Pustošk

Pustošk
Пустошка
	Lidnanznam;
Valdkund	Venäma
Eläjiden lugu (2021)	4,070 ristitud
Pind	10,51 km²
Pämez'	Larisa Solovjova; (heinku 2023—)
Telefonkod	+7−81 142-xx-xxx
Avtokod	60
Aigvö	UTC+3 (MSK+0)

Pustošk (ven.: Пусто́шка) om Venäman lidn da lidnankund Pskovan agjan suves. Se om Pustoškan rajonan administrativine keskuz (vspäi 1927).

Istorii

Om severz'-se neolitan kaivandusid, löutihe käpid da lidneihuziden jändusid lidnan ümbrištos (1. voz'tuha edel m.e. — 1. voz'tuha meiden erad). Eländpunktan aluz om pandud žiloks ühtennimiženno raudtestancijanno (om avaitud vn 1900 sügüz'kul) «Moskv — Rig»-keskustal vl 1901. Ende pustolän oli žilon sijas, nimitihe äjiden agjan küliden kartte. Edel revolücijad puine jumalanpert' oli olmas žilos. Pustošk sai lidnan statusad vl 1925.

Vozil 1941 (16. heinku) — 1944 (27. uhoku) lidn oli bombardiruidud da okkupiruidud nacistižen Germanijan sodavägil, sen aigan muretihe kaikid lidnan sauvusid täuzin i amptihe tuhid eläjid. Toižen mail'man sodan jäl'ghe udessündutihe lidnad.

Pustoškan ižandusen sarakod oma sauvondmaterialiden pästand (mecan ümbriradai tegimištkombinat) da sömtegimišt (leibkombinat).

Geografijan andmused

Lidn sijadase rajonan keskuzpalas, Krupejan järven da Krupei-jogen randoil (ven.: Крупея, mž. Крупянка alajoksmuses, Sur'-jogen i Peipusjärven bassein), 160 m ü.m.t. keskmäižel korktusel.

Matkad Pskovhasai om 177 km pohjoižhe orhal vai 190 km avtotedme. Lähembaižed lidnad oma Nevel' 50 km suvipäivnouzmha avtotedme i Sebež 60 km päivlaskmha avtotedme vai raudtedme.

Klimat om ven, meren i kontinentaližen klimatan röunal. Voden keskmäine lämuz om +7,0 C°, kezakun-elokun +18,0..+19,3 C°, tal'vkun-uhokun −3,0..−4,5 C°. Ekstremumad oma −40,6 C° (tal'vku, viluku) i +37,0 C° (eloku). Kezaaigan minimum om −0,1 C° (kezaku), tal'vaigan maksimum om +12,3 C° (uhoku). Ei voi panda halad heinkus-elokus (elokun minimum om +1,3 C°). Paneb sadegid 708 mm vodes, enamba semendkus-sügüz'kus (70..88 mm kus), vähemba uhokus-sulakus (32..35 mm kus). Il'man keskmäine vozne relätivine nepsuz om 83 %.

Tobmuz

Pustošk om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden suiman ezimez'. Edeline lidnan suiman ezimez' om Oksana Bugräkova (2015 — kezaku 2023). Lidnankundan Administracijan pämez' om Marina Gruzdeva vn 2023 semendkuspäi. Edeližed lidnan Administracijan pämehed oma Jurii Kravcov (viluku 2021 — semendku 2023), Aleksandr Tarbenok (radoi vn 2020 redukuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 4 619 ristitud, rajonan ristitišton pol', vn 2021 — 4 070 ristitud. Kaik 4 083 eläjad oli lidnas vl 2017. Kaikiš suremb lidnan ristitišt oli 6 305 eläjad vl 1989.

Rahvahad (enamba 0,4 % vl 2021): venälaižed — 96,0 %, vaugedvenälaižed — 0,9 %, ukrainalaižed — 0,4 %, azerbaidžanlaižed — 0,4 %, toižed rahvahad — 1,6 %, rahvahuden ozutandata — 0,7 %.

Ortodoksižen hristanuskondan ph. Sergii Radonežalaižen jumalanpert'^[1] om saudud vll 1997−2000.

Lapsiden opendusen aluzkundad oma Pustoškan openduzkeskuz päivkodinke, lapsiden sädamižen pert', čomamahtoiden škol, lapsiden da norišton sportškol. Kursoiden openduzkombinat^[2] om lidnas. Professionaližen opendusen aluzkundad ratas lähembaižiš lidnoiš.

Galerei

Pustoškan rajonan käskuzkund vl 2011
Ph. Sergii Radonežalaižen jumalanpert', vn 2010 nägu
Tegimišton tavaroiden lauk (2011)
Avtotesild Krupejas päliči (2013)
Pustošk-raudtestancijan sauvuz vl 2011

Homaičendad

Irdkosketused

Pustošk Vikiaitas

	Pskovan agjan lidnad
	Dno \| Gdov \| Nevel' \| Novoržev \| Novosokol'niki \| Opočk \| Ostrov \| Petseri \| Pitalovo \| Porhov \| Pskov \| Pustošk \| Sebež \| Velikije Luki

[1] Pustoškan pühäpertid sobory.ru-saital. (ven.)

[2] Pustoškan kursoiden openduzkombinat pskovedu.ru-saital. (ven.)

[1]

[2]