Volhovan rajon

Volhovan rajon
Волховский район

Znam	Flag
Valdkund	Venäma
Administrativine keskuz	Volhov
Eläjiden lugu (2016)	92,327 ristitud
Pind	5,124,65 km²

Volhovan rajon (ven.: Волховский район) om municipaline ühtnik Leningradan agjas.

Administrativine keskuz om Volhov-lidn (mülüb rajonha vspäi 2006), sijadase rajonan suvipäivlaskmas. Rajonan ristitišton pol' eläb siš.

Istorii

Rajonan aluz om pandud vl 1927 elokun 1. päiväl Leningradan agjan Leningradan ümbrikho ühten aigan niiden sädandanke. Zvank-radnikžilo oli rajonan keskuseks. Vl 1930 heinkun 23. päiväl heitihe ümbrikod, i siš aigaspäi rajon mülüb Leningradan agjaha kuti administrativine ühtnik.

Vodele 1933 Zvank-radnikžilo järedui, i sidä kätihe Volhovstroi-lidnaks, kudamb vozil 1939−2006 alištui agjan tobmudele oikti, hot' rajonan tobmuden organad oliba neciš lidnas. Vozil 1946−1963 rajonan pala oli mülünu Uden Ladogan rajonha. Vl 1977 rajonan pala läksi udhe Kirovskan rajonha. Rajon om olmas nügüdläižiš röunoiš vspäi 2006.

Geografijan andmused

Volhovan rajon om Leningradan agjan keskuztaho. Pind — 5 124 nellikkilometrad (kudenz' sija agjas), Ladogan palanke — 8 428,41 km². Mec katab viž kudendest rajonan territorijad (4 208 km²).

Om röunoid 4 Leningradan agjan rajonanke:

• pohjoižpäivnouzmas Pöudon rajonanke;
• suvipäivnouzmas Tihvinan rajonanke;
• suvipäivlaskmas Kirišin rajonanke;
• päivlaskmas Kirovskan rajonanke.

Rajonan pohjoižed randad lainištab Ladoganjärv. Znamasižed joged oma Olhav da Säs' (lanktas Ladogha), mugažo Paš (Süvärin hura ližajogi). Süvär'-jogensu om rajonan pohjoižpäivnouzmaižel röunal (Süvärensu). Kaik joged mülüdas Atlantižen valdmeren basseinha.

Londuseližed varad oma turbaz, sauvondmaterialad (mouckivi, gravii, letked, saved), fosforitad, mec, reskvezi.

Vspäi 2006 rajonan territorii alajagase 15 municipaližhe ühtnikha: 3 lidnkundha da 12 küläkundha.

Tobmuz

Käskusenandai tobmuz om Ezitajiden Nevondkund (ven. Совет депутатов) 30 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Vladimir Novikov radab sen ezimehen da rajonan pämehen vs 2014 redukun 1. päiväspäi. Ezitajiden Nevondkund valičeb rajonan administracijan pämest.

Vs 2016 sulakun 27. päiväspäi Tat'jana Räzanova radab rajonan administracijan pämehen velgusentäutajan (ühteks kuks). Vs 2015 keväz'kuspäi ezmäine varapämez', viž muite varapämest da abunik oma hänele abhu. Kuz' komitetad, 6 palakundad, 4 sektorad, ohjastuz da 2 laudkundad alištudas rajonan administracijan pämehištole.

Eläjad

Vn 2010 Venäman rahvahanlugemižen mödhe eläjiden lugu oli 95 182 ristitud (kudenz' sija agjas).

Kaik om 280 eländpunktad rajonas, sidä kesken 3 lidnad, 9 žilod, 6 raudtestancijan žilod, 262 küläd.

Toižed sured eländpunktad oma Säs'stroi-lidn (13,2 tuh. rist. vl 2016), Uz' Ladog-lidn (8,5 tuh. rist. vl 2016) da Paš-külä (3,8 tuh. rist. vl 2012).

Rahvahad (vn 2010 Venäman rahvahanlugemižen mödhe, enamba 0,4%): venälaižed — 93,7%, ukrainalaižed — 1,1%, vaugedvenälaižed — 0,6%, čiganalaižed — 0,5%, azerbaidžanlaižed — 0,5%, armenijalaižed — 0,5%, toižed rahvahad — 1,6%, rahvahuden ozutandata — 1,5%.

Erased igähižed rahvahad: karjalaižed — 52 rist. (0,05%), suomalaižed — 25 rist. (0,03%), vepsläižed — 23 rist. (0,02%), estilaižed — 14 rist. (0,01%).

Ižanduz

Rajonan ižandusen päsarakod oma kivivoin ümbriradmine, himine sarak, gazanveimtransport, cellülozbumagaine sarak, sömtegimišt, maižanduz, mecan ümbriradmine, gidroenergetik (Volhovan GES), turizm, vhesai 2013 — alüminijan tehmine.

Irdkosketused

• Volhov-lidnan i Volhovan rajonan Ezitajiden Nevondkundoiden oficialine sait. (ven.)
• Volhovan rajonan administracijan oficialine sait. (ven.)