Pitalovo

Pitalovo
Пыталово

Lidnanznam
Valdkund	Venäma
Eläjiden lugu (2021)	5,263 ristitud
Pämez'	Irina Afonina (2018—)
Telefonkod	+7−81 147-xx-xxx
Avtokod	60
Aigvö	UTC+3 (MSK+0)

Pitalovo (ven.: Пыта́лово, latv.: Pitalova) om Venäman lidn, lidnankund da raudtesol'm Pskovan agjan keskuzpalan päivlaskmas. Se om Pitalovon rajonan administrativine keskuz.

Istorii

Eländpunktan aluz om pandud vl 1863 kuti pol'stancii raudtel. Vozil 1920–1944 se rajonanke oli mülünu Lätänmaha. Vozil 1925–1937 eländpunktan latvijan nimi oli Jaunlatgale («Uz' Latgalii», ven.: Я́унлатгале), vozil 1937–1945 — Abrene (ven.: А́брене). Vl 1933 se sai lidnan statusad. Suren sodan aigan lidn oli nacistižen Germanijan okkupacijan zonas (5. heinku 1941 — 22. heinku 1944).

Pitalovo šingotase valdkundaližen büdžetan aluzkundoil (Federaline muitradnikoičend), avtopaloiden edheotandal, röunanverižil varažomil, mecpilindan edheotandoil. Pitalovon lihanümbriradai kombinat pästab kolbasoid. Ende maidtegim radoi mugažo.

Geografijan andmused

Lidn sijadase Utroi-jogen randal (ven.: Утро́я, Sur'-jogen hura ližajogi), 80 m ü.m.t. keskmäižel korktusel.

Matkad Pskovhasai om 102 km pohjoižhe. Lähembaižed lidnad oma Viläk (Lätänma) 20 km lodeheze orhal vai raudtedme i Ostrov (Pskovan agj) 50 km pohjoižpäivnouzmha orhal vai raudtedme.

Tobmuz

Pitalovo om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden Nevondkundan ezimez'. Edeline lidnan pämez' om Vera Sivaja (2013−2018). Lidnankundan Administracijan pämez' om Irina Meščeräk vn 2020 redukuspäi. Edeline lidnan Administracijan pämez' om Galina Merenkova (kül'mku 2015 — reduku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 5 826 ristitud, vn 2021 — 5 263 ristitud. Kaik 5 335 ristitud elihe lidnas vl 2017, rajonan pol'. Kaikiš suremb lidnan ristitišt oli 7 300 eläjad vl 1996.

Rahvahad (enamba 0,4 % vl 2021): venälaižed — 92,4 %, vaugedvenälaižed — 1,5 %, armenijalaižed — 1,3 %, azerbaidžanlaižed — 0,5 %, ukrainalaižed — 0,4 %, toižed rahvahad — 2,2 %, rahvahuden ozutandata — 1,7 %.

Ortodoksižen hristanuskondan puine Mikulai-čudonsädajan jumalanpert' sijadase läz raudtestancijad, se pühäpert' om saudud vll 1929–1932 kut ortodoksine Latvijan tobmuden aigan.

Lapsiden opendusen aluzkundad oma koume päivkodid, keskškol, rajonan lapsiden sädamižen pert', čomamahtoiden škol, lapsiden da norišton sportškol. Ostrovan äiprofil'žen kolledžan Pitalovon filial om lidnan professionaližen opendusen aluzkundaks.

Galerei

• 
  Ph. Mikulai-čudonsädajan jumalanpert', vn 2022 nägu
• 
  Znam lidnan röunal
• 
  Päraudtestancijan sauvuz vl 2005

Irdkosketused

• Pitalovon lidnankund rajonan oficialižel saital (pytalovo.reg60.ru). (ven.)
• Lidnan informacine sait (pytalovo.ellink.ru). (ven.)