Pen' Višer

Pen' Višer
Малая Вишера
Lidnanznam;	Flag;
Valdkund	Venäma
Eläjiden lugu (2021)	9,996 ristitud
Pind	29 km²
Pämez'	Mihail Tašči; (reduku 2014—)
Telefonkod	+7−81 660-xx-xxx
Avtokod	53
Aigvö	UTC+3 (MSK+0)

Pen' Višer (ven.: Ма́лая Ви́шера) om Venäman lidn da lidnankund Uz'lidnan agjan pohjoižes. Se om Penen Višeran rajonan administrativine keskuz.

Istorii

Eländpunktan aluz om pandud vl 1843 sauvomha «Moskv — Piter»-raudted i žiloks raudtestancijanno, nimitihe jogen mödhe. Vl 1879 Venäman ezmäine telefonpagin tegihe veimil Piterinke. Žilo sai lidnan statusad vl 1921. Suren sodan aigan lidn oli okkupiruidud penemb mi ühteks kuks (24. reduku − 20. kül'mku 1941).

Pen' Višer šingotase sauvondmaterialiden pästandal (mecümbriradmine) i stökolantegimel (tehnižed tegesed i substancijad), mugažo ventilätortegim, omblend- i mebel'edheotandad ratas.

Geografijan andmused

Lidnan sijaduz rajonas i agjas vn 2006 kartal

Lidn sijadase Pen' Višerk-jogen randoil (ven.: Ма́лая Ви́шерка 54 km pitte, Olhavan oigedpol'ne bassein), 65 m ü.m.t. keskmäižel korktusel.

Matkad Surhe Uz'lidnhasai om 65 km suvipäivlaskmha orhal vai 90 km avtotedme. Lähembaine lidn om Čudovo 44 km lodeheze orhal vai raudtel, 70 km avtol.

Tobmuz

Kaik seičeme pen't küläd mülüdas lidnankundha Penen Višeran ližaks, znamasine om Glutno-külä (117 rist. vl 2020). Lidnankundan pind — 844,35 km².

Lidnankundan Deputatoiden nevondkund kogoneb 15 ezitajaspäi. Lidnankundan erigoittud Administracii om likvidiruidud vn 2014 sügüz'kus. Vadim Fadeev radoi sen jäl'gmäižen pämehen vn 2012 keväz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 12 461 ristitud, lidnankundan — 12 654 ristitud, rajonan koume nelländest, vn 2021 lidnan — 9 996 ristitud. Vl 2017 kaik 11 015 ristitud elihe lidnas i 11 186 ristitud kaikes lidnankundas. Kaikiš suremb lidnan ristitišt oli 17 620 eläjad vl 1939 i 16 109 eläjad vl 1959.

Ortodoksižen hristanuskondan nell' pühäpertid^[1] oma avaitud lidnas: kaks' jumalanpertid i kaks' časounäd.

Lapsiden opendusen aluzkundad oma nell' nimitadud päivkodid, kaks' keskškolad (nomer 1 i 4), ližaopendusen Sozvezdije-keskuz («tähthišt»), čomamahtoiden škol, Arena MV-sportškol. Penen Višeran tehnikum^[2] om lidnan professionaližen opendusen aluzkundaks.