Pohvistnevo

Pohvistnevo
Похвистнево
Lidnanznam;	Flag;
Valdkund	Venäma
Eläjiden lugu (2021)	27,333 ristitud
Pind	64,77 km²
Pämez'	Sergei Popov; (tal'vku 2015—)
Telefonkod	+7−84 656-xx-xxx
Avtokod	63, 163
Aigvö	UTC+4 (MSK+1)

Pohvistnevo (ven.: По́хвистнево, čuv.: Похвиҫнӗ, tot.: Похвистнево / Котлыгош) om Venäman lidn Samaran agjan päivnouzmas. Se om Pohvistnevon lidnümbrikon administrativine keskuz, om Pohvistnevon rajonan administrativižeks keskuseks mugažo, ei mülü sihe.

Istorii

Eländpunktan aluz om pandud vn 1888 8. päiväl sügüz'kud kuti žilo raudtestancijanno udel «Samar — Uf»-keskustal. Nimitihe bajarišton Pohvisnevad-rodun kanzannimen mödhe, Pohvist (Pozvizd) om il'man i sän jumal päivlaskmaižil slavilaižil.

Avaitihe kivivoin löudmižsijid rajonas, i radnikžilo sai lidnan statusad vn 1947 19. päiväl elokud.

Pohvistnevo šingotase mašinansauvomižen tegimel (pörutüged, piikezrad, pol'vvärtmuded), sauvondmaterialiden tegimel, sömtegimištol (lihan ümbriradmižen tegim, jauhtegim), kombisötken tegimel i vagonkohendusen edheotandal.

Geografijan andmused

Lidn sijadase ümbärdajan rajonan päivnouzmaiženno röunanno, Sur' Kinel'-jogen keskjoksmusen hural randal (ven.: Большо́й Кине́ль 422 km pitte, Samar-jogen oiged ližajogi), 80 m ü.m.t. keskmäižel korktusel, vedase läz kümned kilometrad pidust' joged. Röunatab Orenburgan agjanke päivnouzmas.

Matkad Samarhasai om 142 km päivlaskmha-suvipäivlaskmha orhal, 153 km avtotedme vai raudtedme. Lähembaine lidn om Buguruslan (Orenburgan agj) üks'toštkümnes kilometras päivnouzmha röunhasai orhal vai kaikil teil.

Tobmuz

Oktäbr'skii-žilo (1033 rist. vl 2017) mülüb lidnümbrikho Pohvistnevon ližaks.

Lidnümbrikon pämez' om sen Administracijan pämez'. Edeline lidnümbrikon pämez' om Nikolai Vazlev, radoi edel vn 2015 tal'vkud. Lidnan Duman ezimez' om Aleksandr Šulaikin vn 2005 heinkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 28 169 ristitud, lidnümbrikon — 29 261 ristitud, vn 2021 lidnan — 27 333 ristitud. Kaik 28 223 ristitud elihe lidnas i 29 256 ristitud kaikes lidnümbrikos vl 2017. Vspäi 1989 lidnan ristitišt om kaikiš suremb i vajehtase 27..28 tuhad eläjid röunoiš (28 600 rist. vl 1996).

Rahvahad (ozutadud rahvahudenke vl 2010): venälaižed — 66,3 %, čuvašalaižed — 11,7 %, totarlaižed — 11,1 %, mordvinalaižed — 6,3 %, ukrainalaižed — 1,1 %, saksalaižed — 1,0 %, toižed rahvahad — 2,5 %.

Ortodoksižen hristanuskondan kaks' pühäpertid^[1] oma avaitud lidnas: Jumalanmaman Tabinin jumalaižen päjumalanpert' (om letud vll 1988−2010), Kirill i Marija Radonežalaižiden jumalanpert' (om saudud vll 2019−2021). Islaman kaks' mečetid ratas lidnas.

Openduz

Lapsiden opendusen aluzkundad oma viž nimitadud päivkodid, aluzškol nomer 4, koume keskškolad (nomer 1, 3, 7), gimnazii S. V. Baimenovan nimed i lapsiden ližaopendusen keskuz sen alusel sädamižen «Piruet»-keskusenke, čomamahtoiden škol, lapsiden da norišton sportškol.

Pohvistnevo-lidnan gubernine kolledž^[2] om professionaližen opendusen aluzkundaks.

Galerei

Jumalanmaman Tabinin jumalaižen päjumalanpert', vn 2018 nägu
Islaman pühäpert, vn 2009 nägu
Pohvistnevo-raudtestancijan sauvuz vl 2021

Homaičendad

Irdkosketused

Pohvistnevo Vikiaitas

	Samaran agjan lidnad
	Čapajevsk \| Kinel' \| Neftegorsk \| Novokuibiševsk \| Oktäbr'sk \| Otradnii \| Pohvistnevo \| Samar \| Sizran' \| Žigulövsk \| Tol'jatti

[1] Pohvistnevon pühäpertid sobory.ru-saital. (ven.)

[2] Pohvistnevo-lidnan gubernižen kolledžan sait (phvcollege.ru). (ven.)

[1]

[2]