Streževoi

Streževoi
Стрежевой

Lidnanznam
Valdkund	Venäma
Eläjiden lugu (2018)	41 541 ristitud
Pind	31,48 km²
Pämez'	Valerii Harahorin (keväz'ku 2 009—)
Telefonkod	+7-38 259-xx-xxx
Avtokod	70
Aigvö	UTC+7 (MSK+4)

Streževoi (ven.: Стрежевой) om Venäman lidn da lidnümbrik (vspäi 2004) Tomskan agjan lodehes. Se om agjan koumanz' eländpunkt eläjiden lugun mödhe, om ümbärtud Aleksandrovskojen rajonal.

Istorii

Ende hantin küläd i kalanpüdajiden Streževoje-külä (vspäi 1932) oliba olmas necil sijal. Nügüdläižen eländpunktan aluz om pandud vl 1966 kuti kivivoin sadajiden žilo, nimitihe külän mödhe. 1960-nziden voziden lopus tedotihe žilod kaiken NSTÜ:n Komsomolan udarnikoiden sauvondaks. Radnikžilo sai lidnan statusad agjan alištusenke vn 1978 5. päiväl sulakud.

Lidn šingotase kivivoin tedištelendal da samižel sen ümbrištos, kivivoinümbriradajal tegimel, kivivoin samižmašiništon tegimel, gazanveimiden i kivivoiveimiden sauvondan da holitusen (lendimport) edheotandoil.

Geografijan andmused

Lidn sijadase Obinjogen oiktan Pasol-hijaman oiktal randal, 41 m ü.m.t. keskmäižel korktusel. Matkad Hantin da Mansin avtonomižen ümbrikon röunhasai om 10 km pohjoižhe orhal, Tomskhasai om 635 km suvipäivnouzmha orhal, 2 416 km avtotedme (tal'vte om olmas) vai Obin ülezjogen. Lähembaine lidn da raudtestancii om Nižnevartovsk (Hantin da Mansin avtonomine ümbrik) 63 km lodeheze avtotedme. Jogiport sijadase 6 kilometras lidnaspäi, lendimport eläb bankrotnendan proceduras läbi vspäi 2016.

Streževoi om lidnümbrikon üks'jäine eländpunkt. Lidnankundan pind — 212,97 km².

Eläjad

Vn 2010 Venäman rahvahanlugemižen mödhe eläjiden lugu oli 42 219 ristitud. Kaikiš suremb lidnan ristitišt om vspäi 1989, enamba 40 tuhad eläjid (44 600 rist. vl 1998 i 44 693 rist. vl 2009). Ortodoksižen hristanuskondan ph. Mikulai-čudonsädajan jumalanpert', protestantizman «Elon vajeh»-keskuz i islaman «Al'-Hajat»-pühäpert' oma olmas lidnas.

Professionaližen opendusen aluzkundad: «Tomskneft'»-kompanijan openduzkombinat, Žirnovskan kivivointehnikuman filial, Tomskan tegimištoliž-gumanitarižen kolledžan filial, üläopendusen aluzkundoiden koume filialad (Piter, Tümen').

Irdkosketused

• Lidnan tobmuden aluzkundoiden oficialine sait (admstrj.tomsk.ru). (ven.)