Dno

Dno
Дно

Lidnanznam
Valdkund	Venäma
Eläjiden lugu (2020)	7,381 ristitud
Pämez'	Gennadii Jaružnii (reduku 2015—)
Telefonkod	+7−81 135-xx-xxx
Avtokod	60
Aigvö	UTC+3 (MSK+0)

Dno (ven.: Дно) om Venäman lidn da raudtesol'm Pskovan agjan keskuzpalan päivnouzmas. Se om Dnon rajonan i lidnankundan administrativine keskuz.

Istorii

Ezmäižed küläd mainitasoiš Uz'lidnan aigkirjas 15. voz'sadan augotišel, nimitihe niid Sur' Dno (ven.: Дно Большое) i Penemb Donce (ven.: Донце Меньшое). 19. voz'sadan lopus läz 600 ristitud elihe Dno-küläs (vai Donščin, ven.: Донщина), se šingotaškanzihe raudtestancijaks «Piter — Vitebsk»- i «Pskov — Bologoje»-jonoil.

Vl 1925 Dno sai lidnan statusad. Eläjiden enambuz radab raudten edheotandoiš tähäsai, mugažo saudihe astjoiden tegint i abrazivtegint.

Geografijan andmused

Lidn sijadase penen Suhovk-jogen randoil (ven.: Суховка, Šelon'-jogen i Il'mjärven bassein), 70 m ü.m.t. keskmäižel korktusel. Om 95 km päivlaskmha matkad Pskovhasai orhal vai 110 km avtotedme. Lähembaine lidn om Porhov 26 km päivlaskmha orhal, raudtedme vai avtotedme. Molembad raudtejonod ühtenzoitasoiš lidnan röunoiš, Dno-raudtestancii om olmas.

Kaik 43 pen't küläd da üks' futor mülüdas lidnankundha Dnon ližaks vspäi 2015. Lidnankundan pind — 13,82 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 9 061 ristitud (rajonan ristitišton kaks' koumandest), lidnankundan — 9 183 ristitud (ližaduihe kaks' küläd futoranke edel 2015. vot). Kaikiš suremb lidnan ristitišt oli 12 400 eläjad vl 1992. Vl 2017 kaik 7 855 ristitud elihe lidnas i 8 677 ristitud kaikes lidnankundas.

Ortodoksižen hristanuskondan koume pühäpertid oma lidnas: Mikoi-arhangelan pühäpert' (saudihe vll 1821−1825), Stroican časoun', i Cariližiden moknikoiden jumalanpert' om sauvomas vspäi 2017.

Dnon raudtetehnikum om lidnan professionaližen opendusen aluzkundaks.

Galerei

• 
  Muštnik Suren sodan vägimehile (2008)
• 
  Mikoi-arhangelan jumalanpert', vn 2013 nägu
• 
  Puruvedim-muštnik (2010)
• 
  Dno-1-raudtestancijan sauvusen i perronan nägu vl 2012

Irdkosketused

• Municipaližen «Dno»-ühtnikan lehtpoled Dnon rajonan tobmuden aluzkundoiden saital (dno.reg60.ru). (ven.)