Lugan rajon

Vikipedii-späi
Lugan rajon
Лужский район
Znam
Valdkund Venäma
Administrativine keskuz Lug
Eläjiden lugu (2016) 75,009 ristitud
Pind 6,006,00 km²
Lugan rajon Лужский район

Lugan rajon (ven.: Лужский район) om municipaline ühtnik Leningradan agjas.

Administrativine keskuz om Lug-lidn (mülüb rajonha vspäi 2006), sijadase rajonan pohjoižes. Rajonan ristitišton läz pol't eläb siš.

Istorii[vajehta | vajehtada tekst]

Rajonan aluz om pandud vl 1927 elokun 1. päiväl Leningradan agjan Lugan ümbrikho ühten aigan niiden sädandanke. Vl 1930 heinkun 23. päiväl heitihe ümbrikod, i siš aigaspäi rajon mülüb Leningradan agjaha kuti administrativine ühtnik. Vozil 1939−2006 Lug-lidn oli alištunu agjan tobmudele oikti.

Toižen mail'man voinan aigan vozil 1941 (eloku) — 1944 (uhoku) rajonan territorii oli okkupiruidud. Vs 1959 redukun 22. päiväspäi enččen Oredežan rajonan territorii mülüb Lugan rajonha. Vs 1963 uhokun 1. päiväspäi Slancin rajonan enzne pala mülüb Lugan rajonha. Rajon om olmas nügüdläižiš röunoiš vspäi 2006.

Geografijan andmused[vajehta | vajehtada tekst]

Lugan rajon om Leningradan agjan suvipäivlaskmaine taho. Pind — 6 006 nellikkilometrad (videnz' sija agjas). Mec katab kaks' videndest rajonan territorijad (2354 km²)[1].

Om röunoid 8 Venäman rajonanke:

Saum vezid — 3,5% (210 km²). Znamasižed joged oma Lug (vod. Laugaz) da sen ližajoged: oiktad — Oredež, Jaščer, i hura — Sab. Kaikiš surembad järved oma Samro (40,4 km²) rajonan päivlaskmas, Väl'je (läz 20 km²) rajonan pohjoižes, Čeremeneckoje (15 km²) da Vrevo (12,8 km²) rajonan suves. Kaik joged da järved mülüdas Baltijan meren (Atlantižen valdmeren) basseinha.

Londuseližed varad oma turbaz, letked, mec, reskvezi.

Vspäi 2006 rajonan territorii alajagase 15 municipaližhe ühtnikha: 2 lidnkundha da 13 küläkundha.

Tobmuz[vajehta | vajehtada tekst]

Käskusenandai tobmuz om Ezitajiden Nevondkund (ven. Совет депутатов) 30 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Andrei Ivanov radab sen ezimehen da rajonan pämehen vs 2014 sügüz'kun 30. päiväspäi. Ezitajiden Nevondkund valičeb rajonan administracijan pämest.

Vs 2012 redukun 19. päiväspäi Oleg Malaščenko radab rajonan administracijan pämeheks kahtenden strokun jäl'geten. Ezmäine varapämez da nell' muite varapämest oma hänele abhu. Kuz' komitetad, 17 palakundad, 4 sektorad da 2 laudkundad alištudas rajonan administracijan pämehištole.

Eläjad[vajehta | vajehtada tekst]

Vn 2010 Venäman rahvahanlugemižen mödhe eläjiden lugu oli 78 759 ristitud (seičemenz' sija agjas).

Kaik om 348 eländpunktad rajonas, sidä kesken 1 lidn, 1 lidnanvuitte žilo, 22 muite žilod, 1 žilo raudtestancijanno, 316 küläd, 5 sijašt da 2 kordonad.

Toižed sured eländpunktad oma lidnanvuitte Tolmačovo-žilo (2,9 tuh. rist. vl 2016), mugažo Oredež-žilo (2,7 tuh. rist. vl 2010) da Zaklin'je-külä (2,7 tuh. rist. vl 2010).

Rahvahad (vn 2010 Venäman rahvahanlugemižen mödhe, enamba 0,4%): venälaižed — 82,3%, ukrainalaižed — 1,8%, vaugedvenälaižed — 1,0%, totarlaižed — 0,4%, toižed rahvahad — 2,4%, rahvahuden ozutandata — 12,1% (jäl'gmäižiden keskes vaiše 2,8% mahttas pagišta venäkelel).

Erased igähižed rahvahad: estilaižed — 36 rist. (0,05%), karjalaižed — 36 rist. (0,05%), suomalaižed — 27 rist. (0,03%), vepsläižed — 3 rist. (vähemba mi 0,01%)[2].

Ižanduz[vajehta | vajehtada tekst]

Rajonan ižandusen päsarakod oma sauvondmaterialoiden tehmine (abrazivtegesed, raudbetontegesed, metallkonstrukcijad), grafittegesed, stökoltegimišt (vinbutulkad), sömtegimišt, plastikpalad avtoiden südäimen täht, maižanduz[3].

Homaičendad[vajehta | vajehtada tekst]

  1. Lugan rajonan investicine pasport (lenoblinvest.ru). — 24 lp. — Lp. 1. (ven.)
  2. Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lpp. — Lpp. 68−69. (ven.)
  3. Lugan rajonan investicine pasport (lenoblinvest.ru). — 24 lp. — Lpp. 1−9. (ven.)

Irdkosketused[vajehta | vajehtada tekst]