Novosokol'niki

Novosokol'niki
Новосокольники

Lidnanznam
Valdkund	Venäma
Eläjiden lugu (2021)	6,895 ristitud
Pind	16,14 km²
Pämez'	Nikolai Naumov (2006—)
Telefonkod	+7−81 144-xx-xxx
Avtokod	60
Aigvö	UTC+3 (MSK+0)

Novosokol'niki (ven.: Новосоко́льники) om Venäman lidn, lidnankund da raudtesol'm Pskovan agjan suves. Se om Novosokol'nikin rajonan administrativižeks keskuseks da palaks.

Istorii

Eländpunktan aluz om pandud vl 1901 žiloks sauvomha ühtennimišt raudtestancijad, kudamb oli avaitud sil-žo vodel. Vn 1925 kezakun 6. päiväl anttihe lidnan statusad VCIK:an dekretan mödhe.

Toižen mail'man sodan aigan lidn oli okkupuruidud Germanijan nacistižil sodavägil vozil 1941 (25. heinku) — 1944 (29. viluku).

Novosokol'nikin tegimišton sarakod oma sauvondmaterialiden tehmine (šebin'tegim), sömtegimišt (leibkombinat), mugažo raudten depod i Nevelin omblendühtelmasen filial oma saudud lidnas.

Geografijan andmused

Novosokol'nikin sijaduz rajonas vn 2010 kartal

Lidn sijadase rajonan suvipäivnouzmas, Pen' Udrai-jogen randal (ven.: Малый Удрай 18 km pitte, Il'mjärven bassein), Bežanican ülüden suvipautkenno, 135 m ü.m.t. keskmäižel korktusel.

Matkad Pskovhasai om 195 km orhal vai 245 km avtotedme. Lähembaine lidn om Velikije Luki kaks'kümnes vides kilometras päivnouzmha orhal, avtotedme vai raudtedme. «Moskv — Rig»- i «Piter — Kijev»-raudtejonod ristikoičesoiš lidnas. «Moskv — Rig»-avtote (M9 Venämas, A12 Lätanmas) om lidnan suviröunaks.

Tobmuz

Novosokol'niki om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'.

Eläjad

Vn 2010 Venäman rahvahanlugemižen mödhe lidnan eläjiden lugu oli 8,119 ristitud, rajonan ristitišton viž ühesandest, vn 2021 — 6,895 ristitud. Kaik 7,378 eläjad oli lidnas vl 2017. Kaikiš suremb lidnan ristitišt oli 10,600 eläjad vll 1992−1996.

Rahvahad (enamba 0,4 % vl 2021): venälaižed — 95,8 %, ukrainalaižed — 0,5 %, vaugedvenälaižed — 0,5 %, armenijalaižed — 0,5 %, čiganalaižed — 0,4 %, toižed rahvahad — 0,4 %, rahvahuden ozutandata — 1,9 %.

Ortodoksižen hristanuskondan kaks' pühäpertid oma avaitud lidnas: puine ph. Mikulai-čudonsädajan jumalanpert' (se oli-ki puine vspäi 1912, nügüdläine om saudud vll 1992−1996) i kivine Joann-edelkävujan časoun' (letihe vll 2006−2007).

Openduz

Lapsiden opendusen aluzkundad oma lidnan päivkodi, Novosokol'nikin keskškol, rajonan ližaopendusen keskuz, lidnan čomamahtoiden škol, Novosokol'nikin lapsiden da norišton sportškol.

Professionaližen opendusen aluzkundad ratas lähembaižiš lidnoiš.

Galerei

• 
  Sild jaugnikoiden täht läz päraudtestancijad
• 
  Lauk vagzalanno vl 2008
• 
  Kul'turkeskuz (2010)
• 
  Novosokol'niki -päraudtestancijan sauvuz vl 2010

Irdkosketused

• Lidnankundan tobmuden sait (novosokolniki-gp.gosuslugi.ru). (ven.)
• Lidnankundan lehtpoled Novosokol'nikin rajonan tobmuden saital (novosokolniki.reg60.ru). (ven.)