuz om +8,9 C°, kezakun +14,4 C°, heinkun-sügüz'kun +18,4..+20,6 C°, tal'vkun-keväz'kun −1,8..+1,4 C°. Ekstremumad oma −13,4 C° (viluku, uhoku) i +32,8 C° (heinku, eloku). Kezaaigan minimum om +4,6 C° (kezaku), tal'vaigan maksimum om +14,4 C° (tal'vku). Ei voi panda halad semendkus-sügüz'kus (semendkun minimum om 0 C°). Paneb sadegid 1189 mm vodes, enamba heinkus-sügüz'kus (157..187 mm kus), vähemba vilukus-keväz'kus (44..54 mm kus). Oleleb 157 sm lunt tal'ven 49 päiväs keskmäras. Kun keskmäine relätivine nepsuz vajehtase 80..90 % röunoiš semendkus-sügüz'kus, 70..75 % toižiš kuiš.

Eläjad

Vl 2013 lidnan eläjiden lugu oli 94 918 ristitud. Kaik 84 278 eläjad oli lidnas vl 2018. Kaikiš suremb lidnan ristitišt oli läz 160 tuhad eläjid vll 1965−1975.

Hokkaidon universitetan Algologijan tedoinstitut sijadase lidnas, om otnus meribiologijha. Üläopendusen seičeme aluzkundad ratas lidnas, ned oma Muroranan tehnologine unstitut i kuz' korktad školad: nell' valdkundališt da kaks' privatišt.

Irdkosketused

Lidnan oficialine sait (city.muroran.lg.jp). (jap.) (+ äikel'ne avtomatine känduz)

Muroran Vikiaitas