Sol'ci

Sol'ci
Сольцы
Lidnanznam;	Flag;
Valdkund	Venäma
Eläjiden lugu (2017)	8,995 ristitud
Pind	10,15 km²
Pämez'	Igor' Kolesov; (kül'mku 2016—)
Telefonkod	+7−81 655-xx-xxx
Avtokod	53
Aigvö	UTC+3 (MSK+0)

Sol'ci (ven.: Сольцы) om Venäman lidn da lidnankund Uz'lidnan agjan päivlaskmas. Se om Sol'cin rajonan administrativine keskuz.

Istorii[redaktiruida | redaktiruida purde]

Eländpunkt mainitase ezmäižen kerdan Uz'lidnan aigkirjas vl 1390, eläjad saiba keitandsolad purtkišpäi. Sol'ci-raudtestancii om «Piter — Vitebsk»-jonol vspäi 1904. Posad sai lidnan statusad vl 1914. Edel Toist mail'man sodad mineralveziden kurort sijazihe täs.

Lidn oli okkupiruidud Suren sodan aigan (14−16 i 22. heinku 1941 — 21. uhoku 1944). Vl 1975 ühtenzoittihe lähižid eländpunktoid lidnanke. Lidn šingotase elektrotehnižel «Ellips»-tegimel (magnitveimed, transformatorad, drosselid) i sömtegimištol (leibtegim, maidtegim), mugažo turizmal.

Geografijan andmused[redaktiruida | redaktiruida purde]

Lidn sijadase Šelon'-jogen hural randal tobjimalaz (vanh. ven.: Шалонь, Il'mjärven bassein), 30 m ü.m.t. keskmäižel korktusel. Matkad Surhe Uz'lidnhasai om 72 km pohjoižpäivnouzmha orhal vai 78 km avtotedme. Lähembaine lidn om Dno (Pskovan agj) 40 km suvipäivlaskmha orhal vai raudtel, 60 km avtol. Bombardiruilendimiden Sol'ci-sodail'mbaz om 2 km pohjoižhe lidnaspäi.

Jogol'nik- (66 rist. vl 2010) i Dubec- (3 rist. vl 2010) küläd mülüdas lidnankundha Sol'cin ližaks. Lidnankundan pind — 39,84 km².

Eläjad[redaktiruida | redaktiruida purde]

Vn 2010 Venäman rahvahanlugemižen mödhe lidnan eläjiden lugu oli 10 086 ristitud, lidnankundan — 10 155 ristitud, rajonan kaks' koumandest. Kaikiš suremb lidnan ristitišt oli 12 900 eläjad vl 1998. Vl 2017 kaik 9 052 ristitud elihe lidnankundas.

Ortodoksižen hristanuskondan Illä-endustajan päjumalanpert' (kivine — 1824−1825) i Jumalanmaman Katken puine jumalanpert' (18. voz'sada), vanhuskolaižiden loičendpert', torgovanoiden erižpertid da laukad oma kaičenus lidnas.