Oktäbr'sk (Samaran agj)

Oktäbr'sk
Октябрьск

Lidnanznam	Flag
Valdkund	Venäma
Eläjiden lugu (2021)	20,703 ristitud
Pind	21,8 km²
Pämez'	Aleksandra Gožaja (kül'mku 2015—)
Telefonkod	+7−84 646-xx-xxx
Avtokod	63, 163
Aigvö	UTC+4 (MSK+1)

Sil sanal voib olda toižid znamoičendoid; miše nähta niid, tulgat tänna.

Oktäbr'sk (ven.: Октя́брьск) om Venäman lidn da lidnümbrik Samaran agjan päivlaskmas. Se om Sizranin päivnouzmaine ezilidn.

Istorii

Ezmäižed eländpunktad mainitasoiš lidnan territorijal vspäi 1684 — Kostiči (ven.: Костычи) i Voznesenskoje, niiden aluz oli pandud kaičemha Venäman territorijad nogailaižiden londoid vaste. Vspäi 1704 Batrakid (ven.: Батраки) oliba olmas holitamha ehtatint Volgas päliči, vl 1880 raudtesildan sauvojad paniba Oiged Volg-žilon (ven.: Правая Волга) alust, vspäi 1882 žilo Pečeran asfal'ttegimenno zavodihe (Pervomaiskii-radnikžilo vspäi 1925). Vl 1942 sätihe Sizranin Oktäbr'skii-rajonad kaikiš ülembakirjutadud eländpunktoišpäi. Se sai erižen lidnan statusad vn 1956 7. päiväl elokud.

Oktäbr'sk šingotase VAZ:an sol'miden ühthekeradamižen cehal, sauvondmaterialiden pästandal (keramzitantegim, plastikiknad), mugažo omblendfabrikal i transportan edheotandoil (jogivaldmad, vedimdepo).

Geografijan andmused

Lidn sijadase Volgan Saratovan vezivaradimen oiktal randal, 50 m ü.m.t. keskmäižel korktusel, vedase 27 km pidust' randad pol'-pol'toštkilometrižel šoidul. Volgaveren ülüden pautked oma ani pohjoižhe lidnaspäi.

Oktäbr'sk röunatab Sizranin rajonanke pohjoižes. Matkad Samarhasai om 96 km päivnouzmha orhal, 157 km avtotedme vai 115 km raudtedme. Lähembaine lidn om Sizran' ühtes kilometras päivlaskmha orhal, avtotedme vai raudtedme, lidnoiden keskused sijadasoiš kaks'kümnes kilometras toine toižespäi.

Ühtennimine Oktäbr'sk-raudtestancii (enččel Batrakid, om saudud vspäi 1877) radab «Samar — Sizran'»-keskustal. Toine raudtestancii lidnan territorijal om Oiged Volg, sen ližaks kuz' raudteplatformad i seižutezpunktad ratas sil-žo keskustal. Raudtesild ühtenzoitab lidnan keskuzpalad Volgan huranke randanke.

Tobmuz

Oktäbr'sk om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline Administracijan pämez' om Vladimir Čihirev, radoi vn 2015 kül'mkuhusai. Lidnan Duman ezimez' om Vladimir Revin vn 2010 kül'mkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 27 244 ristitud, vn 2021 — 20 703 ristitud. Kaik 26 478 eläjad oli lidnas vl 2017. Kaikiš suremb lidnan ristitišt oli 33..34 tuhad eläjid vll 1959−1970 (34 tuh. rist. vl 1967).

Rahvahad (2010): venälaižed — 93,1 %, totarlaižed — 1,4 %, ukrainalaižed — 1,3 %, saksalaižed — 1,1 %, toižed rahvahad — 3,1 %.

Nevondkundaližen aigan eländpunktan naižjumalankodi Smolenskan Jumalanmaman päjumalanpertinke siš oliba pandud mantazole. Ortodoksižen hristanuskondan kaks' jumalanpertid oma avaitud lidnas: Jumalanmaman Smolenskan jumalaižen (om saudud vll 1991−1993 vanhas pertišpäi) i Sündun Voznesenjan (letihe vodele 2014).

Lapsiden opendusen aluzkundad oma viž päivkodid (nomer 4, 5, 8, 9, 13), kaks' aluzškolad (nomer 2 i 5), nell' keskškolad (nomer 3, 8, 9, 11), kaks' čomamahtoiden školad (nomer 1 i 2), lapsiden da norišton sportškol. Oktäbr'skan sauvondan da holitišiden tehnologijoiden tehnikum V.G. Kubasovan nimed om lidnan professionaližen opendusen aluzkundaks.

Galerei

• 
  ZAGS (2005)
• 
  Jumalanmaman Smolenskan jumalaižen jumalanpert', vn 2013 nägu
• 
  Tegimištzon Volgan randal vl 2018
• 
  Železnodorožnik-kul'turkeskuz (2005, «raudteradnik»)
• 
  Sizranin (Aleksandran II) raudtesildan pala vl 2018
• 
  Oktäbr'sk-päraudtestancijan sauvuz vl 2008

Irdkosketused

• Lidnümbrikon tobmuden oficialine sait (oktyabrskadm.ru). (ven.)