Toksovo

Toksovo
Токсово

Valdkund	Venäma
Eläjiden lugu (2020)	5,499 ristitud
Telefonkod	+7−81 370-xx-xxx
Avtokod	47
Aigvö	UTC+3 (MSK+0)

Raudtestancijan pert' Toksovos vl 2008

Toksovo (ven.: То́ксово, suom.: Toksova) om Venäman lidnanvuitte žilo Leningradan agjan Vsevoložskan rajonan keskuzpalas. Se om Toksovon lidnankundan administrativine keskuz.

Istorii

Nell' lähišt küläd nügüdläiženke nimenke mainitasoiš Uz'lidnan Vodin pätinan aigkirjas vl 1500. Nimituz libub suomen kelen tuoksuva-vaihespäi «hajui hüvin». Vll 1930−1939 Toksovo oli rajonkeskuseks. Suomenkel'ne ristitišt oli enambuses žilos edel Sured sodad. Kezaküläpertiden žilo sai lidnanvuiččen žilon statusad vl 1963.

Toksovo šingotase betonantegimel, sömtegimištol (olud, jabloksidr), meblin tehmižel, noroiden edheotandal (mugažo kervačud, verkod), agjan hihtandsportan keskusil i turizmal.

Geografijan andmused

Lidnanvuiite žilo sijadase kaks'kümnes kilometras pohjoižpäivnouzmha Piterin röunaspäi.

Matkad Vsevoložsk-rajonkeskushesai om kaks'kümne nell' kilometrad suvipäivnouzmha.

Ühtennimine Toksovo-raudtestancii radab žilos vspäi 1917. Kaik om 130 nimitadud irdad, kujod da allejad.

Eläjad

Vn 2010 Venäman rahvahanlugemižen mödhe žilon eläjiden lugu oli 6 135 ristitud. Kaikiš suremb žilon ristitišt oli 7 616 eläjad vl 1970.

Rahvahad (ozutadud rahvahudenke vl 2002): venälaižed — 88,6 %, ukrainalaižed — 4,1 %, suomalaižed — 2,1 %, vaugedvenälaižed — 1,6 %, toižed rahvahad — 3,6 %.

Ortodoksižen hristanuskondan ph. Mikoi-arhangelan i Kaikiden taivhaližiden vägiden päjumalanpert' om saudud žilos vl 1999−2003. Lüteranine pühäpert' om restavriruidud vspäi 1990 i om avaitud.

Ristitišt ližadub kezaaigan 40 tuhazesai. Hihtandsportan nell' bazad i mägisuks'kurort sijadasoiš žilos ümbri.

Openduz

Lapsiden opendusen aluzkundad oma Toksovon opendusen keskuz (keskškol) kahtenke školanedeliženke palakundanke (nomer 1 i 2), koume privatišt nimitadud päivkodid, lapsiden šingotesen Akademija Toksovo-keskuz.

Professionaližen opendusen aluzkundad ratas lähembaižiš lidnoiš.

Irdkosketused

• Toksovon lidnankundan tobmuden sait (toksovo-lo.ru). (ven.)