Žigulövsk

Žigulövsk
Жигулёвск

Lidnanznam	Flag
Valdkund	Venäma
Eläjiden lugu (2024)	48,564 ristitud
Pind	60,8 km²
Pämez'	Il'ja Suhih (tal'vku 2021—)
Telefonkod	+7−84 862-xx-xxx
Avtokod	63, 163
Aigvö	UTC+4 (MSK+1)

Žigulövsk (ven.: Жигулёвск) om Venäman lidn Samaran agjan päivlaskmas, Tol'jattin suvine ezilidn. Se om agjan kudenz' lidn eläjiden lugun mödhe, Žigulövskan lidnümbrikon administrativine keskuz da päpala.

Istorii

Ende Otvažnoje- (vspäi 1840) i Morkvaši-žilod (tetihe vspäi 1647) oliba lidnan sijas. Žigulövskan aluz om pandud vl 1949 niiden ühtištusel samha kivivoid, nimitihe Žiguli-mägiden mödhe. Radnikžilo sai lidnan statusad vl 1952. Saudihe Volgan gidroelektrostancijad vll 1950−1957 türmatud mehiden vägil, möhemba udesnimitihe Žigulövskan GES:aks. Kivivoin varad lidnan ümbrištos tuliba lophu aigan mändes.

Žigulövsk šingotase sömtegimištol (leibtegim, konditerine kombinat), farmaceftižel tegimel, elektrusen tehmižel (Žigulövskan GES), mouckiven samižel i cementan pästandal.

Geografijan andmused

Lidnümbrikon sijaduz agjas vn 2010 kartal

Lidn sijadase Volgan Kuibiševan vezivaradimen oiktal randal, 70 m ü.m.t. keskmäižel korktusel. Eländfartalad seištas Žiguli-mägiden pohjanno.

Matkad Samarhasai om vižkümne koume kilometrad päivnouzmha-suvipäivnouzmha orhal, 93 km avtotedme vai raudtedme. Lähembaine lidn om Tol'jatti Volgan vastrandal, vides kilometras pohjoižhe kaikil teil GES:an padoseinän ülähädme (mülüb Žigulövskha). Žigulövsk-stancii radab lidnan suvipäivnouzmas «Tol'jatti — Sizran'»-raudtekeskustal.

Tobmuz

Kaik viž žilod mülüdas lidnümbrikho Žigulövskan ližaks. Lidnümbrikon pind — 94,15 km². Om ümbärtud Stavropolin rajonan territorijal, sen londuseližil kel'dtahoil.

Edeližed merad — lidnümbrikon pämehed oma Sergei Fedotov (keväz'ku 2020 — 2021), Dmitrii Holin (tal'vku 2018 — uhoku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 55 565 ristitud, lidnümbrikon — 60 303 ristitud, vn 2021 lidnan — 50 466 ristitud. Vl 2017 kaik 54 343 ristitud elihe lidnas i 58 747 ristitud kaikes lidnümbrikos. Kaikiš suremb lidnan ristitišt oli 53 tuhad eläjid vl 1973 i vajehtihe 54..57 tuhad eläjid röunoiš vll 2005−2017 (57 100 rist. vl 2008).

Rahvahad (ozutadud rahvahudenke vl 2010): venälaižed — 90,1 %, totarlaižed — 1,7 %, ukrainalaižed — 1,6 %, mordvinalaižed — 1,3 %, toižed rahvahad — 5,3 %.

Ortodoksižen hristanuskondan kaks' jumalanpertid oma saudud lidnas: ph. Joann Kronštadtalaižen (1997−1999) i Kijevan Vladimir-mitropolitan (1999). Islaman mečet' om sauvomižes i linneb avaitud vl 2023.

Openduz

Lapsiden opendusen aluzkundad oma päivkodid, koume aluzškolad (nomer 2, 3, 9), kahesa keskškolad (nomer 1, 6, 7, 8, 10, 13, 14, 16), škol-internat nomer 2, Venäman aznoičendoiden radnikoičendan ehtal'ne škol, kaks' čomamahtoiden školad (nomer 1 i 2), olimpižen varan sportškol nomer 3.

Žigulövskan valdkundaline kolledž (edel 2011. vot — radiotehnine tehnikum) om lidnan professionaližen opendusen aluzkundaks.

Galerei

• 
  Nevondkundaližen aigan lidnanznam
• 
  Lapsiden čomamahtoiden škol (2008)
• 
  Žigulövskan GES, vn 2011 nägu üläbjefaspäi
• 
  Ofissauvuz (2008, ende Kivivoin samižen ohjandusen pert')
• 
  Žigulövsk-päraudtestancii vl 2015

Irdkosketused

• Lidnümbrikon Duman oficialine sait (zhigu.samgd.ru). (ven.)
• Lidnümbrikon Administracijan oficialine sait (zhigulevsk.org). (ven.)