Vsevoložskan rajon

Vsevoložskan rajon
Всеволожский район
Znam;	Flag;
Valdkund	Venäma
Administrativine keskuz	Vsevoložsk
Eläjiden lugu (2024)	571,142 ristitud
Pind	2,945,00 km²

Vsevoložskan rajon (ven.: Все́воложский райо́н) om Venäman municipaline ühtnik Leningradan agjan keskuzpalan päivlaskmas.

Administrativine keskuz om Vsevoložsk-lidn, mülüb rajonha vspäi 2006, sijadase Piterin röunanno.

Istorii

Vsevoložskan rajonan aluz om pandud vn 1936 elokun 19. päiväl Leningradan agjaha Vsevoložskii-žilon keskuseks.

Vl 1954 ühtištadihe Pargolovon rajonan küläkundoid Vsevoložskan rajonanke. Vl 1963 Vsevoložskii-radnikžilo kändihe lidnaks, alištadihe sidä agjan tobmudele oikti, no lidnan ispolkomale alištuiba molembad lidn da rajon. Vozil 1998−2006 Sertolovo oli lidnaks agjan alištusenke. Rajon om olmas nügüdläižiš röunoiš vspäi 2006.

Geografijan andmused

Vsevoložskan rajon om Leningradan agjan keskuztaho. Pind — 2 945 nellikkilometrad. Mecad ottas territorijan koume videndest, ned oma kavag'mecad tobjimalaz. Om soid 3,6 % rajonan territorijal.

Om röunoid Venäman koumenke rajonanke da Piterinke:

suvipäivnouzmas Leningradan agjan Kirovskan rajonanke;
suvipäivlaskmas da päivlaskmas Piterinke;
lodehes Leningradan agjan Viipurin rajonanke;
pohjoižes Leningradan agjan Priozerskan rajonanke.

Rajonan päivnouzmaižed randad lainištab Ladoganjärv. Znamasine jogi om Oht, lankteb Nevaha. Neva om rajonan suviröunaks. Znamasižed järved oma Lembolovonjärv, Kavgolovonjärv, Hepojärv da Volojärv. Kaik joged da järved mülüdas Atlantižen valdmeren basseinha.

Londuseližed varad oma turbaz, sauvondmaterialad (letked, saved), mineraližed mujud, mec, kala, reskvezi.

Tobmuz

Vspäi 2013 rajonan territorii jagase 19 municipaližeks ühtnikaks, sil vodel oli ühesa lidnankundad i kümne küläkundad. Aigan mändes erased-se enččed küläd saiba lidnan statusad, i vn 2024 kezakuspäi kaks'toštkümne lidnankundad i seičeme küläkundad om rajonas.

Käskusenandai tobmuz om Deputatoiden nevondkund (ven.: Совет депутатов) 38 ühtnijanke. Kaik rahvaz valičeb heid videks vodeks. Järgvaličendad sihe oliba vn 2014 sügüz'kun 14. päiväl. Ol'ga Koval'čuk radab sen ezimehen da rajonan pämehen vn 2014 sügüz'kun 23. päiväspäi. Deputatoiden nevondkund valičeb rajonan administracijan pämest.

Vn 2014 redukun 23. päiväspäi Vladimir Dračov om valitud konkursan kal't i radab rajonan administracijan pämehen kontraktan mödhe. Edel sidä, vn 2013 tal'vkuspäi, hän oli rajonan administracijan pämehen velgusentäutajaks. Seičeme varapämest abutadas hänele. Kaik koume komitetad, nell' ohjandust, 14 palakundad, kaks' sektorad da kaks' laudkundad alištudas rajonan administracijale.

Eläjad

Vn 2010 Venäman rahvahanlugemižen mödhe rajonan eläjiden lugu oli 260 478 ristitud (ühtenz' sija agjas), vn 2021 — 519 360 ristitud. Kaik 326 753 eläjad oli rajonas vl 2017, siš vodespäi Vsevoložskan rajon om kaikiš suremb rajon Venämas ristitišton lugun mödhe. Kaikiš suremb rajonan ristitišt om nügüd'. Rajonan seičeme eläjad kümnespäi oma lidnalaižed.

Kaik om 153 eländpunktad rajonas, sidä kesken kuz' lidnad, seičeme lidnanvuittušt žilod, 22 žilod, üks'toštkümne raudtestancijan žilod, 105 küläd, kaks' sijašt.

Toižed znamasižed eländpunktad oma Sertolovo-lidn (51,1 tuh. rist. vl 2016), Murino-lidn (49,6 tuh. rist. vl 2019), Kudrovo-lidn (31,5 tuh. rist. vl 2019), Bugri-lidn (22,4 tuh. rist. vl 2021), Uz' Devätkino-külä (16,2 tuh. rist. vl 2016), Koltuši-lidn (13,8 tuh. rist. vl 2021), lidnanvuiččed Morozovan nimed žilo (10,6 tuh. rist. vl 2016), Kuz'molovskii-žilo (10,0 tuh. rist. vl 2016) i Sverdlovan nimed žilo (9,8 tuh. rist. vl 2016).

Rahvahad (enamba 0,4 % vn 2010 Venäman rahvahanlugemižen mödhe): venälaižed — 90,3 %, ukrainalaižed — 2,7 %, vaugedvenälaižed — 1,0 %, armenijalaižed — 0,7 %, totarlaižed — 0,7 %, uzbekalaižed — 0,5 %, suomalaižed — 0,4 %, toižed rahvahad — 2,7 %, rahvahuden ozutandata — 1,0 %.

Erased-se igähižed rahvahad^[1]: karjalaižed — 110 rist. (0,04 %), estilaižed — 81 rist. (0,03 %), vepsläižed — 30 rist. (0,01 %).

Rahvahad (enamba 0,4 % vl 2021): venälaižed — 70,9 %, ukrainalaižed — 0,7 %, totarlaižed — 0,5 %, armenijalaižed — 0,4 %, toižed rahvahad — 3,9 %, rahvahuden ozutandata — 23,6 %.

Ižanduz

Rajonan ižandusen päižed sarakod oma kebnavtoiden pästand (vhesai 2019 Ford Motors), renghanpäližiden tehmine (Nokian Tyres), mecan ümbriradmine, sauvondmaterialiden sarak, cellülozbumagaine tegim, gazanveimtransport (Elizavetinskai KS), sömtegimišt, maižanduz (kazvatadas linduid, maploduid, marjoid), torguind da logistik.

Homaičendad

↑ Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lp. — Lpp. 32−33. (ven.)

Irdkosketused

Vsevoložskan rajonan oficialine sait (vsevreg.ru). (ven.)

[1] Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lp. — Lpp. 32−33. (ven.)

[1]