Porhov

Porhov
Порхов

Lidnanznam
Valdkund	Venäma
Eläjiden lugu (2020)	8,347 ristitud
Pämez'	Vladimir Aleksejev (2017—)
Telefonkod	+7−81 134-xx-xxx
Avtokod	60
Aigvö	UTC+3 (MSK+0)

Porhov (ven.: По́рхов) om Venäman lidn da lidnankund Pskovan agjan keskuzpalan päivnouzmas. Se om Porhovan rajonan administrativine keskuz.

Enzne

Eländpunktan aluz om pandud vl 1239 pulidnuseks lidnan statusanke, nimitihe Porhovan lidneihut (ven.: Порховский городок). Vl 1387 uz' kivine lidnuz om saudud, om kaičenus hüvin, kävutadas muzejaks. Mülüi Venäman 12 kaikiš znamasižembha lidnushe ühtenzoitusen jäl'ghe Uz'lidnan tazovaldkundanke vl 1478. Panihe makundan lidnaks Uz'lidnan gubernijan Pskovan agjaha vl 1777, oli Pskovan gubernijas vspäi 1796.

Porhovan ižandusen päsarak om sömtegimišt (argvoin da saguden tegim). Sadas mouckivid lidnan ümbrištos.

Geografijan andmused

Lidn sijadase Šelon'-jogen randoil (Il'mjärven bassein), 55 m ü.m.t. keskmäižel korktusel. Šelon' jokseb suvespäi pohjoižhe, läbitab lidnan keskust. Matkad Pskovhasai om 70 km päivlaskmha orhal, raudtedme vai 85 km avtotedme. Lähembaine lidn om Dno 26 km päivnouzmha orhal, raudtedme vai avtotedme.

Porhov om lidnankundan üks'jäine eländpunkt.

Eläjad

Vn 2010 Venäman rahvahanlugemižen mödhe lidnan eläjiden lugu oli 10 608 ristitud, rajonan ristitišton pol'. Kaik 8 926 eläjad oli lidnas vl 2017. Kaikiš suremb lidnan ristitišt oli 14 400 eläjad vl 1992.

Ortodoksižen hristanuskondan viž jumalanpertid om kaičenus, niiden keskes kaks' oma väges. Časoun' om saudud koncentracižen «Dulag-100»-oigenduzlagerin (eloku 1941 — uhoku 1944) i kadodud kahten päjumalanpertin muštho.

Dedovičin äiprofil'žen tehnikuman Porhovan filial om lidnan professionaližen opendusen aluzkundaks, edel vn 2015 heinkud Porhovan maižanduztehnikum radoi.

Transport

Avtobusad oma kundaližeks transportaks lidnas. Lidn om avtotesol'meks, kaik transport läbitab lidnan keskust.

Porhov-raudtestancii i 580 km-platform oma lidnan südäimes «Pskov — Bologoje»-jonol.

Galerei

• 
  Porhovan lidnuz, vn 2018 nägu ülähänpäi
• 
  Ph. Mikulain čuhunduz i ühtennimine jumalanpert' Porhovan lidnuses, vn 2018 nägu
• 
  Lämoipalonvastaine palakund (2018)
• 
  «Rodina»-kul'turkeskuz («Kodima») vl 2010
• 
  Raudasine avtotesild Šelon'-joges päliči (2018, om saudud 1905, oli poukahtadud vn 1941 kezal)

Irdkosketused

• Lidnankundan lehtpoled Porhovan rajonan tobmuden aluzkundoiden oficialižel saital (porhov.reg60.ru). (ven.)