Novotroick

Novotroick
Новотроицк
Lidnanznam;	Flag;
Valdkund	Venäma
Eläjiden lugu (2025)	73,994 ristitud
Pind	84,21 km²
Pämez'	Denis Men'šikov; (kezaku 2023—)
Telefonkod	+7−3537-xxx-xxx
Avtokod	56
Aigvö	UTC+5 (MSK+2)

Novotroick (ven.: Новотро́ицк) om Venäman lidn da lidnümbrik Orenburgan agjan suvipäivnouzmas.

Istorii

Eländpunktan aluz om pandud vl 1920 kuti futoriden ühtištuz. Saudihe raudan metallurgijan kombinatad sijaližel torhudel vozil 1931−1955 (vspäi 1992 «Uralan Teraz»-edheotand). Vl 1945 ühtištadihe Novo-Troick-žilod lähiženke Akkermanovk-žilonke (ven.: Аккермановка) da anttihe lidnan statusad.

Novotroickan toižed edheotandad oma hromühtnendoiden tegim i sauvondmaterialiden kompanijad (cement, raudbeton, šebin', pilindmaterialad).

Geografijan andmused

Novotroickan lidnümbrikon sijaduz agjas vn 2022 kartal

Lidn sijadase Uralanjogen oiktal randal, 200 m ü.m.t. keskmäižel korktusel.

Röunatab Kazahstananke. Matkad Orenburghasai om 276 km päivlaskmha, Orskan röunhasai — nell' kilometrad päivnouzmha.

Tobmuz

Novotroick jagase kahteks rajonhaks (Päivlaskmaine i Keskuzrajon), sen ližaks om severz'-se lidnanlaptid. Kaik seičeme žilod, raudtesarak i Guberl'-raudtestancii mülüdas lidnümbrikho. Lidnümbrikon pind — 352,34 km².

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Dmitrii Bufetov (semendku 2018 — kezaku 2023), Jurii Araskin (reduku 2015 — kül'mku 2017). Lidnümbrikon Deputatoiden nevondkundan ezimez' om Ivan Filippov vn 2023 keväz'kuspäi. Edeline lidnan nevondkundan ezimez' om Andrei Mezencev, radoi edel vn 2023 keväz'kud.

Eläjad

Vn 2010 Venäman rahvahanlugemižen mödhe lidnan eläjiden lugu oli 98 173 ristitud, lidnümbrikon — 105 367 ristitud. Vn 2021 rahvahanlugemižen mödhe lidnan ristitišt oli 75 960 eläjad, lidnümbrikon — 81 035 eläjad. Vl 2017 kaik 88 216 ristitud elihe lidnas i 95 139 ristitud kaikes lidnümbrikos. Kaikiš suremb lidnan ristitišt oli 109..111 tuhad eläjid vozil 1994−2001 (111 tuh. rist. vl 1996).

Ortodoksižen hristanuskondan kuz' pühäpertid^[1] oma kaičenus i saudud lidnas: phh. Pedroin i Pauloin päjumalanpert' (om saudud vll 1994−2000), nell' jumalanpertid i časoun'. Islaman pühäpert' om avaitud.

Openduz

Lapsiden opendusen aluzkundad (lidnümbrikon žiloidenke) oma koumekümne nimitadud i nomeruidud päivkodid (nomer 1..3, 6, 8..10, 12..15, 17, 18, 20..26, 29..31, 33, 35, 37..39 i kaks' nomerata žiloiš), kaks' aluzškolad (nomer 2 Akkernanovk-žilos i 20 Guberl'-stancijal), koumetoštkümne keskškolad (nomer 3..7, 10, 13, 15..18, 22, 23), gimnazii nomer 1, licei nomer 1, lapsiden da norišton sädamižen šingotesen keskuz, čomamahtoiden škol, nell' sportškolad (nomer 1 i 2, «Spartak», Junost' «Nor'aig»), noriden tehnikanradajiden, londusentedajiden i turistoiden stancijad üksin.

Novotroickan politehnine kolledž^[2] i Novotroickan sauvondtehnikum^[3] oma lidnan professionaližen opendusen aluzkundoikš.

Transport

Tramvaid, avtobusad i maršrutkid oma kundaližeks transportaks lidnas, ezilidnelektrojonused ühtenzoittas lähižidenke lidnoidenke.

Novotroick-raudtestancii sijadase «Orenburg — Orsk»-jonol. Lähembaine rahvahidenkeskeine Orsk-lendimport radab 17 km suvhe.

Galerei

Metallurgoiden kul'turkeskuz (2020)
Phh. Pedroin i Pauloin päjumalanpert', vn 2021 nägu
Novotroickan sauvondtehnikum (2020)
Pobeda-jäpert'kulu (2017, «Vägestuz»)
Novotroick-päraudtestancijan sauvuz vl 2017

Homaičendad

Irdkosketused

Novotroickan tobmuden sait (novadmin.orb.ru) i sen vanh versii (novotroitsk.orb.ru, om täuttud vn 2023 kezahasai). (ven.)

Novotroick Vikiaitas

	Orenburgan agjan lidnad
	Abdulino \| Buguruslan \| Buzuluk \| Gai \| Jasnii \| Kuvandik \| Mednogorsk \| Novotroick \| Orenburg \| Orsk \| Sol'-Ileck \| Soročinsk

[1] Novotroickan pühäpertid sobory.ru-saital. (ven.)

[2] Novotroickan politehnižen kolledžan sait (npk56.ru). (ven.)

[3] Novotroickan sauvondtehnikuman sait (nst-56.ru). (ven.)

[1]

[2]

[3]