Narimanov (lidn)

Narimanov
Нариманов
Valdkund	Venäma
Eläjiden lugu (2021)	11,104 ristitud
Pind	27,62 km²
Pämez'	Vladimir Nazarov; (reduku 2019—)
Telefonkod	+7−85 171-xx-xxx
Avtokod	30
Aigvö	UTC+4 (MSK+1)

Narimanov (ven.: Нарима́нов) om Venäman lidn da lidnankund Astrahanin agjan suvipalas. Se om Narimanovan rajonan administrativine keskuz.

Istorii

Eländpunktan aluz om pandud vn 1963 21. päiväl sulakud kuti Vododelitel' -žilo otmaha kävutamižhe Volgan suhišton oiktad randpol't. Vn 1973 sügüz'kul vezijagajan padoseinän sauvond tuli lophu i laivoiden likund zavodihe sen kal't. Saudihe šlüzad vodele 1975. Udesnimitihe Nižnevolžskii-žilod nügüdläižikš Venäman kirjutajan da Azerbaidžanan NST:n Nariman Narimanov-pämehen (1870−1925) oiktastuseks da anttihe lidnan statusad vn 1984 19. päiväl redukud.

Narimanov šingotase laivansauvomižen «Lotos»-tegimel, geotekstilin «Geksa-Lotos» kompanijal, kalankazvatusen da melioracijan edheotandoil.

Geografijan andmused

Lidn sijadase Volg-jogen korktal oiktal randal, valdmeren tazopindan (0 m) keskmäižel korktusel.

Matkad Astrahanihesai om 45 km suvhe «Kaspii»-avtotedme (M6), ümbärdab lidnad päivlaskmaspäi. Kivivoinvalamižport om saudud lidnas.

Tobmuz

Narimanov om lidnankundan üks'jäižeks eländpunktaks.

Lidnankundan tobmuden pämez' om sen Nevondkundan ezimez'. Edeline Nevondkundan ezimez' om Aleksandr Nikitin (reduku 2016 — sügüz'ku 2019).

Eläjad

Vn 2010 Venäman rahvahanlugemižen mödhe lidnan eläjiden lugu om 11 521 ristitud, rajonan nelländez, vn 2021 — 11 104 ristitud. Kaik 11 118 ristitud elihe lidnas vl 2017. Kaikiš suremb lidnan ristitišt oli 12 300 eläjad vl 1998.

Rahvahad (enamba 0,4 % vl 2021): venälaižed — 69,1 %, kazahlaižed — 11,4 %, turkad-meshetilaižed — 3,2 %, totarlaižed — 2,0 %, turkad — 1,2 %, azerbaidžanlaižed — 0,9 %, kalmikalaižed — 0,8 %, čečenalaižed — 0,6 %, ukrainalaižed — 0,4 %, toižed rahvahad — 2,5 %, rahvahuden ozutandata — 7,9 %.

Ortodoksižen hristanuskondan Pühän Jumalanmaman Blagoveščenjan jumalanpert'^[1] om saudud vozil 2001−2012.

Lapsiden opendusen aluzkundad oma severz'-se päivkodid, keskškol (om ühtištadud severziš-se aluzkundoišpäi), rajonan lapsiden sädamižen pert', lidnan čomamahtoiden škol, rajonan lapsiden da norišton sportškol. Astrahanin proftehnologijoiden valdkundaližen kolledžan filial om lidnan professionaližen opendusen aluzkundaks.