Lomonosovan rajon (Leningradan agj)

Lomonosovan rajon
Ломоносовский район

Znam (text)	Flag (text)
Valdkund	Venäma
Administrativine keskuz	Lomonosov-lidn
Eläjiden lugu (2016)	69 640 ristitud
Pind	1 919,17 km²

Lomonosovan rajon (ven. Ломоносовский район) om municipaline ühtnik Leningradan agjas.

Nece om Leningradan agjan üks'jäine municipaline ühtnik, kudamban ohjandusen organad sijadase toižes fegeracijan subjektas — Piteriš. Rajonan administrativine keskuz om Lomonosov-lidn, iče mülüb Piterin Petrodvorecan rajonha, sijadase pohjoižpoles rajonaspäi.

Istorii

Rajonan aluz om pandud vl 1927 elokun 1. päiväl Leningradan agjan Leningradan ümbrikho ühten aigan niiden sädandanke kuti Oranijenbauman rajon. Oranijenbaum tegihe rajonan keskuseks. Vl 1930 heinkun 23. päiväl heitihe ümbrikod, i siš aigaspäi rajon mülüb Leningradan agjaha kuti administrativine ühtnik.

Vspäi 1939 Oranijenbaum-lidn alištui agjan tombudele oikti, hot' rajonan tobmuden organad oliba neciš lidnas. Toižen mail'man sodan aigan rajonan suvipala oli okkupiruidud. Vl 1948 lidnad da rajonad udesnimitihe nügüdläižikš. Vl 1955 Krasnoje Selon rajonad ühtištuihe Lomonosovan rajonanke. Vl 1963 Krasnoje Selo-lidn tegihe lidnaks agjan alištusenke. Vl 1973 Sosnovii Bor tegihe lidnaks agjan alištusenke da läksi rajonaspäi.

Vl 1978 Lomonosov-lidn tegihe Leningradan palaks, no lidnan Ezitajiden Nevondkund kätihe Lomonosovan rajonan Ezitajiden Nevondkundaks. Rajon om olmas nügüdläižiš röunoiš vspäi 2006.

Geografijan andmused

Lomonosovan rajon om Leningradan agjan päivlaskmaine taho. Pind — 1 919 nellikkilometrad (jäl'gmäine sija agjas). Mecad ottas 72,7% territorijad (1448 km²).

Om röunoid Venäman 3 rajonanke da 2 lidnanke:

• pohjoižpäivnouzmas i päivnouzmas Piterinke;
• suvipäivnouzmas Leningradan agjan Gatčinan rajonanke;
• suves Leningradan agjan Volosovon rajonanke;
• suvipäivlaskmas Leningradan agjan Kingiseppan rajonanke;
• lodehes Leningradan agjan Sosnovii Bor-lidnümbrikonke (pol'anklav).

Suomen laht lainištab rajonan päivlaskmaižed da pohjoižed randad 65 km randanpirdanke. Lühüdad joged mülüdas Suomen lahten (Atlantižen valdmeren) basseinha.

Londuseližed varad oma sauvondmaterialad (gravii, letked, saved), mineraližed mujud, reskvezi.

Vspäi 2006 rajonan territorii alajagase 15 municipaližhe ühtnikha: 2 lidnkundha da 13 küläkundha.

Tobmuz

Käskusenandai tombuz om Ezitajiden Nevondkund (ven. Совет депутатов) 30 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Dmitrii Polkovnikov radab sen ezimehen da rajonan pämehen vs 2014 redukun 5. päiväspäi. Ezitajiden Nevondkund valičeb rajonan administracijan pämest.

Vs 2014 kül'mkun 1. päiväspäi Aleksei Kondrašov om valitud i radab rajonan administracijan pämehen kontraktan mödhe. Nell' varapämest oma hänele abhu. Kuz' komitetad, 13 palakundad, 1 sektor, ohjastuz da 27 laudkundad alištudas rajonan administracijan pämehištole.

Eläjad

Vn 2010 Venäman rahvahanlugemižen mödhe eläjiden lugu oli 70 347 ristitud.

Kaik om 143 eländpunktad rajonas, sidä kesken 2 lidnanvuittušt žilod, 10 žilod, 2 raudtestancijan žilod, 129 küläd.

Kaikiš surembad eländpunktad oma Gorbunki-külä (7,5 tuh. rist. vl 2015), Russko-Visockoje-külä (5,3 tuh. rist. vl 2010) da lidnanvuitte Lebäžje-žilo (4,4 tuh. rist. vl 2016).

Rahvahad (vn 2010 Venäman rahvahanlugemižen mödhe, enamba 0,4%): venälaižed — 87,1%, ukrainalaižed — 2,2%, vaugedvenälaižed — 1,4%, uzbekalaižed — 0,7%, suomalaižed — 0,5%, armenijalaižed — 0,4%, toižed — 3,3%, rahvahuden ozutandata — 4,4%.

Erased igähižed rahvahad: karjalaižed — 41 rist. (0,06%), estilaižed — 28 rist. (0,04%), vepsläižed — 5 rist. (vähemba mi 0,01%), vodilaižed — 5 rist. (vähemba mi 0,01%), ižoralaižed — 1 rist. (vähemba mi 0,01%).

Ižanduz

Rajonan ižandusen päsarakod oma mašinoidensauvomine, sauvondmaterialoiden pästand (apakut, metallkonstrukcijad, pilindmaterialad), poligrafii, maižanduz da kalankazvatuz, torguind da varažomad, tabakan ümbriradmine, sömtegimišt, turizm.

Irdkosketused

• Lomonosovan rajonan oficialine sait. (ven.)