Buguruslan

Buguruslan
Бугуруслан

Lidnanznam
Valdkund	Venäma
Eläjiden lugu (2017)	49 585 ristitud
Pind	76,46 km²
Pämez'	Vladimir Ber (keväz'ku 2 013—)
Telefonkod	+7-35 352-xx-xxx
Avtokod	56
Aigvö	UTC+5 (MSK+2)

Lidnan islaman pühäpert' vn 2006 sügüz'kus.

Buguruslan (ven.: Бугуруслан, tot.: Богырыслан) om Venäman lidn da lidnümbrik Orenburgan agjan lodehes. Se om Buguruslanan rajonan administrativižeks keskuseks, ei mülü rajonha.

Istorii

Eländpunktan aluz om pandud vl 1748. Se sai makundan lidnan statusad vl 1781. Ühtennimine raudtestancii om olmas «Samar — Uf»-jonol vspäi 1888. Buguruslan šingotase kivivoin da gazan samižen i ümbriradmižen edheotandoil vspäi 1936, mugažo sömtegimišton edheotandad ratas (lihakombinat, jauhkombinat).

Geografijan andmused

Lidn sijadase Sur' Kinel'-jogen (ven.: Большой Кинель, tot.: Олы Кенәле, Volgan hurapol'ne bassein) da sen huran Konduzl-ližajogen (ven.: Кондузла) kaikil randoil, Bugul'man da Belebein ülüden suvipautkil, 80 m ü.m.t. keskmäižel korktusel. Matkad Orenburghasai om 270 km suvipäivnouzmha orhal vai 355 km avtotedme. Lähembaine lidn om Pohvistnevo (Samaran agj) 22 km päivlaskmha kaikil teil, järedad lidnad — Samar 165 km päivlaskmha avtotedme i Oktäbr'skii 135 km pohjoižpäivnouzmha avtol.

Nell' pen't žilod da 2 raudtesarakod mülüdas lidnümbrikho Buguruslanan ližaks. Lidnümbrikon pind — 76,46 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 49 741 ristitud, lidnümbrikon — 50 226 ristitud. Ristitišt vajehtase 49..55 tuhad röunoiš vspäi 1970 (55 400 rist. vl 2000). Vl 2017 kaik 50 004 eläjad oli lidnümbrikos.

Rahvahad (enamba 1% vl 2010, ozutadud rahvahudenke): venälaižed — 67,1%, totarlaižed — 10,3%, mordvinalaižed — 10,0%, ukrainalaižed — 1,6%, saksalaižed — 1,3%, toižed rahvahad — 9,7%.

Professionaližen opendusen aluzkundad: Buguruslanan kivivoin, medicinine, pedagogine kolledžad i civiližen aviacijan lendimškol (kolledž), maižanduztehnikum, mugažo Samaran tehnižen universitetan filial.

Irdkosketused

• Municipaližen «Buguruslan-lidn»-ühtnikan tobmuden aluzkundoiden oficialine sait (bugadmin.orb.ru). (ven.)